Vorwort

 

1.  S Värsli brünzle

Hommage an Baldi Bärwart

 

Värsli brünzle und Gschichte verzelle,

Das ha n i aigetlig scho immer welle.

Könnt das Vergniege zem Schryybe

Emänd in myne Gen in liige?

Dää, wo sy ‘glaini Wält’ beschryybe duet

Und wie sie Hoosesagg so guet

S Glaibasel kennt und uffgschriibe het,

Was är um sich umme hört und gseet.

Är haisst genau wie my Mamme

Au si het Värsli dichtet amme.

Und do foot dää Gen-Faade aa:

Iirem Babbe sy Babbe het e Guusäng ka.

Was mainsch wie dää ghaisse het?

Du verrootsch es sicher, i mach e Wett.

Noo bring i kai ‘Maissepfiff’ aane,

Bi erscht no e weeneli am Blaane.

Aber Froid macht mer s Dichte scho;

E Värs, e Gschicht es wird scho ko.

1.1.  S Värsli brünzle – Baseldütsch oder Baseldytsch.

 

1.2.  S Värsli brünzle – Hommage an Baldi Bärwart.

Hommage an Baldi Bärwart

 

Värsli brünzle und Gschichte verzelle,

Das ha n i aigetlig scho immer welle.

Könnt das Vergniege zem Schryybe

Emänd in myne Gen in liige?

Dää, wo sy ‘glaini Wält’ beschryybe duet

Und wie sie Hoosesagg so guet

S Glaibasel kennt und uffgschriibe het,

Was är um sich umme hört und gseet.

Är haisst genau wie my Mamme

Au si het Värsli dichtet amme.

Und do foot dää Gen-Faade aa:

Iirem Babbe syi Babbe het e Guusäng gha.

Was mainsch wie dää ghaisse het?

Du verrootsch es sicher, i mach e Wett.

Noo bring i kai ‘Maissepfiff’ aane,

Bi erscht no e weeneli am Blaane.

Aber Froid macht mer s Dichte scho;

E Värs, e Gschicht es wird scho ko.

1.3.  S Värsli brünzle – E neie Värs.

E neie Värs

S verstuunt mi, wie guet s us dr Fäädere lauft,

Wenn sich im Kopf e neie Värs zämmebraut.

Männgmool entsteen im Draum die erschte Zyyle.

Do darf i denn nit zlang drinne verwyyle;

Suech Weerter und Wändige, wo denn au basse.

Darf dr Täggscht natirlig au nit vergässe,

Drum  sagen im Draum ains ums ander Mool uff,

Bis en uswändig ka und schryyben am Morge denn uff.

Ha n i iberhaupt gschloofe in soonere Nacht?

Wo mi s Täggschte wach ghalte het mit Macht?

I glaub, das spiilt e gar e kai Rolle:

Hauptsach i ha e neie Värs, e tolle!

1.4.  S Värsli brünzle – In aigner Sach.

In aigner Sach

Zerscht no öbbis in aigner Sach:

Sit dääne Värs ha n i mit mym Liebschte Grach.

Är het d Värs redigiert und korrigiert,

An allne Egge kritisiert und kommentiert:

 

Das isch nit ‘dytsch’

Und das isch Kitsch.

Das isch nit witzig.

Dää isch vyyl z hitzig.

Do duet dr Rhythmus fääle.

Wotsch alli dermit kwääle?

Dää isch zem gryyne,

Es sott sich au ryyme!

Esoo muesch es schryybe,

Sunscht losch es lieber blyybe.

 

Är het mi duuregschüddlet,

An myne Närve ummegrüddlet.

Nach vyyle schloofloose Nächt

Hoff i jetz, es sig doch rächt.

 

1.5.  S Värsli brünzle – My Stäärnzaiche.

My Schtäärnzaiche

 

I bi im Mai im Stäärnzaiche Zwilling geboore.

Dr Schütz isch als my Aszendänt uuserkoore.

Dr Zwilling isch verschpiilt und greativ – so wie ych.

Dr Schütz schafft mit syyne Pfyyl dr nöötigi Uusglyych.

Loss i mi au hüffig blooge und underdrugge,

So schupft mi dr Schütz, ass mi soll weere und uffmugge.

Hätt är mi nit gschützt, wäär i e Duucheli bliibe.

Duur iin hani gleert schiesse – nit numme uff Schyybe.

Grächtigkait isch mer allewyl wichtig und hilfryych gsi.

Yyfüüle, uusdrugge – au in dr Kunscht - isch doo derby.

D Stäärne wüsse männgmool mee, ass mir zuegää wänn.

Aber d Zuekumft bewyyst is denn, ass si rächt gha hänn.

1.6.  S Värsli brünzle – Basel, my Schtadt.

Basel, my Schtadt

 

In Basel bi n i vor Joore geboore.

An Basel hani my Härz verloore.

Bi do in Kindsgi und in d Schuele gange,

Bi mängmol am Rhyboord ummeghange.

I ha dr Gryff gliebt und denn d Fasnacht erscht!

Ha mi au gfreut uff d Mäss im Herbscht.

Mer hän gspiilt uff em Gottsagger oobe,

Ha mit Gspäänli kenne umme tobe.

Fir dr Sunntigsspaziergang mit em Babbe

Simmer in d Lange (das koscht kai Rabbe).

Emool ha n i deerfe uff e Schiffli go,

Wo si duur dr Weier hän laufe lo.

Dr Summer hämmer an dr Wiise verbrocht.

D Mamme het denn im voruus fir is kocht.

Mer hän PiggNigg gmacht und sin go baade.

S Wasser kunnt zwoor numme bis an d Waade.

Domools hets drin no Beggischwelle gha

Mit glaine Wasserfälli ääne dra.

Uff dääne isch me ibere spaziert;

Hesch di denn au richtig uusbalangsiert!

Doch schwimme hesch in dr ‘Gille’ kenne;

Do hesch miesse zem Dierliparg renne.

Uff dääre Heechi hets e Beggi gää,

Das het sich nämli niemerds lo nää;

Dief und warm isch die Glungge gsi.

Das isch zem guete Gligg hit verby.

Dr Wiiselauf isch jetz renaturiert.

E scheeni Landschaft, wo jede verfiert.

Die erscht Liebi ha n i am Rhy unde droffe.

Hand in Hand simmer am Rhyboord gloffe,

Denn mit dr Minschter-Fääri iber e Rhy,

Natirlig hebsch unterwägs d Hand no dry,

Zer Pfalz die vyyle Dritt uffegstiige

Und deert uff em Bänggli sitze blybe.

Härzbebberle und Grälleli im Buuch

Und dr Bligg uff my Stadt mache mi duuch.

Eerfirchtig druggi mi in Arm vom Frynd.

Fyyl mi dehai und säälig wie e Kind.

 

 

1.7.  S Värsli brünzle – S Tschinggeli.

S Tschinggeli

 

Männgmool do maini, i sigi  bsundrig.

Macht nit scho mi Namme jede gwundrig?

Wie kunnt e Basler Kind zu däm Namme?

Si sin us em Glaibasel gsi, dr Babbe wie d Mamme!

Erscht in dr Schuel hän si mi afoo gingge:

D Corsi, die gheert jo zue de Tschingge!

Speeter, noo dr Schuel, ha n i e Schwiizer-Bass bikoo.

Ha duur dää Yybirgerigsspedaggel miesse go.

Derby sin myni Aane Walser und – so wird’s gsait –

S het se vom Wallis deert iber d Gränze drait.

Ytaliäänisch het vo dääne niemerds gschwätzt.

Vyyli rede hit jetz baides, das isch jo nit lätz.

Aber my Vornamme het au mit ytaliäänisch nyt zdue;

Dää isch spannisch und basst aifach guet derzue.

Halt! My Mamme het  gschwärmt fir e Hollywuud-Staar!

Dääre iire  Namme draag i nämli, jetz isch es glaar.

 

2.1.  Vorgeschtert – Friener.

 

Friener! Jo friener isch es zwoor nit besser gsi, au wenn aim das gäärn über d Libbe wott ko. Friener isch es anderscht gsi. Me het vyyl weeniger gha, aber irgendwie isch es haimeliger gsi. Yybettet in e andere Wält.

Uus hüttiger Sicht kasch über s aint und ander grinse, sogar luut uuse schallere. Ych due mi gäärn an my Juugedzyt zrugg bsinne. Und myni Erinnrige göön wyt zrugg.

2.2.  Vorgeschtert – Wo n i uffgwagse bi: d Maarggrääflerstross.

D Maarggrääflerstross

I waiss zwoor numme vom Höör-Saage, ass der erschti Oort, wo mer gwoont hän, dr Schliengerwääg im Glaibasel gsi isch. Im ene Aifamiliehüüsli hän Babbe und Mamme e Zimmer gha bis si zämme in e aigeni Woonig in dr Maarggräflerstross hän könne züügle. Und do föön myni Erinnrige aa, wo fötzeliwyys duur my Gedächtnis fladdere. Es isch e alts vierstöggigs Huus gsi. Unsri Woonig isch im dritte Stogg glääge. D Woonigsdüür het Glaasschyybe gha, drum het d Mamme diggi Vorhäng aaneghänggt. Vom winzige Gang hän zwai Düüre zu andere Zimmer gfiert. Die noo linggs isch in d Kuchi gange, die rächts in d Stuube und vo döört uus in s Schloofzimmer. Für uffs Abbee hesch e halbe Stogg aabe miesse go.  Yydrügglig bliibe simmer d Düürfalle (woorschinlig, will sie uff myner Augehöchi gsi sin). Gschwungeni, verschnörgleti, schweri Falle. Mööbel hets döört nooni vyyl gha. Dr Kuchidisch und dr Kuchikaschte sin au spööter allewyl no derby gsi. In däm Zimmer, wo me als Stuube bezaichnet het, isch numme e Bett (für mi), e Kaschte, e dreybainigs Nieredischli und zwai änligi Stiel gstande. Im Schloofzimmer ha n i nüt verloore gha, drum ka n i mi au nümmi erinnere.

E baar wyteri Reminszänze im Zämmehang mit däm Huus sin no do. Wenn i vor em Kuchifänschter gstande bi, ha n i uus myner Pherspegtive numme dr Himmel könne gsee und e Vogelschwarm, wo syni Böögli gflooge isch, unermiedlig hi und häär.

S Baade im Wöschzuuber uff em Kuchidisch. S Draage vom Bruschtgstälti, wo me die gstriggte Strümpf aaghänggt het.

Werum und wiesoo waiss i nümmi, aber die grosse Goofe vom Huus hän mi d Källerstääge aabe lo hange; köpflig und an de Fiess hän si mi ghebt.

E Müürli mit eme Yysestangehaag het s Huus vom Trottwar trennt. Döört ha n i natürlig emool dr Kopf duuregstreggt und en ooni Hilf nümm könne zruggzie. Bliibe sijd Drääne und rooti Oore.

D Umgääbig ka n i au no beschryybe: grad wysawyy isch e Wöscherei gsi, wo n i zämme mit em Guusäng Drägg übere gschosse ha. Am andere Egge isch dr Begg gsi, dr Dällebach. Denn isch e Schuelaade ko, dr Casadei, wo stapelwyys Schueschachtle gstande sin. Uff dr andere Strossesyte isch e Tabakläädeli gsi, wo n i als ha miesse Brünett Filter für d Mamme go hoole. Die Läädeli sin a mym Wääg in d Hääfelischuel ääne an dr Horburgstross glääge.

 

 

 

 

 

2.3.  Vorgeschtert – Dringge uus dr Glungge.

Dringge uus dr Glungge

 

Wo d Grossmamme no im ‘Negerdörfli’ z Glaihünige gwoont het, bi n i mit dr Mamme männggsmool döört gsi. Aimool – s het grad uffghört gha räägne, ha n i dusse döörfe go spiile.

Will i blötzlig Durscht bikoo ha, bin i uff d Yydee ko, uus ere Glungge z dringge. Derzue ha n i aber uff e Boode miesse liige, suscht wär i jo nit mit e Muul bis in die Glungge ko. Es het aber e Fötzeli Drägg drinne gha und das isch bim Yynesuuge allewyl nöcher ko. Drum bin i denn uff die ander Syte grutscht und ha döört wiider s Wasser drungge. Das Spiili ha n i e baar Mool miesse mache bis kai Dropfe me drin gsi isch. I ha notürlig niemerem verzellt dervo, suscht hät i Dätsch bekoo.

 

 

2.4.  Vorgeschtert – Spängeli in d Hoor.

Spängeli in d Hoor

 

D Mamme isch wie bsässe gsi, ass mir jo kaini Hoor vom Kopf abstöön. Also het si e jeedes Hoorsträänli mit eme Spängeli am Kopf aagmacht – so ischs mer ämmel vorkoo. S het nämli wee do, wenn si die Spängeli yyne druggt het. Wo n i lengeri Hoor gha ha, isch e Rossschwanz gmacht worde und die Höörli, wo nit im Gummibändeli ghebt hän, het si au wider mit Spängeli fescht an Kopf druggt. So ha n  i öbbe vier bis fünf Spängeli rund um dr Rossschwanz gha. Spöter isch si derzue übergange, die bewusste widerspänschtige Höörli uff Wiggeli yyzrolle, so dass i derno Löggli gha ha.

 

2.5.  Vorgeschtert – Orangschebapyyrli.

Orangschebapyyrli

 

Fiener isch jeedi Orangsche verpaggt gsi im e fyyne Syydebapyyrli. Die hämmer uuspaggt und s Bapyyrli vorsichtig glattgtriche. Derno het me jede Egge zwüsche fiechtem Duume und Zaigfinder gröllelet, so ungefäär 2 cm. D Mitti isch mit dr Fuscht e weeneli zum e Booge druggt worde. S het uusgsee wie e glaine Fallschirm. Dää het me wider über d Orangsche glegt und ere denn e lyychts Schüpfli gää und scho isch e härzigs Schildkrötli dervo gloffe!

 

 

2.6.  Vorgeschtert – S Schaarryyse.

S Schaarryyse

 

Wenn i mit em Mami unterwägs gsi bi, ha n i dr Plausch gha, bi jeedem Huusyygang die baar Stäägedritt uffe und wider aabe zspringe. Si het mit mer gschumpfe und gmaint, i könni falle, drum solli uffhööre. Aber i ha nit gloost und bi wider und wider die baar Dritt uffe und aabe gumpd. Denn hets jo miesse ko. I ha e Dritt verfäält und bi aabe gheit. Uff s Schaarryyse! Mit em Ellebooge bin i uff dämm yysige Ding glandet und es het gruusig bluetet. D Naarbe ka me hütt no gsee. I bi jo sälber tschuld gsi, drum ha n i uff d Zeen bisse und nit derglyyche do, ass es mer zümftig wee do het. S Bluet isch numme so aabegloffe und my Summerröggli isch gly bluetverschmiirt gsi. I bi armschwingend wytergloffe, ass wäri nüt bassiert.

2.7.  Vorgeschtert – Gmainsam uus dr Hundeschüssle ässe.

Gmainsam uus dr Hundeschüssle ässe

 

E ander Mool, wo mer d Grossmamme z Glaihünige bsuecht hän, het si miesse dr Schäferhund hiete vo dr elteschte Dochter, myner Gotte. Domools ha n i no kai Angscht gha vor grosse Dier. I glaub sogar, ass mir zwai ai Härz und ai Seel gsi sin. Mer hän ämmel gmainsam uus sym Schüsseli gässe. Numme d Mamme het kai Freud gha dra. I glaub, si het e soo fescht mit mer gschumpfe, ass i vo döört a e grosse Booge um alli Hünd gmacht ha. Ueberhaupt het mer d Mamme statt Vorsicht Angscht yybleut. So au vor der Konsiross. Si het mer befoole, wenn die binere Baiz stöön, miess i unbedingt s Drottwar wägsle.

2.8.  Vorgeschtert – S Horburgkwartier.

S Horburgkwartier

 

Do ha n i my Kindhait döörfe verbringe;

Ha uff em Gottsagger könne ummespringe,

Döört drey Joor in d Hääfelischuel döörfe go.

Und uusgrächnet die wänn si nümmi lo schtoo.

Das macht mi druurig und duet mer laid.

Glyy griegt dää Egge ganz e ander Glaid.

So vyyl isch anderscht, i kenn mi nümmi uus.

D Horburgschtross isch gsi wie mi aige Huus.

Nääbem Dreyroose isch zerscht dr Begg gsi,

Denn d Metzg mit em ‘Döörf s e bitzeli mee si?’

Am nägschte Egge kasch die ander Baiz finde

Wie die hüt haisst, ka me sicher uusefinde.

Über d Stross kunnt denn s Läädeli vo dr LIGA,

Wysawyy dr ACV und d Hochhüüser vo dr CIBA.

Fassaade linggs wie rächts kenni fascht e kaini mee.

No kasch dr Duurchgang zur Erikastrooss gsee.

Die isch no glyych, wie wo n i döört no gwoont ha.

Numme hets domools no fascht kaini Audi gha.

Noo nem Duurchgang zer Rächte isch e Laade gsi.

Dr Babbe isch döört zum Hoorschnyyde hi.

Zer Lingge hets noo nem Hüüserblogg Gäärte gha.

Und e baar glaini Aifamiliehüüsli nääbedra.

In d Schuel bi n i über d Grüzig ins Dreyroose gloffe.

Was döört hüt abgoot, macht mi doch rächt bedroffe.

Uff däm Mätteli hämer jo au no glacht und gschpiilt.

Hüt ischs d Bolizei, wo hüffig döört aane schiilt.

E Abstächer in d Maarggräfler und Ammerbachschtrooss;

Do füülsch di blötzlig nümmi dehai, bisch wie haimetloos.

D Lüt sin nätt und hööflig, aber de kaschs spüüre;

Das isch wirglig nümm di Dehai, das sin jetz iiri Düre.

2.9.  Vorgeschtert – D Erikastrooss.

No wäärend dr Hääfelischuelzyt simmer in d Erikastross züüglet. Nit öbbe mit em Züügelwaage, nai dr Babbe het s bischaidene Hab und Guet uff eme grosse Laiterwaage sälber transportiert. D Erikastross isch e Sagggass und hüt no allewyl glyych wie domools. Uus dr Vogelpherspeggtive seet d Stross wie e Dennisschleeger uus mit em Keerblatz und eme schmaale Durchgang für d Fuessgänger, wo in d Horburgstross fiert. D Woonig isch e weeneli grösser gsi. Für mi isch si modäärn und zimli luxuriöös gsi; s het schlanggi gradi Düürfalle gha, e Baadzimmer mit ere Baadwanne, eme Brünneli und eme Aabbee und hindenuuse e Terrasse. Aber für mi hets laider kai Zimmer gää. I bi allewyl in d Mame iir Bett go schloofe und Znacht het si mi übere drait in d Stuube und uff s Kanapee bettet.

Joore spöter hets denn doch e dritts Bett gää im Schloofzimmer vo de Eltere. Sogar mit eme Umbau dra und Schiebdüürli, wo n i e baar persöönligi Sache ha könne versorge. Z Fuessede het s sogar e glai Käschtli gää, ebefalls mit Schiebdüürli. Döört sin myni Schuelsache versorgt gsi. Do me wägem Blatz der Oofe in Käller gstellt het, ischs im Winter au entsprächend yysig kalt gsi. Do draa ha n i mi gwöönt. Numme, wenn i öbbis ha welle baschtle z.B. für d Wiehnacht, wo niemerds hät solle see, ha n i im kalte Schloofzimmer uff em Fänschtersims myni Gschänggli gmacht.

Derfür hat d Mamme d Stuube gheizt, ass is männggmool fascht gschmuech worde isch. In dr Stuube hets e grosse Disch gha mit vier Stiel, wo nit alli zu däm Disch ghört hän. E Schesslong, wo zem e Bett het könne umfungtioniert wärde (wo n i lang gnue drin pfuust ha), zwai Sässel, e Dischli und e Büffee, e riisige Färnseekaschte, e Dreydritt für Zimmerlinde, Gummibaum und Philo und e sälber zämmegsetzts Biecherregal. Drin sin d Biecher vom NSB-Verlag gstande. Bevor mer is e Radiomöbel mit Blattespiiler hän könne laischte, hämmer Radibus gloost (drey Kanääl, das het glängt). Im Gang hets e Yybaukaschte gha, wo so allerlai yynegsteggt worde n isch, wie au d Schue. Zwüsche Schloofzimmer- und Badzimmerdüüre isch e schweri Kommode gstande. Zwüsche dr Stuubedüüre mit dr wälligi Glaasdüür, und dr Woonigsdüür mit em Fänschterli isch s Delifoon ghange. E schwarzi Kischte mit ere Wäälschiibe. Und denn hets no d Düür zer Kuchi gää. E langzoogene Ruum bis zer Terrassedüür. Rechts isch als erschts der Gas-Kochhärd gstande mit eme mit Holz befüürbare Dail. Denn dr Disch mit zwai Stiel und eme Taburettli (my Blatz näbe dr Terrassedüür). Links isch das alte greemfarbige Kuchibüffee gstande mit Glasdüürli, dra aane dr Schüttstai und s Abdropfbrätt.

Wenn e Gschpäänli zue mer ko isch go spiile, hämmer amme dörfe d Polschter umbiige und mit eme alte Lyynduech Hütte baue. Aber maischtens hämmer duss uff dr Strooss gspiilt. Balleverband, Ländsgi und Dieb, Sitzball, Kaiser wie vyyl Schrittli dörf i mache, und und und. In dr Strooss hets sälly Zyt no fascht kaini Auti gha,  also isch d Erikastrooss e Baredyysli gsi.

Noo dr Hääfelischuel bi n i denn ins Dreirose-Schuelhuus gho. I ha fascht e weeneli Angscht gha, in dää mächtigi düschter wirkendi Bau yyne z go. Aber d Glasszimmer sin doch nätt gsi und vor allem d Leerere, s Frollein Trueb, isch ganz e liebi gsi. Schiferdaafele hämmer numme kurzi Zyt gha, denn hets die wysse gää, wo me s Gschrybene wiider het könne uusradiere.

Die aigini Wält isch  e weeneli grösser worde: zum aine dr Schuelwääg, dää het zwoor numme über d Dreiroosegrüzig gfiert, denn bi ni für d Mamme go Kommissioone mache. Dr Hueber-Begg, dr Kaschper-Mezg mit em obligaate Reedli Wurscht für dr Haiwääg und dr ACV. Am Aafang hets döört no e Laadedisch gää und ych ha dr Kommissionezeedel em Frollain uffeglängt. Si het denn alles in d Däsche paggt und ych ha se haidrait. Doozemool het d Mamme no könne aaschryybe loo und aimool im Monet denn zaalt. Spööter isch dr ACV zem e Sälbschtbedienigs-laade umbaut worde. An Blääsiring ha n i miesse, wemmer öbbis uus dr Drogerie bruucht hän oder in d Papeterie, go Moolsache für mi go hole. Döört ha n i au myni Keramiksache könne brenne loo. Do ha n i Bläddli, Dässli, Schäleli usw. kauft, bemoolt und zem Brenne brocht. Die sin denn spööter an dr Wiehnacht oder so verschänggt worde.

S Dreyrooseschuelhuus isch dozmool e raini Maitlischuel gsi. Drum ka n i mi guet dra erinnere, wo mi d Mamme gschiggt het go d Hoor schnyyde lo, het si gmaint, i könn aifach zum glyyche Höörlifilzer wie dr Babbe go. Jodernoo! Dää het mer doch tatsächlig e Buebehoorschnitt verbasst und so isch es ko, ass mi im Pausehoof alli Maitli umringt hän und als Bueb uusghänslet hän. Jo, Hansli hän si mer gruefe!

Wo der Wägsel in d Rölleli gho isch, ha n i e vyyl längere Schuelwääg gha. Schliesslig ha n i an Clareblatz miesse laufe, in d Clareschuel.

 

Aigetlig bi n i gärn in d Schuel gange. Mieh ha n i no allewyl mit em Rächne gha und do dernoo no mit em Französisch. Wörtli leere isch kai Problem gsi, aber alles schön uuszspräche isch e Qual gsi. I bi Gottefroh gsi ha ni döört e Banknochbere gha, wo syt domools my Frindyyn gsi und bis hüt bliibe isch.  Si isch Glassebeschti gsi und so ha n i bi iire könne abspigge. Wenns Huusuffgoobe gää het zem e Uffsatz schryybe, het das my Mamme gärn übernoo. Allerdings het dr Leerer noo einiger Zyt gmaint, i soll es sälber schryybe, myni sige besser!!

 

2.10.  Vorgeschtert – Dr Kaugummi.

Dr Kaugummi

 

Kaugummi ha n i sälte ain döörfe ha. S het halt au koschte. So isch es emool ko, ass e Gspänli uff dr Stross mit mir sy Kaugummi het welle daile. Si het en zerscht kaut und derno uusegno und e Stüggli abgrisse für mi. So hämmer uff däm Kätschgummi ummekaut. Si het denn aber wider e Stüggli zrugg welle ha, also ha n i myne wider uus em Muul gno und wider e Stüggeli dervo abgrisse und iire zrugg gää.

Wenn d Mamme das gsee hätt, hätt si mer d Oore langzooge. Drum ha n i my Daili vom Kaugummi aabegschluggt, bevor i hai bi.

 

2.11.  Vorgeschtert – E Schyybe Schungge.

E Schyybe Schungge

 

D Mamme het jo scho miesse uff d Batze luege, drum isch s alltäglig Znacht Angge und Gomfi gsi. Ych ha aber maischtens e Haferfloggebreili griegt, wo n i au gärn gha ha. Oder ebbedie e feini Schnitte, wo n i vor allem d Löcher im Baslerbrot digg mit Angge gfüllt ha und will s au ab und zue kai Gomfi im Huus gha het, het d Mamme s Zuggerglas füregno und e Hüffeli Zugger uff d Schnitte do und se gschüttlet und dr überschüssig Zugger wider ins Glas rinne lo.

 

Dr Babbe – woorschyynlig isch grad Zaaldaag gsi – het e feini Schyybe Schungge uff e Däller griegt. No bevor dr Babbe an Disch gsässe isch, isch die Schyybe i mym Muul verschwunde. Die Fötzeli, wo no uus mym Mull güggelet hän, het är jo schliesslig au nümmi welle.

 

 

2.12.  Vorgeschtert – Dr Gottsagger.

Dr Gottsagger (d Horburgmatte)

 

S Het scho lang kaini Greeber druff mee gha.

Kaini Grabstai und Grüz hets döört mee gha.

Derfür e Wiise mit Stiel zem s Zvieri mampfe.

Hesch könne Balle spiile, ryte und gygampfe.

 

Im Summer hämmer plantscht im glaine Beggi,

Sin erscht mit blaue Libbe zrugg uff d Deggi.

‘Gottsagger’ hämmer en au als Spiilblatz gnennt,

Und sin bigaischteret druff ummegrennt.

 

Aber  aimool sin doch die Doote uffegroche;

Für e Neubau hän si im Boode afo loche!

Im Bauhüttli hän si denn die Gnoche gsammlet.

D Buebe hän is yyne gschiggt und d Düür verrammlet.

 

Noo grossem Gegyygse und lutem Gschrey:

‘Dasch e dummi und  gmaini Bloogerei’,

Isch Düür uffgange und si hän  is uuseglo.

Mer sin hai zäpft, was gisch was hesch, ewägg dervo.

 

Dr Gottsagger isch unser Baredyysli bliibe.

Mer hän is döört vo niemerem lo vertryybe.

In de Druurwiide inne hämmer Mieterlis gmacht,

Hän Gschichtli gspunne und e Huffe glacht.

 

Sisch gsi wie die aigeni glaini Stuube;

Dr Baum het ist deggt mit syner Bledderhuube.

Gsee oder gstöört het is do e kai Bai;

Bis zem Fyyrobesireenepfiff, denn simmer hai.

2.13.  Vorgeschtert – D Horburgmatte.D Horburmatte isch langi Zyt s Zentrum vo mym Lääbe gsi. Mer hän im Beedli könne plantsche (au wenn s Wasser zimli verbrünzlet gsi isch). Fang is mache und um s Beggi ummeseggle und natürlig über s Brüggli laufe. Wenn me Glügg gha het, het me uff dr grosse Wiise no e freie Metallstuel gfunde, wo me syni Sache het könne druff leege.

2.14.  Vorgeschtert – D Hääfelischuel.

D Hääfelischuel

 

Dr erschti Daag isch nit so guet fir mi gloofe;

Wär lieber under e Disch undere gschloffe.

Wo s Frollain rieft: ‘aanesitze, Schlössli mache!’

Hät i um e Hoor no lut aafoo lache:

Alli hän dr Zaigfinger vors Muul aanegstreggt

Und kains het me glaaferet oder sich bewegt.

‘Mainsch, das goot di nyt aa?’ dyttet si uff mi.

Has jo nit kenne wisse, bi doch nei derby.

Hochroot ha n i miesse leere, Schlössli mache.

E Blamaasch duet wee, drum myyd i deerig Sache.

Natirlig bi n i gärn in Kindsgi go spiile.

Ha uff die vyyle Spiilsache deerfe schiile.

Schliesslig ha n i dehaime numme weeni gha.

Im Summer hämmer dr Gaarteschluuch deerfe ha

Um in de Baadhoose in Wasserstraal zgumpe.

‘Wie kunnsch au du zue däm fremde Buebe-Lumpe?’

Schreit d Mamme uff, wo n i denn Zoobe hai koo bi.

‘Die Hoose hän e Schlitz, s kenne nit dyni si.’

Fiirekoo sin myni Heesli laider nimmi.

Niemerds het no Buebehoose gfrogt, dasch s Schlimmi.

 

2.15.  Vorgeschtert – Im Kinsgi.Am Aafang ha n i uus dr Marggrääflerstroos über die grosse Horburggrüzig in Kindsi miesse laufe. Do s jo dört Traminseli gha het, isch es nit so gförlig gsi.

Es het drey Grubbe gää: die vom erschte Kindsgijoor d.h. die Glaine, die vom zwaite Joor sin die Mittlere gsi und die vom dritte Joor die Grosse.

Spööter - uus dr Erikastross - ha n i fascht dr ganz Wääg uff em glyyche Trottwar könne laufe, numme d Müllheimerstross ha n i miesse überkweere. Aber do hets nit vyyl Verkeer gha.

2.16.  Vorgeschtert – Uff em Baandamm umme glättere.

Uff em Baandamm umme glättere (Blindschlyyche)

 

Bi aim vo unsre vyyle Bsiech bi Unggle und Dante, woin dr Allmändstrooss gwoont hän, ha n i uusnaamswyys ellaige dusse gspiilt. Dr Guusäng iund s Guusyynli sin no in dr Schuel gsi. Zerscht bi n i uff dr grosse Wiise ummeglungeret. Denn het mi aber dr Baandamm gloggt. I bi uff däm staile Boord, wo s zue de Schiine uffe goot, umenander gstyge. Uffe und abe. Je wyter uffe i mi getraut ha, umso toller isch dr Uusbligg gsi. I ha die Färnsicht gnosse und ha my Bligg loo ummeschwaife. Derno ha n i my uff e Ruggwääg welle mache und um nit z stolpere, ha n i uuf s Graas under myne Fiess gschilt und do isch mer s Härz fascht stoo bliibe: zerscht ha n i gmaint, es sig mer sturm, aber im Graas het sich öbbis bewegt. Vor mir, nääbe mir und hinter mir! S Wiiseboord isch graglet volle Blindschlyyche gsi. So schnäll bi n i no nie dehaime gsi. Aber wie, waiss i nümmi. I glaub, i bi gflooge.

 

 

2.17.  Vorgeschtert – Moole und baschtle.

Moole und baschtle

 

My Babbe het guet könne zaichne und moole,

My Begoobig derzue ha n i schliesslig nit gstoole.

Au my Mamme het dr Blausch am Zaichne gha,

Aber no mee het sis mit em Baschtle gha.

Alli Gschänggli hämmer amme sälber gmacht.

Mer hän derby Liedli gsunge und vyyl glacht.

Gschänggli kaufe hämmer is nit könne laischte.

Schliesslig gfallt Sälbergmachts  jo au de maischte.

Do het d Rhybrugg e bsundrigi Ydee umgsetzt;

Si het in d Spiilwaare Disch und Bängg yynegsetzt.

In dr Adväntszyt sin mir Goofe denn döört aane.

Für dr Mittwuchnoomidaag hesch das könne blaane.

Döört ha n i gleert, wie me Keramik bemoole ka.

Me het Dässli, Dällerli oder Blättli könne ha.

Am Mittwuch druff het me sy Züggs könne haime nää;

Glasiert und brennt, s het die schönschte Goobe gää.

Die ganz Familie het sottige Kunschtwärg bekoo.

I ka sogar hüt no do und döört finde dervoo.

 

2.18.  Vorgeschtert – Gluggere.

Gluggere

Wotsch mit e baar andere go gluggere,

Muesch zerscht im Doolelechli pfluddere.

Gnyyblisch dr Drägg us em Lechli uuse,

Sin dyni Finger schwarz und zem Gruuse.

Mit dyne Glugger duesch an Bode huure.

Dr erscht Glugger rollt underem Briggli duure

Und ääne wider uuse mit vyyl z vyyl Schuss.

Dr nägscht kunnt dra; du bisch jetz duss.

Däm si Glugger macht scho vorhär schlabb

Und drait diräggt in Strossegraabe ab.

Denn liige ändlig e baar Betschli dinne,

S schynt als wurdisch du die gwinne.

Dy letscht Botsch dänzled uff em Lechlirand,

Und goot denn doch nit yyne, s isch allerhand!

Du bisch duuch und s Härz isch schwäär;

Dy Gluggerseggli isch jetz nämli läär.

 

2.19.  Vorgeschtert – S Zäänerli.

S Zäänerli

 

Au wenn kaini Gspäänli dusse gsi sin,

Das Balleschpiili macht au ellaige Sinn.

Bruuche duesch e Huuswand und e Balle,

Ass de die an d Wand kasch aane knalle.

Natürlig sottsch se jedesmool  fange,

Suscht muesch wider vo vorne aafange.

E jeede vo dääne zää Wüürf isch anderscht;

Aane schiesse und wider fange kunnt zerscht.

Denn wird d Uffgoob allewyl schwäärer.

Loss jo nit d Balle falle, das wäär e Fääler.

Glatsch in d Händ mool vorne denn im Rugge.

Zum Fange muesch di halt au öbbe bugge.

Underem Gneu duure mool rächts denn linggs.

S Glyyche mit Glatsche, mai das bringts.

Über dr Kopf, aber ruggwärts muess es si.

Jo, do wääri au hüt no gärn derby.

Natürlig kasch dr no mee yyfalle loo.

Und scho sin Gschpäänli zum Mitmache do.

2.20.  Vorgeschtert – Klavierspiile am Fänschter.

Klavierspiile am Fänschter

 

I hät jo schuurig gäärn Klavierspiile gleert. Das hän sich aber d Eltere nit könne laischte. I bi gärn am Fänschter gsässe (offe oder gschlosse) und ha mit Inbrunscht Klavier gspiilt uff em Fänschterbrätt. I bi überzüggt gsi, ass alli wo mer zueluege mien aanää, ass i wirgligg Klavier spiil. I bi mer vorkoo, wie e grossi Künschtlere.

E weeneli spöter hän mi d Eltere bim e Handorgele-Leerer aagmäldet und mer e Klavierhandorgele gschänggt. Das isch natürlig kai Ersatz gsi für my imaginäärs Klavier. I bi denn au e Zyttlli brav in dää Unterricht gange. Aber Froid ha n i kaini draa gha. Mer sin drey glaini Gnöpf gsi im Unterricht und hän e Stund lang miesse de Lämbbe vom Leerer und synere Frau zueloose. Die hän sich duurs Stäägehuus aabrielt und mir sin schlotternd uff de Bänggli gsässe.

I main, i sig kai Joor in dää Muusigunterricht gange, wo my Glasseleerer d Mamme zue sich gruefe het, um se z bitte, mi uus däm Unterricht uuseznää. I liess in de schuelische Laischtig blötzlig noo. Waiss är rächt, wie glügglig är mi gmacht het?

2.21.  Vorgeschtert – D Kinderstuube.

D Kinderstuube

 

Was ha n i als Kind glitte, wenn d Mamme und vor allem d Grossmamme mi gmaant hän:

• mach s Muul zue bim Ässe,
• schloo s Dääfi nit an de Zeen umme,
• stoos nit mit em Löffel/Gaable an d Zeen,
• due nit wurge bim Schlugge,
• lüpf dyni Fiess und due nit schlurbbe,
• nit gnätsche, nit süüfere

Jegligs Grüsch isch e Drama gsi! S Gnischtere bim Ärdnüssli schelle, het mer s Ärdnüssli ässe verlaidet. Luutloos in e Öpfel bisse isch zur Kunscht worde. Die Schuel het Folge gha!

I has zwoor fascht vollkoomme beherrscht. Aber i ha das gly wytergää. Wehe in mym Umfäld het öbber kaini Maniere gha, so wie das mir yydrillt worde isch! Dää ha n i drybeliert. My liebi Fründyyn ka e Liedli dervoo singe.

Mit de Joore isch mer aber glaar worde, ass wenn me gnussvoll in e Öpfel bisst, das richtig grache muess und e gnaggigs Riebli au und au Ärdnüssli bim Schelle lärme dien. Au die issi hüt ainewääg wider. Trotzdäm goot  no hüt nüt über aaständigi Dischmaniere. Ass me s Muul zue het bim Ässe isch jo s mindeschte. Wemme aber s Verkätschte im Muul ummedrüllt und derby s Muul lyycht uff macht und e s ‘ntsss’ uuseloot, grieg i Würm.

S goot mer au allewyl no uff e Wegger, wenn öbber d Dasse an d Libbe hebt und denn yynezieht mit eme lange ‘fffff’ oder ‘ssss’ (dr Kaffi sigi no z haiss) oder ebesoo dr Löffel mit dr Subbe.

Was y au nit verbutze ka, isch bim grosse Durscht d Dranggsaame aabegluggere zloo mit e Huffe lute ‘ng, ng, ng, ng’.

Do druff ha n i letschti my Grosskind aagsproche. I hanere zerscht vorgmacht, wie ych dringge due. Do sait si: ,Du dringgsch genau glyych wie my Babbi’.

Hesch no e Froog? Und das isch jo schliesslig my Soon!

 

 

 

2.22.  Vorgeschtert – ..und s Benää.

Wie ha n i als Goof wäg dr Grossmamme miesse lyyde,

Wenn i bim Ässe d Grüsch nit ganz ha könne vermyyde!

‘Hogg grad uff e Stuel und schloo dr Löffel nit an d Zeen!’

‘Heeb s Muul zue bim Ässe, ass d Lüt nit grad yyne gseen!’

Nit gnätsche, nit süüfere, nit wurge bim Schlugge!

Am liebschte wurd mi under e Disch undere dugge.

‘Höör uff schlurbbe, kasch doch dyni Fiess richtig lüpfe!

Kasch es ämmel au bim Ummegumpe und Hüpfe.’

Luutloos in e Öpfel bisse isch zur Kunscht worde.

Für dää Drugg und Drill verdien i e bsundrige Orde.

I has fascht zur pherfäggte Grüschloosigkait aane brocht.

I ha denn au myy Umfäld mit glyyche Fordrige glocht.

Was me miir yydrillt het, ha n i andere wytergää.

I ha mer myni Dischmaniere uff kai Fall loo nää.

My Fründyyn ka nämli do dervoo e Liedli singe.

I ha si männgmool fascht zur Wyyssgluet könne bringe.

Noo Joore waiss i, ass härzhaft in e Öpfel bisse,

Grache döörf und d Näärve derwääge nit duet schlisse.

Au Riebli und Nüssli und vyyl anders döörfe grache.

Aber s goot mer uff e Wegger und das sottsch nit mache;

Bim Ässe s Verkätschte zaige und druff aabe lache.

Bi mir kunnsch natürlig au bim Süüfere an d Kasse:

Dr Kaffi yyneschlürfe - wyt ewägg vo dr Dasse -

Mit eme kuum bräschtierbare lange ‘ffffff’ oder ‘sssssss’.

Dr Kaffi sigi schliesslig no allewyl vyyl z haissss!

S Dringge gluggere loo mit ‘ng ng ng’, dasch diggi Boscht,

Do grieg i au hüt no Hienerhut und Schüttelfroscht.

Grad kürzlig ha n i drum mym Grosskind s Dringge vorgmacht.

Do sait si: ‘Jo, so dringgt au my Babbi’ und het glacht.

Wie könnts au anderscht si, är isch jo schliesslig my Soon

Dr Öpfel fallt allewyl nit wyt vom Stamm, so au dr Spoon*.

 

 

2.23.  Vorgeschtert – Dr Botschamber.

Dr Botschamber

 

Aimool ha n i bi dr Grossmamme döörfe übernachte. Das isch mer aber in phyynliger Erinnrig bliibe. Uffghalte het me sich bi dr Grossmamme allewyl in dr Kuchi. Döört hets e gmietlige Eggbangg gha. Uff ere  munzige Terrasse het si iiri Kaktüss verhätschlet. S sin iire ganze Stolz gsi. In dääre doch sehr alte Woonig hets jo au kai WC gää. Me het in Huusgang miesse und in Zwüschestogg aabelaufe. Döört isch denn e WC-Kämmerli gsi. Döört aabe isch si Znacht aber nit. Do derfür het si e Botschamber underem Bett zstoo gha.

I bi also nääbe dr Grossmamme im Bett glääge und ha iire bim Schnarchle zuegloost. Das isch so glyychmässig und ylullend gsi, ass i gli yygschloofe bi. Verwache bi n i denn aber vomene aigenartige Grüsch und es het e Wyyli bruucht, bis i begriffe ha, was i do höör. S het gruuscht wie n e Wasserfall. D Grossmamme het in iire Botschamber brünzlet. Mir isch s Härzli fascht stoo bliibe und i ha mi fescht schloofe gstellt. I ha wägem Geplätscher Angscht gha, ass dää Botschamber gly überlaufe könnt.

 

 

 

2.24.  Vorgeschtert – Wenn spiile nit glych spiile isch.

Wenn spiile nit glych spiile isch

 

Was sin das für tolli Noomidääg gsi:

Unggle, Dante, alli sin do derby!

D Dante het denn amme au s Zepter gfiert

Und die ganzi Spiilrundi dirigiert.

Si het alli Pfand entgeege döörfe nää,

Wo me bim e Fääler het miesse gää.

Wie hets denn au zue Fääler könne ko?

Hesch bim Watte-Bloose ein duureglo,

Isch s erschti Pfand an d Dante gange.

Für wyteri hesch nit miesse blange.

Gly isch iir Körbli voll gsi bis an Rand.

Was macht jetz das Pfand in iirer Hand?

Vorschleeg sin vyyli uus dr Rundi ko:

Vom Witz verzelle und in Egge stoo,

Vom Schmützli verdaile und Liedli singe,

Under Glächter duss im Vieregg springe.

An luschtige Ydee hets gwiis nit gfäält.

S Pfand miesse uuslööse, das het kwäält.

Was kuum z kurz ko isch, isch härzligs Lache.

Drum kömme denn au no diggeri Sache.

Uff em Disch liige Biecher, die sottsch küsse.

Mit verbundene Auge, muesch wüsse!

Aine nimmt glammhaimlig s letscht Buech ewägg;

Scho landsch im Wasser, jetz hesch dr Drägg.

Denn iebsch über Fläsche yyne z styyge;

Blind gseesch nit, ass kaini mee do liige!

Denn haissts gang e glai Momäntli uuse.

Dernoo ligt ain am Boode, ass wurd är pfuuse.

Yypaggt in e Deggi vo Kopf bis Fuess.

Uff em Kopf bambelet e Huet zum Gruess.

Stell di gspraizt über en und stell em Frooge.

Bass uff, emänd isch alles verschoobe:

Är paggt di vo hinde, denn d Fiess sin dr Kopf

Und du gyggsisch vor Schregg du arme Dropf.

Denn kunnt s Gruuselkabinett mit em Medium.

Das drait dr bigoscht fascht dr Maage um.

Uff em e Stuel hoggt als Medium dr Unggle.

D Dante duet ghaimnisvoll dr Ruum verdunggle.

Nach Hokuspokus und Simsalabim

Stupft si mit ere Guufe in Kopf vo iim!

S Medium sig jetz baraat, är spüüri nüt.

Si nimmt e Scheer, scho schreye alli Lüt.

Si sticht em in Kopf und nimmt no e Mässer.

Denn e Beili, s wird allewyl grasser.

Dr Spuuk het en Änd, s Härzglopfe verebbt.

Was mainsch, was dr Unggle in dr Hand in hebbt?

E Kaabis gspiggt mit Scheer, Mässer, Noodle!

Im Ruum foots jetz so richtig a broodle.

Glatsche, gyggse, schallere und grööle.

Morn muesch denn iiri Stimmbänder ööle.

 

2.25.  Vorgeschtert – Singe.

Singe

Musiziere und Singe isch bi uns dehai gross gschriibe gsi. Dr Babbe het uff dr Gitarre glimberet oder Mamme und Babbe hän zämme Schnuuregyge gspiilt. Oder aber me het mitenand gsunge. Das ha n i sehr gliebt. Aber wo n i denn aagfange ha mitsinge, het my d Mamme aagfaare: ,Bis still, du singsch falsch!’ – I ha niemee e rächte Doon uusebrocht. Vor luter Hemmige ha n i kai Doon me richtig droffe. Das ha n i nümmi ableege könne. I ha aifach nit könne singe, i ha mi niemee getraut.

So bi n i denn halt spöter in e Koor go singe. Do ha n i nit miesse vorsinge.

2.26.  Vorgeschtert – D Schnuuregyyge.

2.27.  Vorgeschtert – Die gstriggte Strümpf.

Die gstriggte Strümpf

 

Was für e Gruus und wie hän si bisse;

Die wullige Strümpf dueni nit vermisse.

Am Bruschtgstältli het me si draa ghänggt.

Zum Aanesitze het dr Gummi grad glängt,

Aber uff em Aabee hets denn aine gsetzt:

S hetse bim Uffstoo zrugg ans Fudi gschletzt.

Derzue ghöört hän die gstriggte Underhoose,

-Dermits um d Schänggel umme nit ka bloose-,

Mit lange Bai, wo ripse dien; e kai Vergniege!

Und de dervo no Bloodere kasch griege.

Langi Hoose für Maitli sin verbodde gsi;

Drum ischs mit Ummegummpe nüt me gsi.

Und ändlig hets Strumpfhoose für is gää;

Die ‘Dunggelblaue’ hämmer is nümm lo nää.

Ermelschoner und Schürz sin längscht duure,

Au die aagstriggte Pulli due n i nit beduure.

Was i aaleege sott, het d Mamme gsait,

Nit was i wott; do het e andre Wind gwait!

2.28.  Vorgeschtert – Wagstumstöörige.

Wagstumsstöörige

 

No in dr Primeli hets könne bassiere

Ass i d Bsinnig ha könne verliere.

In dr Schuel sitz i im Schuelbangg inne,

Blötzlig höri numme no vo wytem d Stimme.

Scho schlooni dr Kopf am Noochberbangg aa.

Was isch bassiert? Ka mi nümm bsinne draa.

Dehai in dr Stuube spüüri d Wälle koo,

Leg mi drum uffe Boode, blyyb nit stoo.

D Mamme maint, i well dr Laaferi mache

Si grinst numme und foot denn afoo lache.

Aber si lütet denn doch no em Doggter aa.

Dää maint, i sotti aifach mee Kalzium haa.

I wurdi halt z gschwind in d Höchi schiesse,

Wie ne jungs Pflänzli im Frielig spriesse!

No aimool glitzt hets mi denn aber doch no;

Juscht vor dr Frisco-Baar blyybe mer stoo

Und gnaisse verstoole in d Montere yyne,

Wo die Halb-Blutte uff Hochglanz dien schyyne.

My Gspäänli und ych hän giigelet und glacht,

Denn bi n i erscht wider am Boode uffgwacht.

Hän mi ächt die baar Schiggse umghaue?

Oder solli doch em Doggter vertraue?

 

2.29.  Vorgeschtert – D Boonestange.

D Boonestange

 

I bi scho frie in d Hööchi gschosse.

Das het mi öbbedie au uusgschlosse,

Vor allem duur dr Mamme iiri Mainig,

I gang zwoor überhaupt nit dermit ainig,

Ass d Grössi s Benää ganz fescht bestimmi.

Was andri dängge, das wär s schlimmi!

Wenn d Fründyyne sin go trottinettle,

Ha n i numme nääbehär döörfe seggle.

Du grosse Stogg, das macht me nit,

Und säll loss blyybe, das goot au nit.

In dr Pfadi – wie könnts au anderscht si,

Bi n i denn als ‘d Boone’ döört derby.

Im Dram allewyyl dr Uuswyys zaige.

Das ka aim saumässig verlaide.

I ha gleert, mi dr Grössi no zverhalte,

Ass me mi für elter het könne halte.

D Erwaartige sin mer eewig voruus gsi,

Ass i nümmi gwüsst ha, wär i sotti si.

Joore hets bruucht, dää Abstand wett z mache.

Aber hütte kani numme no drüber lache.

 

2.30.  Vorgeschtert – Dr Höörlifilzer.

Dr Höörlifilzer

D Mamme sait, muesch d Hoor go schnyyde lo,

Kasch grad in Laade vom Babbe yyne go.

Ohje, wie schregglig ha n i mi noohär gfüült.

I hätt am liebschte lut uuse ghüült.

Das im Spiegel bi doch nit ych!

Dasch e Igel oder e ander Viich!

Im Schuelhof* hän si e Raige um mi gmacht.

‘Hansli’ hän s mi gruefe, derby giigelet und glacht.

 

 








*domools e raine Maitlischuel

2.31.  Vorgeschtert – E aiges Zimmer.

E aiges Zimmer

 

Unsri Woonig het numme zwai Zimmer gha;

E Schloofzimmer und e Stuube nääbedraa,

E Kuchi, e Baad und e glaine Gang,

E Kinderzimmer? Do druff waart i scho lang.

Drum bi n i ins Bett vo dr Mamme gstyge

Und Znacht hän si mi denn in d Stuube biige.

Aber je grösser und schwäärer i worde bi,

Isch es mit dääre Züglete denn verby.

Denn bi n i schloofdrungge übere gloffe

Und ha uff em Kaanebee wyter gschloofe.

Irgendwenn ha n i my aige Bett bikoo.

Das het me ins Schloofzimmer yyne doo.

S het e Umbau mit Schiebedüürli gha

Und e Käschtli für d Schuelsache drin zha.

Zwoor kai aige Zimmer, das isch mer glyych,

Aber ainewääg mys aigene glaine Ryych.

2.32.  Vorgeschtert – D Kindergranggete.

D Kindergranggete

 

Maasere, Fieber alles ha n i gha,

Blauhueschte genauso wie Angina.

Numme aini ka n i nit vergässe,

Wenn s bysst und de gratze muesch wie bsässe.

Gnau das darfsch jo nit, s wurde Naarbe blyybe,

Au wenns die duet zur Verzwyflig dryybe:

Du hesch die wilde Blootere uff Bsuech!

Sin au zimli aasteggend, dasch dr Fluech.

Numme die, wos au scho gha hän, döörfe koo

Do ha n i vo mym Guusäng Hilf bekoo:

I liig uff dr Kautsch, är sitzt vor mi hi

Är schaugglet fescht hi und häär derby

Und gwätscht mi dermit in d Küssi yyne.

Är brässt und druggt mit ärnschter Miine.

Das isch wie gratze und duet mer so guet.

I bedangg mit no hüt und lüpf dr Huet.

 

2.33.  Vorgeschtert – Die hittigi Juuged (1961) vo myner Mamme.Die hittige Juuged

D Maitli fo hitte - s isch aifach nyt,
Das maine hit die maischte Lyt -.
E Muul hän d Goofe, s duet aim gruuse,
Statt eme Pulli traage si Tinätsch-Bluuse.
Legsch aa dym Kind e Glaid nach dynere n Idee,
Dernoo behauptets gschtyff, me mach em seelisch wee.
Numme will e soone wytte Rogg mit Falde
D Figuur verschtegg und s Scheenschti welli bhalte.
Und was die reede mitenand,
Nai liebi Lyt, es isch e Schand.

Do letschti stand i uff em Clareblatz grad vor dr Schuel.
Zwei Maitli kemme uuse zlaufe, s aint sait: gang läng mer deert dr Stuel!
Do blyyb i stoo und dängg, was maint jetz das, es nääm mi wunder.
S Vehikel längst, gits denn däm Kind und sait: do hesch dy Blunder.
I bi denn richtig dääne baide hinde dry,
Ha miesse heere was si reede, ha welle sicher si.
Do gseen i wie si wyter vorne
Am Velo lytte, richtig horne.
Zwai Buebe schteen am Trottwarstai,
Die warte sicher uff die zwai.
Und richtig wie n is dänggt ha, s isch esoo,
Die Vier si geen grad mitenand dervoo.

Do laufi wyter, dängg an mi,
wo ych no bi e Maitli gsi.
So ebbis hätte mir nit gmacht,
Me hätti iber d Maitli glacht.
Jetz gsee mi wider ganz genau
Im scheene Reggli himmelblau.
Dr Peter, jo i waiss no guet,
Mer sin ins glyychi Schuelhuus gange,
Het allewyl gsait, äs stieng mer guet.
Är isch am blaue Reggli ghange.
My Frindyyn - s isch sehr e hibsches Maitli gsi.
D Buebe hän iins allewyl welle oder aifach mi.
S het fescht und sicher zuemer ghalte.
Het was em gsait ha fir sich bhalte.
Au uff em Schuelwääg simmer zämme blyybe
Und mit de Buebe hämmer d Zyt vertryybe.

Wie mängmool simmer ummegschprunge, 
Hän Liedli pfyffe oder gsunge.
Hän Verschteggis oder Balle gschpiilt
Und ebbe zue de Buebe gschiilt.
S het Baim und Madde ka no gnue.
D Lyt hän nit gsait, si haige zweeni Rue.
Uus isch s, verby, s wird nimme ko,
Die scheenschti Zyt het uns verloo.
I keer mi um, gang zrugg ans Schuelhuus fiire.
I schtand deert hi diräggt vor d Yysediire.
D Schuel isch grad uus, d Maitli kemme.
Die ainte sin gmietlig, die andere renne.
E baar geen mit Buebe, e baar geen ellai.
Und doch bin i sicher, e jedes goot hai.

Do bletzlig gheeri ganz in mir inne
Lyysligi, lutti, verschiideni Stimme,
Wo schimpfe, wo loobe, si lyyslemer s i:
Die hyttigi Juuged isch allewyl so gsi.

Elsa Corsi-Bärwart

2.34.  Vorgeschtert – Dr Mamme iire Brief .Lang bevor ych die verwandschaftlig Verbindig zum Baldi Bärwart uusegfunde ha, het au d Mamme versuecht öbbis uusezfinde. Si het e Brief an d Gmaind Rieche gschriibe:

Iir wärte Heere do vo Rieche,
Syt Joore scho bini e Wunderfitz
Gärn due n i an dr Wiise ummegrieche
und mach au hi und do e Värsli-Witz
Au d Naigig hani fescht zem glaine Basel
gnau glych wie das dr Baldi sait.
I lääs si Zyggs und dängg, das isch kai Gfasel;
Är het si Haimet-Stadt im Härze drait.
Und ebbe das isch s, wo mi stupft dr Gwunder:
Kennts nit e bitz Verwandschaft si?
Zem Dichter Bärwart? s nääm mi wunder.
I wäri sofort zha derby.
I bild mer gar nit y, i kennti dichte.,
Es goot mer ebbe nit do drum.
Doch wenn dr mer e Hiiwyys kenntet brichte,
Wie n i zue myner Antwort kumm,
So dangg Eych do zem Voruus scheen
und schryb Eych do mi Namme aane.
Dr Leedig, ass er besser gseen,
Worum i due Verwandschaft aane.
Grad wie dr Baldi Bärwart haissi,
Vo Rieche stamm i, jo das waissi.

Elsa Corsi-Bärwart 1967

2.35.  Vorgeschtert – My Guusäng zBsuech bi uns.Dr Guusäng isch männgmool bi n is gsi. Är het vyyl mee Muet gha als ych, aber i ha n en nie im Stich glo, bi allewyl mitgange. So hämmer halt denn au s Schimpfis zämme dailt. Die baar Gchichtli sin iim gwidmet.

2.35.  Vorgeschtert – My Guusäng zBsuech bi uns.

Dr Muschkopf (Dr Guusäng z Bsuech)

Dr Muschkopf

 

Waisch no uff dr Horburg-Madde?

Hän mir zwai gsandelet im Schadde.

Wo s Zyt gsi isch für hai zem Znacht,

Hesch e hölle Uffstand gmacht.

Hesch erscht mit is welle go,

Wo du s Verspräche hesch bikoo,

Ass mer wider göön grad nach em Ässe.

(D Mamme dänggt, du wurdsch s vergässe.)

Nüt isch gsi, du hesch bestande druff,

Du sigsch sunscht bis ans Lääbensändi muff.

‘Dää goot numme bis an Egge füre,

Denn stoot är grad wider vor dr Düüre’,

Dänggt d Mamme und lost di derno go.

Hinderem Vorhang güggele mir dir noo.

Wirgglig am Egge keersch wider um.

Hesch doch nit e sovyyl Mumm.

D Mamme wott scho dy Yysicht säägne,

Do saisch: ‘Muess e Schirm ha, s kunnt go räägne!’

Si het denn uffgää und miesse lache,

Drum simmer alli go ne Spaziergang mache.

 

 

2.35.  Vorgeschtert – My Guusäng zBsuech bi uns.

D Wösch (dr Guusäng uff Bsuech)

D Wösch

Do aine underem Motto ‘mitgegangen’

Was glyychvyyl haisst wie ‘mitgehangen’!

In dr Wöscherei hänggt jede Daag

Im Gaarte hinderem hoche Haag

Früsch gwäsche und blitzsuuber

D Wösche uus em grosse Zuuber.

Ob du ächt driffsch,

Wenn d öbbis wirfsch?

Das hesch welle brobiere

Und ooni lang z studiere

Hesch Drägg gno vom Boode

Und überegworfe in hochem Booge.

Denn bisch ab uff d Sogge

Und ych bi au nit blyybe hogge.

Bim Begg am andere Egge

Simmer is denn go verstegge.

Dr Mamme iiri Debbigglopfer-Macht

Het au mi – dangg dir – zum Opfer gmacht.

 

2.36.  Vorgeschtert – Ferie in Pfunge bi Unggle und Dante.

D Rutschbaan

D Rutschbaan

Uff dr Rutschbaan in dym Kindsgi,

-jo ych bi jo richtig blind gsi –

Sin verfuulti Öpfel glääge,

Bruun und verpfludderd vom Rääge.

I has nit gsee bim uffe go,

Und bi denn doobe blyybe stoo.

I ha nit im Drägg welle pfläddere,

Und schnäll wider aabe gläddere.

Du hesch mi nümme aabe glo.

Ych bi nit an dir duure ko.

Du hesch mi aifach zwunge

-ha mir gweert und mit dir grunge –

Aabe zrutsche uff däm Pflotsch.

Ych has no gmacht, ych arme Dotsch.

 

2.36.  Vorgeschtert – Ferie in Pfunge bi Unggle und Dante.

S Grogodiil

S Grogodiil

Es schneielet in Pfunge,

D Flöggli danze um is umme.

Du ziesch dr Schlitte

(ych ha sogar druff döörfe rytte ).

Mir göön wider haizue in Schärme

Uff dr Stroos mit de vyyle Laddärne.

Do schreysch: ,Lueg do hinde, bass uff!

E Grogodiil risst si Muul wyt uff,

Glabbts zue und uff und wider zue.

Ganz langsam kunnts in ainer Rue.

Äs schlyycht zue dir und frisst di!’

Vor Schregg bin i ganz gstyff gsi.

Derby isch s numme dr Schadde gsi vo aim

(emool kurz, denn lang und wider kain),

Wo under de Strosselampe gloffe isch.

2.37.  Vorgeschtert – Es kunnt e Grogodiil.

Es kunnt e Grogodiil

 

Hüffig simmer gmainsam go Kommissioone mache. So au im Winter. I waiss no guet, s isch scho stoggdunggli Nacht gsi, wo mer vom Laade haizue gloffe sin. E lange, graade Wääg vom Konsi bis haim. Alli baar Meter isch e Laddäärne gstande, wo d Stross e weeneli belüüchtet het. In dr Helfti vom Wääg drait sich dr Guusäng um und schreyt, muesch bressiere, es kunnt e Grogodiil, wo n is wott frässe! Tatsächlig Das Viich macht sy riise Muul uff und wider zue und wider uff und zue und kunnt nööcher.

Vor Schregg ha n i fascht in d Hoose brünzlet. Vyyl zspoot ha n i gmergt, ass do öbber zlaufe kunnt. Aimool vor dr Laddäärne, derno nooch dr Laddäärne. Dr Schatte vo däm Spaziergänger het gschuune wie e Muul, wo uff und zue goot.

 

 

2.37.  Vorgeschtert – Es kunnt e Grogodiil.

Dr Wandschrangg
Dr Wandschrangg

Das isch denn doch dr Gipfel gsi:

Du schliessisch mi in Wandschragg yy.

Spiilsache sin döört inne glääge

Yysebaane, Audi und anderi Wääge.

Vor luuter Angscht belämmeret

Ha n i wild an d Düüre ghämmeret.

Nüt isch gsi mit d Düür uffmache.

I ha die numme ghööre lache.

S isch gruusig dunggel gsi im Kaschte.

Ha dr Wand entlang miesse taschte.

Uff aimol spüüri e Loch in dr Muur,

Wo das aanefiert, gsee i kai Spuur.

Do isch mir e Raache-Gedangge ko:

I könnt e baar Balle döört aabelo.

Noo langer Zyt hesch mi denn uuseglo.

Ha bis hüt e kaim verzellt dervoo.

 

2.38.  Vorgeschtert – S Spiilzüügkämmerli.

S Spiilzüügkämmerli

 

I ha jo my Guusäng gliebt wie e grosse Brueder, aber är het mi sooo männggs Mool gscholle. Zue dääre Zyt hän si no in Pfunge gläbt, wo ych denn oft d Schuelferie verbrocht ha. In sym Zimmer hets e glai Kämmerli gää mit eme Metalldüürli, wo undeduure rundi Löchli gha het. Me het sich zwoor miesse bugge, aber me het eso au yyne könne. Döört sin alli syni Spiilsache versorgt worde. Wie kas au anderscht si, är het mi aimool döört yyne gsperrt und abgschlosse. I ha könne riefe und boldere wie n i ha welle, är isch aifach uus em Zimmer verschwunde. Das ha n i duur die Löchli könne gsee. Es het jo nit vyyl Liecht gha dinne, aber es het glänggt, ass i gsee ha, was alles im Kämmerli glääge isch. Audi, Bauglötzli, Stoffdierli und e baar Holzkuugele. Do ha n i in dr Muure e Loch, e Roor entdeggt. Wo das aanegfiert het, waiss i nit. Aber die Holzkuugele hän genau dry basst. So hän alli Kuugele dr Wääg in das Loch gfunde; My glaini Raach fürs Yysperre. I ha niemerem dervo verzellt. S het aifach kaini Kuggele me gha.

2.38.  Vorgeschtert – S Spiilzüügkämmerli.

S falschi Huus

S Falschi Huus

E ander Mool do hesch mi zwunge,

-au das isch no bassiert in Pfunge –

Aifach am aige Huus verby zlaufe,

Wo mer haiko sin vom Yykaufe.

I bi sicher gsi, doo miemer yyne,

Und ha derno aafange gryyne.

Du hesch behauptet, s Huus sig wyter unde.

I ha mi in Angscht und Verzwyyflig gwunde.

Do bisch du wirgglig wyter gange,

Und hesch mi vor dr Düür lo hange.

‘Loss mi nit ellai, i mach in d Hoose!’

‘Was bisch au du für e Mimoose.

S isch numme e Witz gsi; i find en toll’.

Du  lachsch dir aifach dr Buggel voll.

3.  Dasch nit unser Huus

Dasch nit unser Huus

 

Doodermit isch aber sy Hänslete nit fertig si. Mer sin zwoor scho kurz vor unserem Huus gsi, het är styff und fescht behauptet, das sig nit unser Huus, mer miesse wyterlaufe. Ellaige ha n i nit gedraut umzkeere, drum bi n i mit iim wyter gloffe. I ha n iin nit könne überzüüge, ass mer an unserem Huus scho verby gloffe sin. Erscht, wo n i  aafoo gryyne ha, het är e Yysee gha, mi dröschtet und an dr Hand zrugg zue unserem Huus gfiert. Es sig jo numme e Gschbässli gsi.

 

 

3.1.  Dasch nit unser Huus – S Guusyynli.

S Guusyynli

 

Wo die glai Guusyyne gross gnue gsi sich, hän sich em Guusäng syni Vorliebi fürs Schelle vo mir abgwändet und uff sy Schweschterli verschoobe. Vor luuter Erlychterig ha n i denn laider amme au no mitgmacht. E langi Zyt isch dr Gaischt Leo Drumpf gsi. Mer hän Gaischtergschichte erfunde, wo n i aigetlig au sälber Schiss gha ha dervor. Am Schluss bi au ych under d Deggi grutscht. Numme dr Guusäng het is no lang mit sym UHUUUUU drangsaliert.

 

 

3.2.  Dasch nit unser Huus – Uff em Velo unterwägs.

Uff em Velo unterwägs

 

Velofaare mit em Babbe do hesch mi kenne ha:

Als Glaini zerscht in dr Fuudischaale vorne draa.

Aber do hän is d Schugger glyy miesse stoppe;

I ha hinde  ins Sässeli miesse hogge.

I sigi halt zgross und das könnt gföörlig wärde.

Mer hän is d Velodiirli nit lo verdäärbe.

Wie ha n is gnosse, an sym Rugge zlääne

Und mi wie n e Vogel bim Schwääbe zwääne.

Im Rääge het är mi under d Belleryyne steggt.

Gsee ha n i nümmi vyyl, die het alles verdeggt.

Numme dr Wääg isch under em Raad duure gflitzt,

Het Greesli iberrollt und Stainli bis uffe gspritzt.

Natirlig hämmer au emool e Seppi grisse

Und derby Blätz ab gha und d Hose gschlisse.

D Mamme het das allerdings nit so toll gfunde,

Wenn mer dräggig hai koo sin vo unsre Runde.

 

3.3.  Dasch nit unser Huus – Mit em Babbe go fische.

Mit em Babbe go fische

 

Im Sässeli verpaggt hinder em Babbe sitze,

Bringt s Velo faare halt numme iin ins Schwitze.

Erscht bi de Galge simmer ab em Velo gstyge.

Zwoor deerf me nit iber s Gädderli yyne styyge,

Aber wenn niemerds uff em Galge gsi isch, wo fischt,

Simmer haimlig driber und an s Bord aabe zischt.

Dr Babbe het d Ruete in Boode yyne gsteggt

Und mir hän gmietlig uuf ere Deggi d Bai uusgstreggt.

I ha gspannt gwartet, eb denn dää Zapfe ändlig hipft

Und dr Babbe e Fischli uus em Rhy uuse lipft.

Natirlig ha n i nit vyyl deerfe due und saage

I wurd duur dr Lärm emänd d Fischli verjaage.

Mit de Stai ha n i drum numme glyyselet.

Dr Sand isch au lyyslgi duur my Siibli griiselet.

Denn ha n i wider gluegt, eb s Zepfli ändlig duet zugge:

Dr Babbe duet grad d Schnuer yyne rolle und sich bugge.

E glai Fischli zabblet verzwiiflet an sym Hooge.

Är nimmts gschwind drab und wirfts zrugg in hochem Booge.

So glaini Schnäbberli deerf me schyynts nit fange.

Statt uff dr nägscht Fang seensichtig zblange,

Ha n i mit mym Spritzkännli d Stai aafo spritze;

Ebber muess jo au die vor dr Sunne schitze.

3.4.  Dasch nit unser Huus – Em Babbe syni Fischli.

Em Babbe syni Fischli

 

Dr Babbe het e Akwarium welle ha.

S Erschte het är sälber gmacht gha.

Derzue het är e riisigi buchigi Fläsche gno.

Het dääre dr Hals abghaue und Wasser yyne gloo.

Jetz hän numme die faarbige Fischli gfäält.

In dr Dierhandlig het är denn e baari uusgwäält.

Denn isch är säälig vor dr Fläsche gsässe

Und het ene zuegluegt, wie si wie bsässe

Rundi um Rundi drüllt hän ooni Ändi.

Doch die Gschicht nimmt e andri Wändi:

D Fläsche hets in duusig Schäärbe verjaggt

Und in de Pfütze hän sich d Fischli gjaggt.

Do muess halt e richtigs Akwarium aane’.

Het dr Babbe gmaint und afoo blaane.

Dissmool het är Stainli und Pflänzli yyne do.

Und scho isch är mit noie Fischli haimeko.

S isch e Vergniege zum Zueluege gsi,

Aber jeede Daag isch ains weeniger derby.

Zspoot hämmer gmergt, ass aine vo dääne

Ain um dr ander frisst ooni ai Drääne!

Doodermit het dr Babbe druff verzichtet

Und sich grad uff e nois Hobby yygrichtet.

3.5.  Dasch nit unser Huus – Mit em Babbe duur d Wälder striele.

Mit em Babbe duur d Wälder striele

 

Wie männgmool simmer zämme duur d Wälder gstrielt.

Do und döört het är sich buggt und im Boode gwielt;

Scho het är e Verschtainrig in de Finger kaa.

I ha natürlig e grossi Freud gha draa.

Mer hän gar männgs zämme gfunde;

E Aidegsli oder e Schnägg, e runde.

Mer sin fascht mit dr Naase em Boode noo.

Kai Wunder hämmer so dr Wääg verloo

Und kai Aanig me kaa, wo mer könnte si.

Aber graad denn kunnt e Gränzwärter verby.

Mer sin aimool mee im Usland glandet

Und nootgedrunge im Zollhüüsli gstrandet.

Dr Babbe hän si kontrolliert bis uff d Hut

Uuszie het är sich miesse, fudiblutt!

Ob är schmugglet, hän si wüsse welle!

Wenn mir zwai das wirgligg hätte welle,

Hätt jo ych öbbis uff mer könne haa.

Aber mi längt jo schliesslig kaine aa.

Aimool ins Baadisch, s ander Mool ins Elsass;

D Straifzüüg mit em Babbe sin e Haideschpass.

3.6.  Dasch nit unser Huus – Dootekopf und Speerspitz.

Dootekopf und Speerspitz

 

Dr Babbe het eppedie gspässigs Zyygs haime brocht

Und d Mamme häts am Liebschte grad in Kiibel verlocht.

E Unterkiifer vo dr Uusgrabig uff dr Pfalz

Isch langi Zyt sy greeschte Schatz und Stolz, denn iim gfallts.

Aer het e Naase gha fir so Kuriooses z finde,

Sigs e verstainerete Schnägg bin ere Linde,

E Stägge bim Grämpler, wo är als Dääge erkennt.

No alte Sääbel und Bischtoole isch är noochgrennt.

Noodisnoo isch d Stuube fascht zem Museum worde,

Vyyli Sache het är afoo sammle und hoorte.

Aimool bringt är vom Gänggerle e Dootekopf hai.

Dää het is zwoor gruust, aber är sig numme uus Stai.

Do ych jo Znacht in dr Stuube ha schloofe welle,

Het en d Mamme in Kaschte yyne miesse stelle.

Denn het är uff ere Baustell eppis miesse nää;

Eppis Lengligs, Dräggigs; was het ächtsch das solle gää?

E Pfyylspitz uus Reemerzyt: isch är iberzygt gsi.

S Abstaube vo däm unneetige Glumps sig verby:

Maint d Mamme und het denn ändlig gheerig proteschtiert!

Do isch dr Babbe dermit ins Museum marschiert.

Aber oha lätz! Die hän das Stigg grad konfisziert.

Aer het rächt bhalte und sich eppe gar nit trumpiert:

Dää Speerspitz uus vorgristliger Zyt hän s em gnoo,

Und gschumpfe mit iim, werum är nit scho friener sig koo.

Me kenni halt nimmi graabe, e Huus stoot jetz deert.

Im e Gschichtsbuech hän s en denn doch no als Finder geert.

3.7.  Dasch nit unser Huus – Mit em Drämmli uff Aesch.

Mit em Drämmli uff Aesch

D Uusflüüg hämmer mit em Velo oder Drämmli gmacht;

Mit em Elfer uff Äsch und em Ruggsagg als Fracht.

I bi hailloos froo gsi, het s Dram d Düüre offe gloo;

Bim ’Faare’ ha n i  drum allewyl Buuchwee bikoo.

I ha dr früsch Wind bruucht, wo mer um d Naase ka waie,

Suscht hät i bigoscht no aafoo spoie und graie

Vo dr Ändstazioon simmer duur s Baselbiet zooge.

Hän natürlig do und döört noonem Wääg miesse frooge,

Denn dr Babbe het dr Wääg allewyl sälber gsuecht

Und wemmer is verirrt hän, het är denn drüber gfluecht.

Är het gärn d Wanderwääg verloo; dasch kaibe glatt gsi,

E Blätzab an de Gnüü isch denn halt au derby.

Mied, dräggig und mit Löcher in de Strümpf simmer hai.

Scho vo wytem höör i vo dr Mamme iir ’oh nai!’

3.8.  Dasch nit unser Huus – Dr Fryyburgerhof.

Dr Fryyburgerhof

 

Männgmool wemmer vo dr Wiise uff e Haiwääg sin,

Het dr Babbe gmaint, ‘s ligi doch noone Yykeer drin’.

Schliesslig liggt dr Fryyburgerhof grad diräggt am Wääg.

Und noohäär isch är sowisoo no vyyl besser zwääg!

Dr Babbe het sy Bier im e Ruugeli gnoo

Und ych ha allewyl e feine Sirup bikoo.

Mer sin im Gaarte im Schadde vo de Boim gsässe.

Do ha n i amme e feine Bierring döörfe ässe.

S Gröscht isch aber gsi, wenn i am Samschtigzoobe

Mit ha döörfe, wenn d Eltere döört sin go schwoofe.

Muusig, e Schiessbuude und e grossi Tombola!

Sisch gsi, als fangi grad d Herbschtmäss aa.

Und wenn i denn ha döörfe go Löösli kaufe

Und au no mit eme Gwünn zrugg an Disch könne laufe,

Het soone Summeroobe nit schöner könne si.

Pryyse hets kai bsundrigi gää, dasch nit wichtig gsi;

Öb Röschtiraffle, Teesiib oder Bluemedopf,

Guufeküssi oder Hoorlätsch für uff e Kopf.

Hauptsach s het e Nummere uff däm Löösli gha

Und mir hän öbbis Gwunnes zum Haidraage gha.

Dr Babbe het dr Mamme no e Bliemli gschosse.

Die Fryyburgerhof-Ööbe ha n i allewyl hailloos gnosse.

3.9.  Dasch nit unser Huus – My Babbe bloost Glaas.

My Babbe bloost Glaas

 

Isch guet muess är das nimm erlääbe:

Sy Bruef suechti är hit vergääbe.

Är het no richtig Glaas bloose gleert

Är het sy Bruef gliebt und au vereert.

Was in de Laboor kaputt gange isch,

Landet zem Fligge denn uff sym Disch.

Reagänzgleesli, Kolbe und Fläsche;

Hoffetlig isch au alles suuber gwäsche,

Suscht gnallts iber dr offene Flamme.

Das het s drum laider au gää amme.

Het är e weeneli Zyt ibrig gha,

Isch är an kunschtvolli Sache draa:

Basilisgg, Stäärne, Vääsli uus Glaas.

Wunderscheeni Sache, jo är kaa s.

Sy Schachspiil uus Glaas, wie ha n i s gliebt.

Vyyl isch verbroche, drum bi n i betriebt.

Was bliibe n isch, due n i sorgsam heege

Und als Aadängge in e Vitrine leege.

3.10.  Dasch nit unser Huus – Für d Mamme go kommele.

Für d Mamme go kommele

 

Langi Zyt ischs my Uffgoob gsi, in Konsi zlaufe

Und für d Mamme mit em Zeedel go yykaufe.

Dr Zeedel ha n i am Laadetisch em Frollain gää.

Die paggt s Züüg in e Gugge, wo n i denn ha döörfe nää.

D Mamme het domools no miesse aaschryybe loo,

Drum ha n i fürs Kommele gar kai Gäld mitgnoo.

I ha lang miesse waarte bis i draa koo bi,

Derby wäär d Raie scho lengscht an miir gsi.

S Frollain het lieber zerscht die Erwagsene bedient

Und mii het me allewyl wider hindere gfiengt.

Als Goof isch es besser, wenn d aifach still bisch.

So ischs bassiert, ass mer d Mamme entgeege koo isch;

Wietig und mit em Deppigglopfer in dr Hand.

‘Wo hesch du ummeduudelet, sisch allerhand!

Dr Babbe isch scho dehai, i muess doch koche!’

Soo phyynlig, am liebschte wäri in Boode groche.

‘I kaa nüt derfür, si het mi aifach nit draa gnoo!’

Si hets verstande, ‘S isch guet, jetz könne mer jo goo’.

Männgs Joor schpöter - ha e Bsuech gmacht bi dr Mamme -,

Bi n i für si go kommele wie friener amme.

Sisch no dr glyych Konsi gsi, aber ooni Laadedisch.

Sälbschtbedienig, wie s hüt überall in Moode isch.

Am andere Daag bi n i wider aane gange.

Do isch bigoscht e Schild an dr Kasse ghange:

‘Do kame nit aaschryybe loo!’ Dää Spruch het droffe,

Als wääri diräggt in e Gläbbergässli gloffe.

I waiss nit, öb das Schild für mii döört isch ghange,

Für mii hets glängt, i bi niemee in dää Laade gange.

3.11.  Dasch nit unser Huus – D Muschti.

D Muschti

 

Domools isch dr grossi Frieligsaaloos d Muschti gsi.

Au myni Eltere sin gäärn zum Schnoigge döört hi.

Für mi wärs Ummetschienge z langwyylig worde,

Drum häns mi im Hietedienscht abgää scho am Morge.

Si sin denn go flaniere in dr noischte Frieligsmoode;

D Mamme mit Händschli und schigg noo alle Noote,

Dr Babbe in dr neuschte Schaale mit Grawadde.

Si hän alles aagluegt, au uff dr Roosedalmadde.

Hänggebliibe sin si denn in dr Deguschtazioon.

Das het drzue ghöört als hailigi Tradizioon.

In dääre Zyt ha n i döörfe mit andere Kinder schpiile.

Bim Znüni ha n i numme könne übereschiile;

Si het mi zwoor gfrogt, öb i au öbbis welli haa.

Verlääge ha n i gmaint: ‘nai, nai, i muess nüt haa.’

Denn isch d Trudi Gärschter koo go n is Määrli verzelle!

Au do bi n i dusse bliibe und ha nit yyne welle.

Drby isch si noonemool uusekoo, go mi frooge.

Was macht me, wenn aim d Hemmige so dien blooge?

3.12.  Dasch nit unser Huus – S Deelifoon.

S Deelifoon

 

Deelifoon, Händy und Co. gheere hit zem Lääbe,

Ooni wär s Lääbe doch aifach dernääbe.

Friener hets bi uns kai Deelifoon gää.

S isch nit aifach gsi, mit Lyt Verbindig uffznää.

My Mamme und iiri Schweschter hän sich hyffig droffe;

Zem Saage WO und WENN, bi ych zer Deelifoonkabine gloffe,

Wo n i dr Mamme iiri Noochricht ha miesse duuregää.

(Bi dr Dante hets  scho soone Deelifoon gää)

Zerscht ha n i e  Zwanzgerli deert in Schlitz abegloo.

Ha mi Finger in d Wäälschyybe druggt und dernoo

D Zaale yyne drillt, wo n i vom e Zeedel abglääse ha.

Ha nie nyt verstande, wenn i e Stimm gheert ha,

Ha aber braav dr Mamme iir Sprichli aabeglyyrt,

Denn uffghängt und e grossi Erlichterig gspyyrt.

Do isch aimool ebbis unagnääms passiert,

I ha mi bim Deelifooniere haillos blamiert.

E Stimm sait: ‘I bi nit dy Dante, hesch di verwäält!’

Heerje, i ha die falschi Nummere gwäält!

S Zwanzgerli isch aber nimmi uuseko,

Ha ooni Batze wider hai miesse go.

Deelifooniere isch langi Zyt my Schregge bliibe

Und dää het syni aigene Bliete driibe.

Ka NYT verstoo, woni niemerds ka GSEE.

Mitenand perseenlig reede, bringt halt vyyl mee.

3.13.  Dasch nit unser Huus – S Aabee-Bapyyr.

S Aabee-Bapyyr

 

Wenn de uff e Abdritt aabe bisch

Und grad no s Bapyyr z Änd gange n isch,

Denn hesch em Babbe sy Zytig gnutzt

Und dermit dy Fuudi suuber butzt.

Dr schlimmscht Ängbass hets gää,

Wenn d s Delifonbuech hesch miesse nää.

Do hesch di am Nämme lääse vergniegt,

Aber s Fuudi hesch nit suuber griegt.

My Frindyyn dailt die Erfaarig mit mir,

Si het s im Winter aber besser gha derfir.

Im Lääbesmiddellaade vo iirem Babbe

Het si d Orangschebapyyrli könne schnabbe.

Die het si denn uff em Aabee baraad glegt;

Die sin waich gsi und hän erscht no fein gschmeggt.

3.14.  Dasch nit unser Huus – D Frieligsputzete.

D Frieligsputzete

 

Drey Dääg het dää Uusnaamezuestand könne duure.

Und do hän au alli miesse hälfe und spuure;

D Mööbel vom ainte ins ander Zimmer spediere,

Matrazze uff d Terrasse in d Sunne buggsiere,

Drum pfuus i in ere Deggbettwulgge uff em Bargett.

Das isch vyyl luschtiger als im aigene Bett.

Denn wäärde d Fänschter butzt und wider drogge griibe;

Wenn d Sunne dryyschyynt, kasch emänd eewig ryybe.

Mit Butzlümpe fääge und mit Wasser ummepfläddere;

Und mir Goofe dien uff de Bolschter ummegläddere.

Für uns e riise Blausch, aber e Grampf für d Mamme.

No lang kai Zyt zum Ruie und d Greft lo erlaame.

S Bargett spööne, wie uff em Trotti jeedes Läddli!

Häll mien si wäärde und ooni ai ainzig Fläggli.

Denn dr Boode bloche und wiggse bis är glänze duet.

Nüt döörf uusgloo wäärde, nit die munzigschti Nuet.

Mit em Strupfer riiblisch über dr Kuchiboode.

Rutsch nit uus, sunsch liggsch denn no sälber flach am Boode.

D Käschte uuse ruume und d Schäft wider uusglaide

Mit bliemletem, gwagstem Schranggbapyyr – zum Verlaide!

Mit em Räschte het d Mamme denn d Schuelheft yybunde.

Das isch e Muess gsi, i has zwoor gar nit so toll gfunde.

 

3.15.  Dasch nit unser Huus – Fisch, Vögel, Hund, Katz, Hamschter, Meerseuli.

Huusdierli

 

My Fründyyn het e gruuslets Meerseuli ka,

Natürlig ha nni au ains welle ha.

Myns isch glatthoorig  gsi und digg.

Has dorum nit könne nää am Gnigg.

I ha d Freud schnäll verloore gha,

An däm faisse Ding mit Oore dra.

Em Dierparg in dr Lange han is überloo.

Die hän s denn in iiri Obhuet übernoo.

Dr Babbe het fürs Akwarium Fischli welle.

Är het verschideni Aarte könne bstelle.

Aber aine isch zimli gfrässig gsi:

Jede Daag isch ain weniger derby.

Drum gits bi uns gar kaini Fisch.

Högschtens Fischstäbli uff em Disch.

Dr Mamme sin Vögel lieber gsi,

Natürlig muess es e Bäärli si.

Si het bim Briete s Lääbe glo.

Är isch denn glyy ab und dervoo.

S Katzebuusi hämmer alli gliebt.

Mer hän ‘Pföötli gää’ mit em giebt.

S het schnurrle könne und au gratze

Und stämpferle mit de waiche  Datze.

Blötzlig hämmer mit em zum Doggter miesse;

Vergiftets Fuedder het äs miesse biesse.

Äs isch vyyl zfrie in Katzehimmel.

Als Grönig in däm Diergewimmel

Kunnt dr Blacky, e glaine Hund.

Dää hämmer numme ka e baar Stund:

Es sig e Maitli, das het nit gstumme.

Alles isch glooge gsi und mir die Dumme.

Glai blybe, wär är sowiesoo nit.

S wurdi e riisige Hund, was für e Hit.

Gschlage worde isch dää armi Käärli.

Für mi isch es bliibe e druurigs Määrli.

Huusdierli hämmer denn kaini mee ka.

Erscht vyyl spöter, i dängg männgmool draa,

Hämmer em Babbe e Hamschter gschänggt.

Aber e kains vo uns het draa dänggt,

Ass d Mamme d Fänschter off loot über d Nacht.

D Kelti het däm arme Dierli dr Garuus gmacht.

Spöter han ych e Katz gha und e Hund.

Das duet dr Seel guet und bhaltet si  gsund.

3.17.  Dasch nit unser Huus – No Ääli haische.

No Ääli haische

 

Uns het me nit ghätschlet wie d Goofe hüt.

E Mutzeli, wenn d goosch und ains Zoobe im Bett!

Kai bybääpele, dätschle, aifach nüt.

So ischs no vyyle gange, i mach e Wett!

 

 

Hets emool e baar Dröpfli Rääge gää

Hämmer do, ass wurdis Katze haagle.

Do hämmer  is s Gaudi nit loo nää,

Unsri Köpf im Käänelwasser z baade.

Schlotternd und pflätternass simmer denn hai.

Eso hämmer denn unsri Ääli erzwunge:

Mer hän is gfüült wie no ganz glai

Denn es isch is doodermit glunge,

E bsundrigi Acht vo dr Mamme zgwünne

‘Oh je du arms, kumm, i droggne di ab.

S Wasser duet jo uus de Hoor uuse rünne!

Am beschte, du ziesch di diffig ab,

Gumpsch ins Bytschaama und ab ins Näschtli.

I bring dr no schnäll e haisse Gaggo

Und dr Zwyybagg stell i dir uffs Käschtli.’

Mit sottigi Ääli hän au mir s uns wool lo go.

3.18.  Dasch nit unser Huus – S Määrggli sammle.

S Määrggli sammle

 

D Määrggli sin unghüür nützlig für my Mamme gsi.

Si het se gsammlet vom Ligalaade und em Konsi.

Me het se in e Biechli miesse yyneglääbe;

Ins leeri Fäld hän si miesse, jo nit dernääbe.

D Mamme het gluegt, ass is jo richtig mache due,

I ha riisig dr Blausch draa gha und si iiri Rue.

D Määrggli ha n i abschläggt mit em Spoiz vo dr Zunge,

Das schmeggt so siesslig, aifach e weeneli glunge.

Aber schliesslig mien si fescht druff glääbe blyybe;

My Spuggi schmeggt uff aimool siess wie döörti Fyyge.

Für e volls Biechli hets denn e baar Batze gää.

Dasch jo s Zyyl gsi, das het sich d Mamme nit loo nää.

Letschtlig het is das männgmool über d Runde glängt.

Und het dr Mamme d Sorge e weeneli verdrängt.

Si het halt jede Batze zwaimool miesse drülle,

Damit si unsri Müüler mit Zässe het könne fülle.

Si het erscht Joore schpöter afoo verzelle,

Si haig für mi allewyl e Bäbbli könne aanestelle,

Sii zwai haige numme ai Zigi könne daile.

D Zyt het denn au die Noot glyy könne haile.

3.19.  Dasch nit unser Huus – Dr Mamme iiri Naimaschine.

Dr Mamme iiri Naimaschine

 

Uff flissigi und flinggi Händ het me domools gschwoore.

E grosses Glügg, bisch mit däm Gschigg scho geboore.

Mit ere Naimaschine im Huus, hesch Gäld könne spaare.

Hesch für noii Lyyndiecher nit in d Stadt miesse faare;

In dr Middi abgwetzti Diecher het me könne ‘keere’.

Das het me in dr Schuel in dr Handi scho miesse leere.

Vorhäng sälber naie, das isch überhaupt e kai Froog gsi.

Au s Löcher wiffle in Gschirr- und Naasdiechli isch derby.

D Mamme isch scho glyy zue nere alte Naimaschine koo:

E schwäärs Gussyysegstell stoot blötzlig in dr Kuchi doo.

Zerscht hesch em Raad e zümpftige Schupf miesse gää

Denn haissts drampe bis die alt Singer foot aa Faart uffnää.

Uff dääre alte Maschine het si nit numme gfliggt;

Si het Glaidli aafoo naie, do drin isch si au gschiggt.

Wo si vo dr Schweschter e ELNA het könne übernää,

Hets au Junte uus Syyde und Blüüsli derzue gää.

Das isch kai Gygampfi mee gsi; die het e Büügel gha;

An Stroom und mit em Gnoi dää Büügel schiebe, scho goot si aa.

Mit dr Mamme als Vorbild ha au ych mir s Naie bybrocht

Und e männgi Stund mit naie und uffmache verbrocht

Dorum ha n i vo myner erschte Grati e Bernina kauft,

Ha gnait und gstiggt und si lauft no hüt und lauft und lauft.

3.20.  Dasch nit unser Huus – D Pfandy.

D Pfandy

 

Wägere  Leeri im Boorpmenee kasch zer Pfandy go.

Do hesch fir ebbis vo Wäärt e Batze bekoo.

Das hesch denn wider uusleese kenne,

Wenn de nimmi hesch miesse d Batze glemme.

Maischtens het d Mamme kenne aaschryybe lo,

Drum hets Gäld noonem Zaaldaag nyt fiirig glo.

S verdleente Gäld het au no miesse zrugg zaalt wärde.

Kai Wunder steen d Sorge bletzlig vor aim wie Bärge.

In dr Noot het d Mamme zer Pfandy miesse go.

Deert het si d Naimaschine oder dr Eering hinderloo.

Dää Wääg het si männgmool miesse nää,

Damit s dehai ebbis z Ässe het kenne gää.

S isch lang syterhäär, mir kenne si nimm die Noot

S zaigt is aber dytlig, ass es allewyl wyter goot.

3.21.  Dasch nit unser Huus – Dr Wöschdaag.

Dr Wöschdaag

 

Dr Frytig isch dr Wöschdaag gsi vo dr Mamme.

I ha in d  Wöschkuchi döörfe go luege amme.

Zerscht het si Schyttli in Oofe byyge miesse,

Aazünde und denn s Düürli fescht verschliesse.

Vorgwäsche worde isch uff em Wäschbrätt im Droog,

Natürlig vo Hand mit Saifi griibled, dasch kai Froog!

Im Kupferkessel het si d Wösch denn lo siede.

Mit dr Kelle die schwäri Wösch drüllt ooni zmiede.

Denn im Zuuber schwängge, dernoo in d Schwingi drugge.

E soone Grampf ooni mit dr Wimpere z zugge!

D Schwingi nit uuslaufe loo, s bruucht zvyyl Zyt.

Mit Schurz und Händ ischs schnäller sowyt.

Dernoo alles in d Zaine yynebyyge

Und dermit d Stääge in Hof uffestyyge.

Zerscht muesch no d Wöschlaine fääge,

Suscht blybt d Wösch am Drägg no glääbe.

Dr Glämmerlisagg hangt an dr Laine draa.

Jetz fangt s Bugge, Uffhängge, Bugge aa.

Denn hoffsch, es kämi jo kai Rääge,

Suscht wär dää ganzi Gnoorz vergääbe.

Isch alles guet und d Wösch ändlig drogge,

Ka si nit bim Käffele blyybe hogge.

Aabe raiffle und d Wösch in d Zaine due.

Dr Glettimaa wartet, dää git no kai Rue.

Mit Ermelbrättli und em Glettyyse

Muess si sich  no bim Glette bewyyse.

Zimli uff de Wegge loggt s Bett mit Macht,

Doch jetz will dr Babbe zerscht no sy Znacht.

3.22.  Dasch nit unser Huus – Dr Koolekäller.

Dr Koolekäller

 

Deert, wo n i myni Kinderdaag verbrocht ha,

Het me no allewyl Ööfe zem Haize gha.

Dää im Schloofzimmer hämer uusegnoo;

Zem gsund Schloofe sig d Luft besser soo.

Nääb em Kuchihärd hets e Oofe gha;

Und au aine in dr Stuube nääbedraa.

Im Herbscht isch dr Holz- und Koolewaage koo;

Sprisse und Brikett hän si in Käller aabe doo.

D Schytli hän si aifach uff e Boode gleert.

Mir hän si denn byygelet wie sichs gheert.

Uffedrait het me d Schytli in ere Zaine

Und im Kessel d Koole vo de glaine,

D Brikett, yypaggt im Zytigsbapyyr:

In Oofe byyge und glyy hesch e Fyyr.

D Mamme het au Sprisse gnoo amme.

Au das git gschwind e tolli Flamme.

Holz hoole ha n i nit miesse mache,

Das sige für mi doch zschwääri Sache.

Im Summer het sich dää Käller gwandlet

Und in e Dunggelkammere verwandlet.

Dr Babbe het mit Begaischterig und Fyyr

Fotene entwiggled und beliechted uff Bapyyr.

3.23.  Dasch nit unser Huus – Wenn de z Basel in d Schuel gosch.

Wenn de z Basel in d Schuel gosch

 

Zerscht wirsch drey Joor in d Häfelischuel yyne gsteggt.

Do wird d Freud am Spiile, Moole und Zaichne gweggt.

Mieterle, Dittele und au Liedli singe

Und im Gaarte go hüpfe und ummespringe.

 

Denn wird’s aber ärnscht, du kunsch in die erschti Glass.

Leersch s A B C, e jede Buechstaabe nach Maass.

D Gryyde gratzt und quiitscht über d Schiiferdaafele.

Jetz haissts leere, s isch verby mit em Laafere.

 

Die zwait, dritti und vierti sin im Nu verby.

Jetz kasch rächne und lääse und luegsch gscheiter dry.

E Schuelwägsel stoot aa, wo fiert dää di aane?

E Entschaid, zum s Lääbe besser könne blaane.

 

Ob in d Segg, Röll oder Gymmi, d Schuel goot wyter.

D Eltere hän d Röll gwäält; dää Schuelwääg isch schyter.

Z Fuess muess en laufe, vier Mool am Daag.

Das haltet mi fit und i blyyb uff Draab.

 

Au die vier Joor sin wie dr Wind verflooge.

Denn ha nni dr Bruefsberooter miesse  frooge.

S Ergäbnis isch glaar, i bi denn in d Handelsfach.

Uusser em Französisch liebi döört jedes Fach.

 

An aim Fach bin i au noohär hange blybe:

Mit em Singe im Koor ha n i d Zyt vertriibe.

In dr Theodors-Kiche e Wienachtskonzäärt;

S git e Blatteuffnaam, die loose ischs wäärt.

 

Denn hets mi paggt im Goschpelkoor go singe

Do hesch di au im Rhythmus könne schwinge.

Aimool hämmer e prominänte Gascht könne ha;

Der Chester Gill in Person als Vorsänger-Maa.

 

3.24.  Dasch nit unser Huus – Dr Dannebaum.

Dr Dannebaum

 

S het allewyl e Grosse miesse si.

Maichtens isch es e Rotdanne gsi.

Vom Boode bis an d Deggi isch är gange.

D Mamme het en denn wienächtlig behange.

Süüferlig het si d Kuugele uusegno.

Dr silbrig Spitz het si als erschts uffe do,

Denn ai Kuugele no der andere.

Männgsmool isch dr Baum farbig gsi.

E ander Joor het är miesse silbrig si.

Die wysse Keerzli hän nit döörfe fääle

Und au nit d Schoggeli zum d Escht beschwääre.

Die sin allewyl zimli schnäll verschwunde.

Högschtens d Bapyyrli hesch am Baum no gfunde.

Am Änd het d Mamme no Ängelhoor verdailt.

Vo däm Fiirlifanz bi n i syterhäär ghailt!

Das Züüg het aim glyy eländ afoo bisse.

Au s goldig Gschänggbapyyr het aim fascht gschlisse.

D Huutritze sin volle Goldbröösmeli.

Findsch dervo au in Hoose und Hemmeli.

Zerscht wird aber ‘o du Fröligi’ gsunge,

Denn isch äntlig au ‘stilli Nacht’ verklunge.

Derby hesch scho lang under s Boimli gschilt.

Wie lang wird denn no d Muusig gschpilt?

Denn goots los, döörfsch sueche, wo dy Namme stoot.

Do isch ains, griegsch haissi Bagge und wirsch root.

S het so vyyli schööni Sache für di gää

S Ditti vom Grischtkind döörfsch denn ins Bett mitnää.

3.25.  Dasch nit unser Huus – Wäärend dr Rölleli.

Wäärend dr Rölleli

 

Als jungi Maitli hän au mir Saich könne mache

Und is denn kuugeled vor luter Lache.

Äntwäder simmer um dr Brunnerand ghange,

Hän aifach yynegstiert und s isch nit lang gange,

Het dr Wunderfitz d Lüt au lo yynegaffe

Bis sis denn ändlig au hän miesse raffe,

Ass si uns herrlig uff e Lyym groche sin.

Es isch jo numme Wasser im Brunne drin.

Mer hän au numme miesse zämmestoo

Naime uffeluege und scho sin vyyli ko.

Wenn dr Gwunder d Lüt deraart stupfe ka,

Wärde Schieler eewig so Stüggli baraad ha.

3.26.  Dasch nit unser Huus – Wiehnacht doozmool.

Wiehnacht doozmool

 

Am Hailige Oobe hets männgs Mool Lämbbe gää.

Undrem Dannebaum hän si sichs denn nit lo nää,

Im Kerzeschyyn ‘oh du fröhliche’ go  zsinge.

I ha blanggt, was mer s Grischtkindli ächt könnt bringe,

Und ha verdrängt, was für e Stimmig grad gsi isch;

Schliesslig sitzt jetz jo au no d Grossmamme am Disch.

D Missdöön sin blybe und nit so schnäll verflooge.

Bi froo gsi um d Stilli, ha nüt draue frooge.

D Mamme het  iiri Schwigermueter nit welle ha

Und dr Babbe het natürlig e Wuet uff syni gha.

Worum aigetlig hän baidi nit könne saage.

Irgendwenn hän si sich au wider verdraage.

Wemmer zur Dante sin, ischs halt am schönschte gsi,

Mit Unggle, em Guusäng und Guusynli derby.

Denn isch e Pause gsi mit em Händle vo dehai

Und ych bi glügglig gsi und ändlig nit ellai.

Numme blööd, wenn em Babbe d Gutzi guet schmegge,

Wo d  Dante grad früsch uff e Disch duet degge.

No bevor mer dehai sin, hööri scho wies gracht.

Sovyyl zu unsrer hailige Wiehnachts-Nacht.

3.27.  Dasch nit unser Huus – Dr Hailig Oobe.

Dr Hailig Oobe

S Fescht vo dr Liebi! Komisch, bi uns dehai hets allewyl am Hailig Oobe Lämbbe gää. Worums gange isch, waiss i aigetlig nit. Noodäm sich denn alli beruigt hän, het me Znacht gässe. Maischtens isch zur Bschäärig aini vo de Grossmiettere uff Bsuech ko. D Stuube isch scho syt em Noomidaag für mi gschlosse gsi. Männgmool isch dr Babbe an däm Noomidaag mit mir in sy Stammbaiz go keegle, damit mer uns d Waartezyt hän könne verküürze und do dermit au d Lämbbe vergässe gange sin.

Duur die gwälleleti Glaasdüür für in d Stuube ha n i denn scho könne yyne güggele, wenn langsam ai Kerzli noo nem andere aagange isch. Und ändlig het s Glöggli glütte und mer hän alli yyne döörfe. Aber bevor me het döörfe Päggli uuspagge, hämmer brav ’Stille Nacht’ und ’Oh du fröhliche’ miesse singe.

 

 

3.28.  Dasch nit unser Huus – Dr Wiehnachtsmorge.

Dr Wiehnachtsmorge

I ha jo uff dr Kautsch in dr Stuube gschloofe, also aigetlig underem Dannebaum. Dr Wiehnachtsmorge isch für mi s Gröschte gsi. I ha alli Päggli, wo me am Hailig Oobe zwoor uuspaggt het, aber derno wider schön verpaggt het, noonemool uuspaggt und für mi ellai die Gschänggli gnosse und mi dra gfreud. Mamme und Babbe hän sowisoo lang pfuust und uusgschloofe, drum het dää Morge mir ellai ghöört. Als nägschts ha n i mit em Grippli und de Figuure ganzi Gschichtli gspiilt.

Ass derno fascht alli Baumschoggeli gfäält hän… isch e Nääbeerschyynig gsi.

3.29.  Dasch nit unser Huus – S Wienachtsgschängg.

S Wienachtsgschängg

 

My Draum wäär die Jagge mit dr Kapuze draa.

Öbbis, wo sich my Babbe halt nit laischte kaa.

I ha dorum my Wunsch miesse aabeschlugge

Und haimlig e baar haissi Dräänli verrdugge.

Drum ha n i aifach über die Kapuze glacht,

Dermit sich d Mamme kai Gwüsse drüber macht.

Was pagg i an dr Wienacht für e Gschänggli uus?

My haiss ersäänti Draumjagge, aber oh Gruus!

Ooni Kapuze, mit eme aagstriggte Graage.

‘Guet hesch mer gsait, welsch kai Kapuze draage!

Ha si grad no rächzitig könne umtusche.’

Het si dr Schadde über my Gsicht gsee husche?

Wenn ains maint z wüsse, was s ander dänggt,

Und dermit hoffnigsloos d Wooret verdränggt.

3.30.  Dasch nit unser Huus – E Wiehnachtswunsch.

E Wiehnachtswunsch

Sälli Zyt sin grad die gstebbte Jagge in Moode ko. Langi Jagge mit ere pelzverbrämte Kapuze dra. Das isch my Droimli gsi, aber i ha gwüsst, ass d Eltere sich das nit könne laischte. Drum ha n i die Jagge, wemmer si uff dr Stross gsee hän, afoo miis mache, vo wäge Kapuze und so. Was ligt am Hailig Oobe underem Dannebaum? Soone gstebbti Jagge, aber ooni Kapuze, derfür mit eme gstriggte Graage dra. I ha gschluggt und grad no ghöört wo d Mamme bedoont, si sigi froh gsi, wo n i iire gsait haigg, ass i die Kapuze blööd find. Si haig die scho kaufti Jagge grad no könne umdusche…. Aimool mee ha n i ynne n aabe ghüült.

 

 

3.31.  Dasch nit unser Huus – Dr Ohwie.

Dr Ohwie

Vyyli Joor spöter, wo n i beraits e Fründ gha ha, isch s Stille Nacht, hailige Nacht-Singe ai für alli Mool verby gsi. Är het is nämli dr Witz vom Ohwie verzellt: d Kinder hän in dr Schuel miesse e Wiehnachtszaichnig mache. Am Schluss het dr Leerer d Zaichnige yygsammlet und jeedes ainzelne Bild dr Glass zaigt. So au s Bild vom Fritzli. Do het me dr Stall könne gsee, d Maria, dr Josef, dr Ogs und Eesel und unte am Rand isch e Gsicht zgsee gsi, wo schallend glacht het. Dr Leerer het verwunderet gfrogt, wär das denn solli darstelle. Do het dr Fritzli gmaint: das isch dängg dr Ohwie. Es haisst doch im Liedli Stille Nacht, hailige Nacht in dr zwaite Stroofe‘: …Gottes Soon, Oh wie lacht ….

 

3.32.  Dasch nit unser Huus – My Pinguin.

My Pinguin

I bi zwoor scho e weeneli uus em Stoffdierli-Alter dusse gsi. Do het mir dr Babbe vo sym Keegeldräffe vo n ere Tombola e Stoffpinguin haibrocht. I ha e riise Fred dra gha und das Dierli ghärzt und druggt und ummegschlaift, ass wärs e Huusdierli. E baar Daag spöter isch my Gotte uff Bsuech ko mit iirem Soon – e Guusäng, wo n i aigetlig nit guet kennt ha und noohär au niemee gsee ha. Mer hän dää Noomidaag mit spiile verbrocht und wo si sich zum Go verabschidet hän, sait d Mamme: ‘Du kasch dää Pinguin mitnää, äs schänggt en diir gäärn!’ – I ha d Wält nümmi verstande, aber nit getraut mi dergeege uffzlääne. Ass woolerzogeni Dochter ha n i kai Wort gsait, aifach ynne n aabe ghüült.

 

3.33.  Dasch nit unser Huus – Feriekolonie uff em Hogge.

Feriekolonie uff em Hogge

 

Schregglig sin die Ferie für mi gsi.

Kai ainzig Gspäänli, wo n i kennt ha, derby.

Mamme und Babbe häns sicher guet gmaint

Und mi denn mit dääne andere veraint.

So bi n i denn am Baanhof abgää worde

Mit ere mir völlig unbekannte Horde.

D Yysebaan het is no Lieschtel brocht.

Döört hän si is uff Raigoldschwil verlocht;

Uff e Buurehof diräggt nääbe de Soi,

Aber Gott-sei-Dangg nit au no grad im Hoi.

Druff aabe hets ghaisse; Bett uuswääle,

D Wösch in e Schränggli yyne kwääle.

Was mach ych do, wett lieber wider hai?

Füül mi in dääre Masse völlig ellai!

D Erinnrig an die Wuche isch zwoor verblasst.

I waiss numme, i ha d Brääme zimli ghasst.

E jede Daag het me e Wandrig gmacht.

Männgmool zur Stroof au zmitts in dr Nacht.

Mir hän miesse e Mittagsschloof mache!

Mir grosse Stögg, das isch jo zum lache!

Aber dr Laiter het das sälber überwacht;

Und wehe, me het gwschätzt oder glacht.

Dää Laiter  isch e kurioose Maa gsi.

Noohär het är nümm döörfe Laiter si:

Är het gsait, är miess is d Lunge abloose:

Drum: ‘Aadrätte in Hemmli und Underhoose!’

Sy Frau het jedem s Hemmli uffe glupft

Und är het an de Brüschtli ummezupft.

Dääne wärde kaini Kinder me aaverdraut,

Die hän sich iiri Karriere sälber versaut.

3.34.  Dasch nit unser Huus – Feriekolonie in Maladers.

Feriekolonie in Maladers

 

Au wemmer do vyyl sin go wandere,

Vo aim Bärg übere zum  andere,

Ha nni öbbis schöns döörfe erlääbe,

Wo mi hüt no uff Wulgge loot schwääbe:

S Erscht-Auguschtfüür hoch oobe uff em Bärg!

I bi mer vorkoo wie e glaine Zwärg.

Hoch über Maladers uff ere Madde

Stoot e Schyterbyygi uus lange Ladde.

Wos yydungglet isch, het me s Füür aazunde.

I ha das wahnsinnig spannend gfunde,

Wie blötzlig jede Bärg druff Antwort gää het.

Aadächtig still sin alli und i wett,

Numme s Gnischtere vom Füür kasch hööre,

Wenn si im Härz noonemool dien schwööre:

‘Miir wänn si e ainzig Volgg vo Brieder’

Das biwegt no hütte alli Gmieter.

Die magischi Fyyr wird i nie vergässe.

Kai Füürwärg ka sich do dermit mässe.

Mit Faggle und völlig in is versungge

Und no lang vo de Yydrügg drungge,

Simmer talwärts zrugg ins Ferie-Huus,

Mied und säälig in verdiente Pfuus.

3.35.  Dasch nit unser Huus – D Uffsetz.

D Uffsetz

Wo n i in d Rölleli gho bi, hämmer männgmool d Uffgoob griegt, dehaime e Uffsatz über irgend eThema z schryybe. Do het sich d Mamme yygschalte, will si gäärn gschriibe het und het myni Schueluffgoobe gmacht. Das isch aber nit lang guet gange. My Glasseleerer het das durchschaut. Aer het myner Mamme verbodde, myni Uffsetz zschryybe, denn myni sige besser!

 

3.36.  Dasch nit unser Huus – D Moolgalss in Sils.

D Moolglass in Sils

 

Zwai Wuche mit dr Glass ins Engadiin;

E Draum uus dr Wunderlampe vom Alladiin.

Scho in Basel foot das Määrli aa.

D SBB het e Schild am Waggon gha:

Waage isch reserviert für e ‘Real’schuelglass

Druff gstande isch aber ‘Mal’schuelglass.

Das isch nit emool dernääbe gsi,

Dr Zaichnigsleerer isch nämli mit vo dr Partii.

Und gmoolt hämmer, das hesch könne gsee:

Dr Silsersee, d Liebesinsle und d Chasté.

Nach Isola und Maloja simmer  dipplet

Bis is d Waademusggle rächt hän gribblet.

Mer hän alli Jooreszytte döörfe erlääbe,

Vo Summerhitz bis Schnee und Rääge.

Im Fextaal hämmer Schneeskulpture baut

Bis is d Sunne dr Schnee wider het glaut.

Zwüscheduure hets Schuelstunde gää

Und Kuchidienscht hämmer au miesse nää.

Aimool simmer haimlig go rauche.

Das het dr Leerer zümftig lo fauche.

Dää Schadde het sich glyy verzooge.

Sils isch schön, das isch nit glooge.

Döört gang i sicher nomool aane.

Erscht erwagse han is könne blaane.

3.37.  Dasch nit unser Huus – Schilager.

Schilager

 

Als Stadtkind isch mer s Schifaare nit  nooch gstande.

Drum ha n i bi däm Sport nit gross könne lande.

S erscht Mool uff d Schi bi n i im Alder vo drizää.

Aber Schi und Schischue, wohäär nää?

Die hesch uff em Münschterblatz gleent bikoo

Am uffgstreggte Arm häns Mass für d Schi gno.

Das het zuenere Laddelengi vo zwaimeterfümf gfiert.

Kai Wunder hän mi d Schi im Schnee ummenander griert.

Am Ydiottehügel hets numme ai Faart bruucht

Und i ha grad s Gnüü und dr Fuess verstuucht.

Mit em Rettigsschlidde hän si mi aabe brocht ins Taal.

Syt döört isch s Schifaare für mi e Kwaal.

Für die wytere Laager mit Schi

Han ych e ärztligi Dischpens derby:

Wäge Waadegrämpf, wo mi deege blooge,

Het dr Doggter gschriibe uff däm Booge.

Dr Leerer hets grinsend akzeptiert

Und mi vom Schifaare dischpensiert.

 

3.38.  Dasch nit unser Huus – Sünnele.

Sünnele

Bruun wärde das ischs A und O gsi. Laider het me sich nooni mit Sunneschutz yygriibe. Im Gegedail: Mälchfett het me gno, damit me jo gli root resp. bruun hätt wärde solle. Damit i jo frieh gnue my wyssi Hut ha könne verdegge, bi n i uff unsrer Terrasse däm beschaidene Sunnestraife alli baar Minute noochegrutscht. Gnützt het s nüt. Sunnebrand ha n i natürlig bekoo, aber bruun worde bi n i nit. D Hut het sich aifach gschellt und alles isch gsi wie vorhäär. Ass i das im Alter wärdi biesse miesse, het mer laider niemerds gsait.

 

3.39.  Dasch nit unser Huus – Huusdierli.

Huusdierli

Das isch e ewige Wunsch gsi: e Dierli zha. Aber miir hän aifach numme Bäch gha. S Katzebuusi isch is vergiftet worde, d Wällesittich sin ab und dervo, s Meersoili isch e faisse Mogge worde (wo n i denn in Dierpark ha döörfe bringe). Em Babbe syni Fischli im Aquarium hän sich gegesittig gfrässe. Dr Höhepunggt isch e glaine Hund gsi. D Noochbere – e erfaareni Hundehaltere – het is gli bewiise, ass mer über s Oor ghaue worde sin: s isch kai Bueb, sondern e Maitli gsi, d Pfoote hän e riisigi Ändgrössi aazaigt. D Impfbabyyr sin gfälscht gsi und dr Hund het e gruusigi Angscht vor unsere Händ gha (vermuetlig isch är gschlage worde). Dr Babbe het en denn zrugg brocht und s Thema Dierli isch gässe gsi.

 

3.40.  Dasch nit unser Huus – Dr Sport.

Dr Sport

 

Mit em Schifaare hani nüt könne aafoo.

Hamball het mi denn völlig yygno.

Verbodde het is das s Durninspägdoraat:

Das sig kai Maitlisport, sig zweeni moderaat.

In dr Kemyy bi n i in Firmesport gange.

Ha ooni Waartezyt ins Tennis könne glange,

Will i altersmässig no e Juniorin bi gsi.

Aber noo zwai Stund isch au das verby:

Do sin d Kinder gsi vo de Diräggter

Und soonigi vo de Heere Döggter.

Die glaine Goofe hämmers zspüüre gää,

Si liesse sich iire Blatz do nit nää.

Denn ha n i au no däm Leerer gfalle,

Är het körpernooch zaigt, wie d Balle sott falle.

Im Badminton-Club ha n i denn Fründe gfunde,

Mit iine bi Turnier s Elsass könne erkunde.

Als leedigs Maitli ha n i de Fraue nit gfalle.

Und scho glyy hän si mi au do lo falle.

Erscht ghüroote denn in Züri oobe

Hämmers gmainsam duurezooge

Und Interclub Badminton gspiilt.

Unsri Kinder hän döört au yyne gschiilt.

Bi mym beschte Matsch isch dr Meniskus grisse,

Das het denn my Sportkarriere gänzlig gschlisse.

3.41.  Dasch nit unser Huus – In dr Handeli.

In dr Handeli

 

Aigetlig hämmer alles tolli Leerer gha,

Bis uff ai ainzige, dää wötti nümmi ha.

Syni Geigistunde im Höörsaal oobe

Die sin öbbe gar nit gsi zum Loobe.

Är het is hüffig zue sich aabe gruefe,

Dermit är gaiffernd uff jedere Stuefe

Under d Rögg het könne gnaisse.

So ain het aifach numme e Maise.

Derby isch em d Brülle uff e Naasesitz grutscht

Und mit dr Zunge het är syni Libbe glutscht.

Das hämmer en denn au zümftig biesse loo.

Im Glasselaager isch dää Momänt denn koo.

Au do het är kai Glägehait loo verstryyche,

Mögligscht äng an uns verby welle z schlyyche.

Do hämmer em Rizinusöl in Tee yyne do

Und giigeled, wemmer sy Düür wider ghöört hän go.

(Sythäär waissi, wieso me Düürlischletzer sait).

S het em woorschinlig der Darm  ummedrait

Für ai Daag hämmer en so usser Gfächt gsetzt

Und gly druff aabe het en au d Schuel versetzt.

3.42.  Dasch nit unser Huus – Was soll i emool wärde.

Was soll i emool wärde

S isch zwoor no wyt ewäg gsi, aber i ha halt scho emool miesse drüber noochedängge, was i spööter emool wötti wärde. Das isch e weeneli e Abwääge gsi zwüsche Froid und was me do verdiene wurdi. Schliesslig hän d Eltere scho druff baut, ass i ändlig für mi sälber uffkoo könnt. E Draum wäri Innearchitektin gsi, aber domools isch die Uusbildig siibe Joor gange. Also nit möglig. By dr Kindergärtnere het my Babbe scho gruefe, do hesch du zweeni Geduld. Im Ruggbligg wurdi sage, das wär nit s Schlächteschte gsi. Also isch me in d Bruefsberootig gange. Dää Maa het e baar aigenartigi Tescht mit mer gmacht und s Fazit isch gsi: zweeni Fantasyy. D Handelsschuel wäri nit schlächt. Also ab in d Handeli. Und noohäär zwangsläeufig uffs Büro. Isch kai schlächte Wääg gsi, alles anderi ha n i in myne Hobbies uusgläbt.

3.43.  Dasch nit unser Huus – Bruef und Kunscht.

Bruef und Kunscht

 

Noodäm dää vo dr Bruefsberootig d Mainig het ka,

I sig woorschinlig mit der Handeli besser dra;

‘My Fantasyy wurdi für d Kunschtgwärbschuel nit länge’,

Hani nit draut, uff e Kunschtuusbildig z dränge.

Denn ha n i halt dr kaufmännisch Wääg miesse nää.

Dr erschti Job als Bürogummi in dr Kemyy isch jo gää!

Vo dr Tippmamsell bis zer Gumsle im Vorzimmer

Bi n i alles eergizig duurloffe ooni Gwimmer.

In dr Kinderpause ha n i näbscht dr Familie

My Fantasyy pfläggt mit Gnätt- und Farbutensilie

Zum Gnätte vo Doon und Bemoole vo Syyde,

Vo Gschirr und  Holz; s het nüt gää, wo n i hät gmiide.

Uusgstellt und au verkauft ha n i mool do und döört.

Dr Räscht ha n i bhalte, das het mi nit gstöört.

Zrugg im Bruef ha n i Wyterbildig gmacht.

Das het mi voaadryybe mit aller Macht.

I bi gläddered uff dr Karrierelaitere

Und uffegstiige bis zur Laitere.

My künschtlerischi Oodere het mi nümm verloo.

Do drüber bi n i glügglig und au richtig froo.

I bruuch öbbis zum Gnüüble, Mache und Blaane,

Sunscht wird’s mer  langwyylig, was jetz jede ka aane.

Könnt i hüt em Bruefsberooter vo mym Lääbe brichte,

Wurd är myni Lääbenszyyl villicht  anderscht richte.

 

3.44.  Dasch nit unser Huus – S Frollain.

S Frollain

 

Jetz bin i kai Frollain mee!

Miir duet das kaibe wee.

Falls me so gnennt sott wärde,

Wird das pletzlig zer Beschwärde!

Gschmaichlet hets doch de wyblige Wääse

Und vor allem au de alte Schääse!

Jung hets gmacht und Frayd,

Drum duet miir s Fääle laid.

Mer hän doch d Gunscht und d Eer deerfe ha;

E Underschiid vo jung und leedig z ha.

Au noo dr Hyyroot hanis gnosse,

Mit däm Schmuus ibergosse,

Mi jung und aamächelig z fyyle.

Nyt isch mee, s isch zem Hyyle!

D Manne hän dermit Glyychstellig griegt.

Wurscht, eb me derfir d Kultuur verbiegt.

E Aige-Gool fir d Fraue, wie-n-i main.

E Gwinn fir si gsee-n-i e kain.

3.45.  Dasch nit unser Huus – Myni schiefe Zeen.

Myni schiefe Zeen

D Zyt isch langsam verby gsi mit de Milchzeen; die Zwaite hän scho greftig druggt. D Mamme isch aber überzügt gsi, es sig e guets Zaiche, wenn me d Milchzeen so lang wie möglich haig. Also hets kai ‘Düürfalle-Zaan-zieh-Methode’ bi uns gää. Derby wärs nötig gsi, denn die Zwaite hän sich denn iire Wäg sälber gsuecht! So ha n i Schuufle gha, wo überenander gstande sin und ain vo de Eggzeen isch zwyt oobe uuse ko und erscht no schreeg gstande. Wenn i glacht ha und Zeen drogge worde sin, isch bim Muulschliesse dää verflixti Zaan uff dr Libbe hänggeblybe. Das het derzue gfiert, ass i dr Spitznamme Vamp griegt ha. So ha n i numme no mit dr Hand vor em Muul glacht! Und uff Fotene gseet me mi nur mit uffenander prässte Libbe.

Erscht als erwagseni Frau ha n is denn in die aigene Händ gno und mir die schiefe Zeen lo überkroone.

 

3.46.  Dasch nit unser Huus – Dr erschti Kuss.

Dr erschti Kuss

I spyyr s no hitte, ass ob s geschtert gsi wäär

 

Dr Noomidaag dungglet scho yy;

I sott scho e Wyyli dehaime syy.

Dää bsundrig Momänt hebt is gfange.

I spyyr e unbikannts  Gfyyl und Verlange.

S isch yysig, mer steen äng binenand.

Do naigt är sy Kopf  und nimmt my Hand.

Es grälleled dr Ruggen ab und d Gney ziddere,

Jedes Heerli am Kerber spyyri bletzlig biibbere

Sy  Neechi, dr warmi Ootem, die waiche Libbe!

My Härz bebberled, s wird äng zwische de Ribbe.

Blyyb gstyff voller Spannig, grieg kuum no Luft.

Was, wenn dää Draum bletzlig verpufft?

Libbe, wo sich fyyn doch kuum beriere -

Due mi fascht e weeneli scheniere.

Sy Zungeschpitz, wo myni Libbe netzt

Und my Härz diräggt in Himmel versetzt.

Ewig mecht i die Gfyyl im Härz in draage.

My erschte Kuss blyybt dief in mir vergraabe.

 

3.47.  Dasch nit unser Huus – Verliebt....

Verliebt…

 

Scho uff em Schuelwääg ha n i iin öbbedie gsee.

Är het mer scho guet gfalle und denn no vyyl mee,

Wo är mi yyglaade het, mit iim ins Kino zgoo.

Arm in Arm simmer aane gloffe und dernoo

Ha n i gar nüt gsee vo däm Film wäägem Schmuuse.

I bi denn ellaige hai go säälig pfuuse.

S nägscht Mool het är gmaint, i soll zue iim uffe ko.

Ha dänggt syni Eltere sige sicher do.

Sisch niemerds dehai gsi, das het mer nit gfalle.

Ha an sy Aastand glaubt und nit an e Falle.

Mer höggle uff em Kaanebee äng umschlunge.

Do wirds mer doch blötzlig e weeneli glunge.

Är rupft tatsächlig am Verschluss vo mym Rogg.

Do standi uff vor iin aane wie ne Pflogg.

‘Jetz gnöpfsch aber nullkommablötzlig wider zue!’

I nimm my Däschli und d Jagge in ainer Rue.

Duss uff dr Strooss hooli Luft und schnuuf duure.

Kaini Schmätzgi mee im Buch; dues fascht beduure.

Aber stolz bi n i, ass mi glaar duuregsetzt haa.

Ass me nit aifach grad was me wott, mache kaa.

3.48.  Dasch nit unser Huus – Was isch ächt das.

Was isch ächt das…

 

Wenn d Sunne schyynt, au wenns räägnet vorusse

Wenn de die ganz Wält könntsch umarme und küsse

Wenn s Gsicht nümm andersch ka, als straale und lache

Wenn d am liebschte numme Blödsinn möchtsch mache

Wenn s im Buuch rumplet und Schmätzgi fladdere

Wenn d Gnüü noo gän und aaföön schnaddere

Wenn de nüt kasch ässe, kai Hunger di bloggt

Wenn e jeede noo dyner Gsundhait froggt

Wenn de duur Strosse und Gasse möchtsch danze

Wenn de wötsch ummegumpe wie ne glaini Wanze

Wenn au gar nüt di Luune ka kabutt mache

Wenn de nümme uus däm Draum wotsch uffwache

Denn bisch verliebt bis über d Oore

Und hesch di Härz ändgültig verloore

3.49.  Dasch nit unser Huus – D Mamme isch grangg.

D Mamme isch grangg

 

Mit 17 keit my glaini Wält uss alle Fuege.

D Mamme isch fuurt, mir mien sälber luege.

Si het Sache verzellt, wo nit könne stimme.

I verstand das nit, das isch jo s Schlimme.

Si hän si mitgnoo, si dien si in d Friidmatt.

‘Döört sin doch die Irre’, saag i derzue matt.

D Mamme het Angscht und isch duurenand.

Mir könne nit hälfe, sin sälber am Rand.

Iiri Seel isch broche, s Lääbe vyyl z haart.

Si het vyyl z vyyl grampft und an allem gspaart.

Die zwai Zimmer sin z glai für drey Persoone.

Drum ziehni jetz uus, will ellaige woone.

Aber das hilft nit, d Eltere löön sich schaide.

Was denn kunnt isch e unändlige Raige;

E baar Monet dehai, denn wider Klinik.

Iir Gsicht zaigt längscht nümm die gringschti Mimik.

Was könnti due, mit was si verwööne,

Wo si doch vyyli  numme verhööne.

S duurt Joore bis i ändlig sälber bigryff:

Nit 'verwööne', 'bruuche' haisst dää Bigryff! 

Zerscht schängge mer iire e Kätzli.

Das isch nullkommablötzlig iires Schätzli.

Si ka mit em reede, hege und s pflääge

Und si nimmt si mit uff all iire Wääge.

D Grosskinder sin glügglig, e Grossmami z haa.

Si isch zfriide, ass sie bruucht wärde kaa.

Jetz fordere die vyyle Bille iire Tribut

Langsam goot iire Körber draa kabutt.

D Zerstöörig isch laider nümm uufzhalte.

Dr Dood will glyy ‘svnes Amtes’ walte.

Si losst is zrugg in Druur und grossem Schmärz.

Dr Dangg an si draage mer dief im Härz.

3.50.  Dasch nit unser Huus – Si isch grangg.

D Mamme isch grangg

Mer hän scho gmergt, ass mit dr Mamme öbbis nit stimmt. Si het nümmi könne schloofe, isch die ganz Nacht ummegaischteret und het Literwyys Kaffi drungge. Am e schööne Daag isch dr grossi Zämmebruch ko und me het si miesse in d Klinik bringe. Iiri Psyche het sich zwoor mit Dablette verbesseret, aber si isch nümmi die glychi gsi wie vorhäär und die Klinikuffenthalt sin zer Reegle worde. E druurigi Gschicht. Plötzlig fäält d Mamme, obwool si no do isch.

 

3.51.  Dasch nit unser Huus – E aigeni Woonig.

E aigeni Woonig

Jetz isch es nümmi mööglig gsi, dehaime woone z blyybe. I ha mer e glaini Woonig gsuecht und soone winzige Schlaag ha n i au gli gfunde. 17 m2, e winzigs …. Bad kames nit nenne; e Duschi, e Brünneli und e WC: wenn i d Händ gwäsche ha, ha n i d Düüre nit könne zuemache, suscht hätt i kai Blatz gha. Aber es sin myni 4 Wänd gsi und das isch s Wichtigschte gsi. E winzig glaine Balkon hets au no gha mit Bligg uff d Baanglais vo dr Elsässerbaan. I bi glügglig gsi, wenn numme dr Aigetümer nit diräggt nääbedraa gwoont hät. Dää het doch wirglig gmaint, wenn är my Duschi höör,i wurd i iim – wenn är lüütet – blutt uffmache. S isch e alte Glüschteler gsi.

3.52.  Dasch nit unser Huus – Ändlig neui Zeen.

Aendlig noii Zeen

E lang gheegte Wunsch ha n i mer ändlig erfülle könne: myni schiefe Zeen z übergroone. Aendlig ha n i könne Lache ooni d Hand vors Muul zheebe. I ha mi gfüült wie noi geboore. Verbloose sin d Hemmige gsi. S het mer nimerds mee könne Vamp noocheriefe! E Befreiig, wo me sich numme schweer vorstelle ka.

 

3.53.  Dasch nit unser Huus – Hund und Katz.

Hund und Katz

 

E Dierli zha, isch no allewyyl my Wunsch gsi

Und my Maa isch do mit ganzem Härz derby.

Bevor unsri Kinder uff d Wält ko sin,

Liggt zerscht d Suechi noo nem Hündli drin.

Wenn spöter d Kind mit Dier uffwagse dien,

Leere si brezyys, wie si dermit umgoo mien.

Dr Daggel Toby hämmer glyy bi n is uffgnoo.

Und mit de Kinder ischs denn gnau so koo.

Är het si feschte Blatz in unsrer Familie gha.

Alli hän en mööge und Freud an em gha.

Vyyl zfrieh het en e schwääri Grangget is gnoo.

Das het bi n is e grossi Lugge hinderloo.

Scho noo zwai Wuche hämmer die wider gfüllt.

Do het dr Strizzi bi n is syni Runde drüllt:

E Katzebueb mit Zözzeli uff de Oore.

An iin hämmer gschwind unsri Härz verloore.

Joore spöter kunnt no dr Buby zuenis hai:

Mit däm schwarze Hund isch dr Kaater nümm ellai.

Dr Skotty het zwoor e aigene Grind;

Die zwai sin aber gschwind mee Fründ als Find.

4.  Geschtert Hüüroot, Kinder! Plötzlig het me e Familie. E wunderbari Zyt, wo n i nit wött misse. Au wenn nit alles so uuseko isch, wie mer is das gwunsche hän.

4.1.  Geschtert – D Hochzyt.

D Hochzyt

 

Bi dr Zivile het me gsait, i sig jetz vo Bärn

Basel griessi mi numme no vo färn.

S isch aber zspoot gsi zem mi ufflääne,

Ha si drum haimlig verdruggt myni Drääne.

Druff abe muess i feschtstelle,

I ka my Wegger nimmi stelle.

Au d Uur isch aifach stoo bliibe.

Ha no lang myni Auge kenne ryybe.

E Oraakel, e schlächts Zaiche, worum?

Was sools, i schäär mi jetz nit do drum.

In dr Kiirche kunnt denn aber dr Bescht.

Hinder uns sitze die vyyle Gescht.

Dr Pfarrer isch baraad und sait dernoo:

‘Liebi Druurgmaind…’ är kas sälber nit verstoo.

Är windet sich und versuecht sich zrette;

Duet verlääge ai Gschicht an die ander kette,

Derwyyl e Frynd mit em Flugi iber dr Kiirche graist.

Uus däm Gruess wird nyt, är isch denn verraist.

Gits e Sinn fir die wunderligi Gschicht?

Zwai tolli Kinder, numme d Ee isch scho Gschicht.

S Birgerrächt vo Basel häns mer au wider gää.

Das looni mer uff kai Fall mee nää.

4.2.  Geschtert – Kinder ha.

Kinder ha

 

Kinder döörfe geboore zha isch an sich scho e Sääge,

Aber ass iir uusgrächnet mi als Euer Mami uusgwäält händ,

Macht mi unändlig stolz und isch dr Oscar für my Lääbe.

D Kinderzyt isch Freud, fiert aber au duur schwiirigs Gländ.

 

Bi n i z sträng gsi oder hätti andersch sotte umgoo?

Ha n i allewyl zuegloost, wenn iir miir verzelle händ welle?

I ha Euch ebbe vyyvl z vyyl ellaige miesse loo,

Wills Gäldverdiene halt au het miesse zelle.

 

I beduur die Stunde wo n i nit bi euch ha könne si.

Ha männgs Erlääbnis vo Euch derwääge verbasst.

Waiss au nit gnau, öbs Blöödsin gää het derby.

S het Dääg gää, do ha n i s ‘go-schaffe-miesse’ ghasst.

 

Und doch hämmer tolli Zytte kaa mitenand:

S het allewyl öbbis zum Giigele gää.

Mer sin gsi wie ne glaine Familieverband,

Das isch in unsre Härz und kanis niemerds nää.

 

4.3.  Geschtert – E Sunntigspaziergang.

E Sunntigsspaziergang

S Döchterli het grad könne laufe und hets gnosse jeedes Graashälmli  zinspiziere. So isch natürlig iir Tämpo langsamer gsi als unsers. Zwüscheduure hämmer au e Poiseli gmacht und gluegt, ass si wider ka zue uns uffschliesse. Nodäm mer e Wyyli gloffe sin, hämmer is wider umdrait, zum Luege, wo si steggt. Do isch is dr Schregg in d Gliider gfaare: am Gartehaag isch si gstande und het zuedraulig d Nüschtere vom e Rössli gstrychlet, wo dr Kopf über e Haag gstreggt het. Si het Dierli gliebt und d Dierli offebar si au.

 

 

 

4.4.  Geschtert – Unsri Kinder.

Unsri Kinder

 

Erscht grad geboore, glyy kenne si stoo

Und no vyyl schnäller laufe si dervoo.

Die Buschijoor sin e herrligi Zyt,

Numme liige si zrugg, scho kaibe wyt.

Vergässe duesch nit e ainzige Bligg.

E jede fillt dy Härz mit puurem Gligg.

Ob Dräänli droggne, Gerbsli mache,

Windle wägsle und derby lache.

Naase schnytze und Fuudi butze,

Jedi Minute mit iine nutze,

Bäggli stryychle und Fieber mässe,

Verdruggti Banaane mit ne ässe,

Gschichtli verzelle und Liedli singe

Und si denn ins Bettli bringe.

Und wenn si schloofe, luegsch si aa;

S git nyt scheeners als Kinder zha.

 

4.5.  Geschtert – D Buschisprooch.

D Buschisprooch

 

Au miir hän is em glaine Kind aabasst und iiri Sprooch übernoo, damit mer is verstande hän. Do dr Babbi Bärner Dialäggt gschwätzt het, hets gar männge luschtige Uusdrugg gää. Vo dr Stuube uus hämmer Start und Landig vo de Flugzüüg könne gsee. Das isch denn zum ‘Duudi düüde’ (Fluugi Flüüge) worde.

 

Wo si emool öbbis aagstellt het, hämmer verlangt, ass si sich entschuldigt und si in iir Zimmer gschiggt. Noo ainiger Zyt isch d Düür e Spälti uffgange und si he uusebrielt: ‘Tschubigum’. Düüre zue!

 

Zur Zyt no vom Mittagsschlööfli het si sich braav aaneglegt und mir hän d Düür zuegmacht. E Momändli isch Rue gsi. Plötzlig rieft si ganz luut ‘Räägetschirm’, woruf mer sin go güggele, was loos isch. Si het aber dief und seelig gschloofe.

4.6.  Geschtert – S Buusi.

 

Die Glai het welle wüsse, wie me däm do unte …. sait. Mir hän denn kindgerächt iir Gschlächtsdail ‘Buusi’ gnennt. Das het ere so guet gfalle, ass, wemme si gfrogt het und druff zaigt het, was das sig, het si sich verzüggt gwunde und gmaint: miau miau miau.

 

4.7.  Geschtert – Dr Babbi im Militärdienscht.

Dr Babbi im Militärdienscht

 

Dr Babbi isch duur sy Bruef vyyl unterwägs gsi und Zobe au männgmool spoot haiko. Wo dr Babbi denn no sonere lange Abwäsehait wider hai ko isch, het die Glai spontan gmaint: ‘ Bisch Du jetz wider do?’. D Betoonig isch aber uff em DU glääge…..

Wenigschtens het kai Gfoor bestande, ass my Maa das hät könne ‘falsch’ verstoo.

 

4.8.  Geschtert – D Gumpiballe.

D Gumpiballe

Wo s Döchterli no sehr glai gsi isch, het si beraits Aigeverantwortig zaigt. S Nochbersgspäänli isch z Bsuech gsi und die baide hän uff dr Terrasse mitenander gspiilt. Ych ha däärewyyl in dr Kuchi s Zmidaagässe zwääg gmacht. Blötzlig seen i uus de Augewinggel, ass das Maitli duur dr Gang zäpft und zur Woonigsdüüre uuse lauft. Verwunderet ha n i my Dochter gfrogt, was bassiert sig. Si haig ere iiri neui Gumpiballe vorgfiert, wo si vo uns gschänggt bekoo het. (Si het se zur Beloonig bekoo, will si iire Nuggi aigehändig in Mischtkübel gheit het.) Dernoo haig äs halt au welle druff sitze. Aber do si kaini Unterhöösli aahaig, het si iire das verwaigeret. Und jetz sig si hai, go Unterhoose hole. – Und scho isch d Düür uffgange und s Maitli isch wider yyneko, triumphierend d Unterhose wie n e Fäänli schwänggend.

4.9.  Geschtert – D Noochbere.

D Noochbere

 

Mer hän wunderbari Noochber gha. E Ytaliäner-Familie mit zwai härzige Buebe. Wo n i mit em Soon schwanger gsi bi, het si mir die Glai ab und zue zum Hiete abgno. Die zwai hän sich so guet verstande, ass d Mamam (so het die Glai iire gsait)  denn au die Glai amme gfrogt het, was si gärn zum Zmittag ässe well. Si het natürlig schnäll dusse gha, wie fein d Mamam koche ka. Gnocchi oder Ravioli – vo Hand gmacht natürlig. Die Glai het denn gly feschtgstellt, ass d Mamam besser kochi als ych: Päng! Wo si rächt het, het si rächt.

 

4.10.  Geschtert – Wemme d Zeen ka uusenää.

Wemme d Zeen ka uusenää

 

Dr Binggis luegt zue, wie d Grossmamme d Zeen butzt.

Derzue het si nit emool e Zaanpaschta benutzt.

Si nimmt si aifach uuse und legt si in e Glaas.

Är isch hailloos fasziniert, ass es Zeen git nach Maass.

Drum muess är das alle syne Fründe verzelle;

Was d Grossmamme natürlig gar nit het welle.

Si reedet em ins Gwüsse, är solli si verstoo.

Es sig für si phyynlig, wenn alli wüsse dervoo.

S lütet an dr Düür, s isch si Kolleg vo nääbe draa.

Si spiile und blöödle und wänns zämme luschtig haa.

Do maint dr Gnäggis, wo si ne denn wott s Zvieri gää

Gäll, däm saage mers nit, ass de d Zeen kasch uusenää!

4.11.  Geschtert – S Gebiss vom Grossmami.

S Gebiss vom Grossmami

Dr Binggis isch haillos begaischteret gsi, ass s Grossmami d Zeen zum Butze het könne uusenää. Das het är au schnuerstrags syne Fründe miesse go verzelle. Druffaabe het mi d Mamme bätte, em Glaine  glaar zmache, ass das für si schregglig phyynlig sig.

I ha mym Soon dernoo ergläärt, ass är das solli blyybe loo, denn s Grossmami hät jo sälber no gärn iiri aigene Zeen gha und ass es iire fuurchbaar unagnääm sig, wenn anderi Lüt dervo wüsse.

Dr Gnäggis hets yygsee!

Wo am andere Daag d Düürglogge gschällt het, isch s Grossmami go uffmache, dr Glai natürlig uff iire Fäärse. Sy Fründ het en welle abhoole zum go Spiile. Dr Binggis het denn s Grossmami am Ermel zupft und gmaint: ’Gäll, Grossmami! Däm saage mers nit, ass du d Zeen kasch uusenää!’

4.12.  Geschtert – D Wiehnachtsfyyr mit de Glaine.

D Wiehnachtsfyyr mit de Glaine

Es isch doch e woori Froid gsi, womer ändlig hän könne Wiehnacht fyyre mit unsere aigene glaine Kinder. Au mir – wie doozemool unsri Eltere – hän an däm Daag e bsundrige Daagesablauf gha. Am Morge isch me mit em Babbi im Dorf go e Dannebaum uuslääse und die Glaine hän em denn gholfe, dr Baum haizschleppe. D Gööfli hän greftig an e baar Zwyygli zooge, abers Hauptgwicht het natürlig dr Babbi drait. Dehaime het är en denn in Glassfuess yyne gstellt und verschruubt, ass är guet stoot. So het är en denn uff d Terrasse uuse gstellt.

Dernoo het d Familie Zmidaag gässe und spööter het me d Zyt vertriibe mit spiile. Für dää wichtig Oobe het me sich bsunders zwääg gmacht. Als erschts hets ghaisse, ‘ab in d Baadwanne’.  Das het jo au mee mit spiile zue gha, aber si sin wenigschtens suuber worde derby. Noonem baade het me d Kinder und natürlig sich sälber in Schaale gworfe. Dr Gnäggis – öbbe 3 jeerig – het scho e wysses Hemli drait mit ere Fliege – das het är sich nit lo nää - und derzue e dunggli Hoose. E richtige glaine Gentleman. S Döchterli het uus mym alte syydige Oobeglaid e härzigs langs Röggli gnait bikoo – natürlig vom Grossmami. Härzig het si drin uusgsee. Si het sich au wie n e Prinzässin gfüült. Au mir Erwagsene hän is schigg gmacht.

Sälbsverständlig isch s Grossmami bi n is gsi. Si het sowieso nie döörfe fääle. Si isch e feschte Bestanddail vo unserer Familie gsi. Gege n Oobe sin d Kinder mitsamt em Grossmami in s Kinderzimmer verbannt worde. S Grossmami het d Gööfli mit Gschichte und Spiili bi Luune ghalte. Ab und zue isch s Giigele zuenn is duuredrunge, wäärend mir dr Dannebaum mit Wiehnachtskuugele, Lametta und natürlig vyyle Kerzli und natürlig au Schoggeli gschmüggt hän. Alli Päggli hämmer underem Boimli verdailt und was z gross gsi isch zum Yypagge hämmer hinter em Beumli e weeneli versteggt und mit e baar Zwyygli zuedeggt. Zwüscheduure het denn emool ains uus em Kinderzimmer füürebrielt: ‘Dörfe mer jetz ko?’ Unsri Antwort isch denn gsi: ‘s Grischtkindli isch nooni koo. Iir hööret ganz sicher sy Glöggli, wenn s kunnt!’ Denn isch wider e Wyyli Rue gsi.

Wo mer fertig gsi sin mit dr Pägglibiigede hämmer d Kerzli aazunde. Wo si alli schön brennt hän und kains eme Eschtli znooch ko isch, hämmer s Fänschter uffgmacht und ändlig het dr Babbi s Glöggli gno und gräftig dermit bimmelet. Und scho sin si füüre zrenne ko, s Grossmami hintedri.

‘Oh, jetz isch s Grischtkindli grad dervo gflooge. S het halt miesse pressiere, will s hüt e Huffe zdue het. Schliesslig muess es alle Kinder Gschänggli bringe! Sy Glöggli händer ämmel no ghöörtI!’ het dr Babbi gmaint, wäärend är s Fänschter wider zue gmacht het.

Em Bueb syni Auge hän erwaartigsvoll glänzt und unter s Boimli zue de vyyle Päggli gschiilt. Het s ächt au öbbis für iin derby? S Döchterli stoot mit ärnschter Miine do, luegt umme, und plötzlig zaigt si uff d Biecherwand und maint mit eme vorwurfsvolle Unterdoon: ‘Aber do isch jo em Grischtkindli sy Glöggli!?!!’ Dr Babbi hets nit bsunders guet versteggt, denn s Glöggli güggelet zwüsche de Biecher füüre. Ohje…. Vo döört aa hämmer s Gschichtli vom Grischtkindli nümme brocht.

 

 

 

 

 

 

 

 

4.13.  Geschtert – Dr Spiilnoomidaag.

Dr Spiilnoomidaag

 

Wenn noonem Spiile dr Noochberbueb hai het miesse,

Het är glöönt und gmuult bis zum Drääne vergiesse.

Drmit är zfriide hai isch, ha n en dröschte welle;

‘Är kunnt morn zu dir go Gschichte wyter verzelle.

Ych gang fuurt, I will e Schöni uus mir lo mache.’

Är straaalt mi aa und maint, är kenni sottig Sache.

Är wüssi drum ganz genau, wo ych aanego wott;

‘Du muesch nämli zum Schryner go’ maint är stolz und flott.

Ups, i ha doch gmaint, d Kosmetigere längi no!

Dää Binggis het mer alli Illusioone gno!

4.14.  Geschtert – Mitgegangen mitgehangen.

Mitgegangen mitgehangen

 

Dr Soon isch e glaine Wunderfitz gsi und het überall welle derby si. Das het halt denn laider au derzue gfiert, ass är an de Oore zooge worde isch, au wenn är gar nüt aagstellt het. Do är jo kai schlächts Gwüsse gha het, isch är nit wie die andere dervozäpft. – Wo syni Gspäänli d Briefkäschte mit eme Schuumsprey versaut hän, het denn är die miesse go butze. Är het aifach welle derby si. Au denn, wenn si en uffgforderet hän e Stägge ins Muul zstegge und denn au no bim Yynestosse gholfe hän. Sisch Gott-sei-Dangg nüt Schlimmers bassiert, als e baar Daag e gratzige Hals z ha.

 

4.15.  Geschtert – Die schööni Frau.

Die schööni Frau

 

My Soon het mi  männggmool in Verlägehait könne bringe. Do bi n i mit de Kinder unterwägs gsi und ha im e glaine Käffeli e Pause welle mache. No bim Sueche no nem e freie Disch, foot my Soon wie wild afoo wingge. I ha mit mym Bligg dr Ruum abgsuecht, um e Bekannti oder e Bekannte z entdegge, wo sy Wingge könnti gälte. Ha aber niemerds entdegge könne. Wo nen gfrogt ha, het är numme gmaint: ,Hesch die schööni Frau nit gsee!?

 

Aimool simmer neume im Lift gsi mit ere Frau. Au do sait är ganz lut : ,Gäll, Mami das isch e schöni Frau?, Woruf die betroffeni Dame fürroot worde isch, aber gschmaichlet glächlet het.

4.16.  Geschtert – Noo nem Kommele.

Noo nem Kommele

 

Mer sin zämme go kommele und ych ha s Audi in dr Diefgarage vo däm Center parkd gha. Wo mer zrugg zum Audi laufe seet är e Döschwoo und flippt vor Begaischterig fascht uus. ‘Mami, lueg das tolle Audi!’ und danzt dervor umme. Do kunnt grad e Frau. Si freud sich riisig über das Gschrey vo mym Soon: ‘Är waiss, was schön isch!’ und styggt denn in dää Döschwoo y.

 

4.17.  Geschtert – Wider moole und und und....

Wider moole und und und…

 

Unsri Gööfli sin scho in d Hääfelischuel gange,

Do ha n i ändlig wider mit Moole aagfange.

Laider hets d Keramik wie domools nümmi gää.

I ha mer dr Mumm aber nit welle lo nää;

‘Denn mach i die Däller halt au grad sälber

Und erwytere myni künschtlerische Fälder!’

I ha ai Kurs an andere aane grait;

Gleert wie me d Döpferschyybe drait.

Die Glaine hän denn au e Bolle Leem bekoo.

Au si ha n i iiri Gnättluscht uuslääbe lo.

Do hööri blötzlig e riise Gschrei vo dääne zwai:

‘S Glas mit em Pimselwasser isch uuskeit, ganz von ellai!’

Blötzlig isch Buuremoolerei zimli gfrogt.

Das het mi zum Holz aamoole gloggt.

Vo appizäller Albuffzuug und schwiizer Dracht,

Vo Edelwyss und Enzian in voller Bracht.

Noo dääre Wälle isch denn d Syyde ko:

Diechli mit Salz yyfärbe isch mer nit bekoo.

Bilder moole uuf Syyde, das het mi denn paggt.

Do ha n i e männgi Uuseforderig gnaggt.

Vo kineesische Phönix oder Drache,

Vo Haanekämpf, wo zwai Güggel mache;

Übergross und schwungvoll isch dr Pimsel gfiert.

Dr kineesischi Stiil het mi z diefscht beriert.

Mit Luscht bi n i denn uff Porzellan umgstyge,

Bi denn au do bi de glyche Bilder blybe.

Derzue ha n i Pimsel mit numme aim Hoor bruucht

Ass d Motiiv fyyn worde sin wie fascht ghuucht.

4.18.  Geschtert – D Schaidig.

D Schaidig

 

Mer hän is uuseanander gläbt und blötzlig het nüt mee gstumme. Mer hän is drennt. Kai wirgligi Löösig, aber e Wääg. D Kinder sin bi mir bliibe und i ha wider aafoo schaffe. Zerscht halbdaags, aber gyy het sich zaigt, ass i gärn bi go schaffe und i ha mi sehr schnäll ‘uffegschafft’. D Mamme isch mer do e grossi Hilf gsi. In de Schuelferie – und maischtens au no länger – isch si zue uns ko und het zem Rächte gluegt.

 

4.19.  Geschtert – Noo dr Schaidig.

Noo dr Schaidig

 

Noo dr Schaidig hämmer is beschaide miesse,

Denn s Gäld duet laider nit vom Himmel fliesse.

Mit eme halbe Daag go schaffe, wurdis länge.

Bsunderi Wünsch miemer fürs Erschte verdränge.

D Stuube und s Schloofzimmer sin jetz läär.

Das druggt aim denn scho e weeneli schwäär.

Ydee sin gfrogt, um dää Schaade z begränze.

I ha au gly mit soonige könne glänze.

I ha aifach d Terrassemööbel yyne gno:

D Hollywood-Schauggle isch s Beschti dervo.

D Kinder sin kaibe gärn druff ummegrytte.

Und scho gseet me vo färn besseri Zytte.

Dangg dr Mamme ha n i alles in Griff bekoo.

Mer hän si bruucht und das het au iire guet do.

Si isch d Stützi vo unsrem Lääbe worde.

‘S bescht Grossmami vo Süde bis Norde’,

Wurde myni Kinder über si saage.

D Erinnerig an si diemer im Härze draage.

4.20.  Geschtert – Verletzt....

Verletzt …

Männgmool verletzt me s ander ooni s zwelle

Und spüürt emänd nit die schmärzlig Schwelle.

I waiss, d Schaidig het iin zimli droffe.

Es isch halt aifach nümmi guet gloffe.

I ha my Lääbe sälber in d Hand gnoo;

Aber iin ha n i derfür verletzt zrugg gloo.

Mer hän is nit gstritte, sin Partner bliibe.

Doch s Läbbe hets denn anderscht gschriibe.

Noo Joore griegi e schlimmi Noochricht,

Är haig vo sym Arzt e fuurchbaare Bricht:

S Kräbsgschpängscht haigi bi iim zuegschlaage!

Das haut au mi um, füül mi zerschlaage.

My erscht Gedangge, was kann i mache?

Wie könnt i hälfe bi sottige Sache.

I mool mer uus, wie wichtig s miessti si,

Ass d Kinder wider könnte um iin si.

Mer könnte au wider zämme zie.

I wurd en pflääge, mi um iin bemie.

I kumm nit derzue, ai Wort do dervoo zsaage.

Verzwyflet goot är mer fascht an Graage:

Ych sigi schliesslig dschuld an sym Eländ!

Do ring i numme no stumm myni Händ.

E ganze Schwall het sich uff mir entlaade.

Zimli wee do hämmer syni Glaage;

Dr Hals hets zuegschniert und d Sprooch verschlaage.

Do druff aabe ka au ych nüt me saage.

Wie ha n i au nümme könne dängge,

My Fuurzydee könnt em Freud schängge.

Är het sy Granget mit Glügg überläbt.

Ych ha über die Zyt Stillschwyyge gläbbt.

4.21.  Geschtert – S Grossmami.

S Grossmami

 

Si hän s Grossmami gliebt, hän aber gärn behauptet, ass sie das und säll döörfe mache, wenn ych nit dehai gsi bi. So isch si natürlig unsicher gsi, au wenn glaar gsi isch, ass es nit ka stimme. So het my Soon behauptet, är döörfi uff d Lutsprächerbox sitze. Das sin aber kaini rechteckige Boxe gsi, wo s Druffsitze jo no gange wär. Nai, mir hän flachi Boxe gha, wo mer vor d Zimmeregge gstellt hän, ass dr Schall schöön in d Ruummitti goot.  Är isch also druffgsässe und blötzlig isch sy glai Fuudi hinteaabe grutscht; s het en zämmeglabbt wie e Saggmässer. Natürlig isch är nümmi ellai uus däre misslige Laag gho. Und s Grossmami het gmaint: ‘I ha doch gwüsst, ass du das nit döörfsch mache!’.

 

4.22.  Geschtert – Em Soon syni Zeen.

Em Soon syni Zeen

 

Dr Düüfel hets gsee, noodäm ych mi waiss wie lang mit schiefe Zeen ha miesse ummeschloo, goot das Drauma bi mym Soon wyter. Schuufle, wo sich bequääm uff d Unterlibbe leege, so flach liige si. Aber är soll nit s glyche duuremache, also sueche mer glyy e Zaani uff. Dr Wääg, wo n är vorschloot isch zimli hart. Aber my Soon haltets duure: är muess duur d Nacht duure e Schiine draage, wo mit eme Raif um dr Kopf verbunde isch. S maant mi an e Fischergalge. Numme duet das wee und wird reegelmässig feschter aazooge. Aber är het s dapfer duueregstande. S Ergääbnis isch grandios. Dr Kiifer het dodermit 6 mm verschoobe wärde könne. Syni Zeen stöön grad in ainer Linie. E Gebiss, wo me unscheniert döörf Lache.

4.23.  Geschtert – Rääbeliechtli schnitze.

Rääbeliechtli schnitze

 

 

E Yylaadig an alli Väddere isch ko,

Si solle zum Rääbeliechtlli schnitze go

Am Samschtig demorge im Kindsgi ääne.

Das fiert bi mym Soon zu heftige Drääne.

Will dr Babbi fäält, könn är nit mitmache.

Wo dänggsch au hi, das wäri zum Lache.

Das het mi denn doch richtig mööge

Als sig das wybligs Unvermööge!

An sällem Morge isch my Soon säälig gsi.

Vergässe sin d Drääne, das isch verby.

‘Die schönschte Rääbe het s Mammi gmacht!’

Und niemerds het drüber glyyseled oder glacht.

Die andere Kinder hän au soonigi welle ha,

Also bi n i denn noonemol so richtig draa.

4.24.  Geschtert – D Dochter füült alles.

D Dochter füült alles

 

D Fyynfüüligkait vo dr Dochter ka nit überdroffe wärde. Si schützt vor allem mi. Si verstoots scho als glai Maitli, Eerger vo mir abzhalte. Laider fiert das zu schreggligem Mobbing, wo n i laider vyyl, vyyl zspoot erkenne due. Si nimmt alles uff sich, schirmt mi vo allem ab, will si waiss, ass i schaffe muess und gnue belaschtet bi. Bis i die blaue Flägge uff iirem Rugge entdegg, do ha ni welle wüsse, wie das bassiert. Wenn ain vo de Grosse an d Wanddaafele muess, git är iire e Box in Rugge bym Verbylaufe. Goots no. Schnuerstrags gang i n d Schuel und stell dr Leerer z Red. Dää druggst blööd ummenand vo wäge: d Kinder wurde mi halt nit kenne, schliesslig sig me halt bi alle emool dehai gsi, numme nit bi mir. Im Hintergrund kunnt au füüre, ass i jo nit reede könni (Baseldütsch in Züüri!!!!). I schloo vor, am Fasnachtssamschtig (das gits in Züri) in dr Schuelstund über d Basler Fasnacht ko z verzelle. I gang als Baslerstab verglaidet mit eme Wörterbiechli vo de uffelligschte Uusdrügg und eme Tonbändli vo Drummle und Pfyffe. Zwai grossi Waggislarve setz i dääne lange Lulatsche, wo my Dochter kwäält hän, uff e Grind. S isch alles guet gsi, numme, das ka die blöödi Kue au no. Em Nyyd kam e nit bykoo.

 

4.25.  Geschtert – Wenn si erwagse wärde.

Wenn si erwagse wärde

 

D Schuelzyt isch für baidi nit ooni gsi.

D Dochter isch allewyl als Beschti derby,

Dr Nyyd het si aber zum Opfer gmacht.

Me het si bloggt und derzue aifach glacht.

Si het dapfer kämpft und isch Siigere bliibe.

Si het sich duur das nit lo vertryybe.

Yygsteggt het si aber männge Schmärz,

Wo au mi droffe het bis ins Härz.

Spöter isch denn dr Soon au döört aane.

Was solls, me kas jo beraits aane:

Är het nit in die Schuel welle go!

S het em vo Aafang aa dr Mumm scho gno.

Do hets e Wändig gää in unsrem Lääbe:

Miir blyybe nit an Züri glääbe!

In Basel gits für mi e noie Job.

An dääre Schuel griegt dr Soon jetz Loob.

Für d Dochter isch d Leerstell au scho gfunde.

Ändlig duet sich alles zum Guete runde!

D Dochter schliesst d Leer ab im Rang

Und spüürt derno e Wyterbildigsdrang.

Au dr Soon hängt dra aane e tolli Leer.

Uff aimool sin si fuurt und d Woonig leer.

Jetz sin si duss, hän iir aige Lääbe.

I wünsch, si könne ewig uff Wulgge schwääbe.

 

4.26.  Geschtert – E hübschi Dochter.

E hübschi Dochter

 

Si het alles, was e Maitli gärn hät:

E schön Gsicht, e Figuur, aifach nätt.

Natürlig ha n i Freud und bi au stolz,

Schliesslig stammt si au uus mym Holz.

Si isch hübsch und  au zimli gscheit

Und uffs Muul isch si öbbe gar nit gheit.

Numme ‘schön si’ birgt au vyyli Gfoore:

Scho isch si für d Miss Schwiiz uuserkoore!

Isch das ärnscht gmaint oder Firlefanz?

E seriösi Waal oder e Affedanz?

Mer überlääbes ooni Schaade znää.

Trotzdäm hets au Wunschbilder gää.

S het e bsundere Raiz, Applaus zbekoo.

Jede kennt di, griegsch kuum gnue dervo.

Aber d Nyyder stöön au uff dr Madde.

Das wirft gar männgmool dunggli Schadde.

D Lääbensschuel isch drum so wichtig;

Und letschtlig kunnt  jo alles richtig.

Me hört nit uff, vom Lääbe zleere

Und ka sich als wie besser weere.

4.27.  Geschtert – Dr Soon, e Umfallgländer.

Dr Soon, e Umfallgländer

 

Kai Notfallarzt hämmer je uusgloo,

Für das sin si jo schliesslig do.

E Schramme am Kiini oder am Kopf

Scho het är bluedet, dää armi Dropf,

Längt e Pflaschter oder muess me naie?

S ainzig guet, är het nie afoo graaie.

Je älter und grösser är isch worde,

Hän au d Umfäll afoo überborde.

Mit em Flobertgweerli umme glöölt,

Scho goot e Schuss ab wie göölt:

Muesch nit sueche, är steggt in syner Hand!

Dää Schogg haut mi fascht an d Wand.

An dr Herbschtmäss stoot är znooch an e Baan:

Futsch isch dr Knöchel, was für e Waan!

Mit em Velo het är die Schlimmschte bodde:

So öbbis isch doch glatt verbodde!

In d Spaiche kunnt em d Yykaufsdäsche:

Dää Sturz drübeuus het sich gwäsche.

Vom Schätzli hai in d Drammschiine yyne:

Do isch em fascht e Gaischt erschiine.

Im Spittel hän si gmaint, är haig denn Gligg;

Um e Hoor wärs abenand gsi, s Gnigg.

 

4.28.  Geschtert – Dr Wiehnachtsmärt im Dorf.

Dr Wiehnachtsmärt im Dorf

 

Am Wiehnachtsmärt ha n i e Stand döörfe mache

Mit alle myne modellierte und döpferede Sache.

Zum Uffwerme ha n i derno e Pause gmacht

Und Dochter het über dr Stand denn gwacht.

Do kunnt si zrenne mit e baar Nötli in dr Hand:

‘I ha dy Vaase könne verkaufe!’. Dasch allerhand!

‘Dää het zwoor numme zwaihundert welle gää.

I miessi aber no zwanzig Frangge mee nää!’

Volle Stolz het si mer das Gäld denn aaneglegt.

Do bi n i jetz still und halt mi lieber bedeggt:

Dää Pryys ha n i absichtlig übertriibe.

Ha ghofft, si wurdi denn übrig blyybe.

Nüt isch gsi mit wider haime nää.

E Bombegschäft het sich do druus ergää.

4.29.  Geschtert – Dr Buby und dr Schtrizzi.

Dr Buby und dr Schtrizzi

 

Noodäm au dr Soon in d Leer isch koo

Het niemerds mee Zyt gha zum Gassi goo.

Für dr Buby hämmer glyy e Blätzli könne finde.

Dr Abschiid isch schwär und fascht nit zverwinde.

Är het döört derfüür e Fründyyn bekoo

Und ka mit iire im Gaarte d Sau abloo.

Miir blyybe zrugg mit eme schwäre Härz.

Aber au dr Strizzi füült dää Schmärz.

Är suecht iin verzwyflet in jedem Egge,

Wo är sich emänd könnt verstegge.

Är wird grangg und goot nümmi voruuse,

Liggt umme, will überhaupt nümm schmuuse.

Noo sächzää Joor Treui miemer en lo goo.

E Schleegli het en is für eewig gnoo.

4.30.  Geschtert – Dr Buby.

Dr Buby

Buby! Aigetlig e blööde Namme für e Hund. In Wirgligkait isch är rainrassig und vo edler Härkumft gsi und het lut syne Babyyr ‘Allistar Blackbird’ ghaisse. E koolraabeschwarze Scottish Terrier.

E Bekannte het um das traagische Schiggsal vo däm Hund gwüsst. Das eltere Ehepaar, wo dää Hund gha het, isch kurz nonenander verstorbe. Dorum het är  is aagfrogt, ob mir dää Hund wurde uffnää. Mir hän zwoor nit grad uff e Hund gwartet, aber mer sin yyverstande gsi, iin für e Probewuchenändi zue n is znää. Womer en sin go hoole, isch är grad zue mir ko und amer uffegstande. Kai schlächt Zaiche! Aber dää Hund het ainigi ‘Schweche’ gha: är het Katze nit verdrait (und mir hän jo aini gha) und är isch Handschüüch gsi (offebar oft gschlage worde).

Es het sich uusegstellt, ass d Bsitzerfamilie gar kai Erlaubnis gha het, in iirer Woonig e Hund z halte. Dorum het är uff kai Fall döörfe bälle. Das het me n em vermuetlig mit Schleeg uustriibe.

I ha dr Yydrugg gha, dää Hund lächzi no Liebi und Geborgehait. Ass är unsri Katz akzeptiert und si iin, hämmer rächt schnäll aane brocht. So sin si gli Fründe gsi und kaini Find und hän dr Lagerblatz mitenander dailt.

Es isch also e beschlosseni Sach gsi, ass mir dr Buby bhalte. Är isch e rächte Macho gsi und im Hundetraining nit guet aakoo. D Rüüde het är ooni Grund aagriffe, numme d Maitli het är in Rue gloo. Es isch glaar gsi, ooni Laine kasch mit em Buby nit go spaziere. Und esoo isch das bliibe.

Mer hän en aber trotzdäm sehr gäärn gha und är isch danggbar gsi.

Schwiirig isch es worde, wo dr Letscht vo dr Familie bruefstätig worde isch. Kains vo uns het me über e Midaag hai könne, go sich um dr Hund kümmere und en Gassi z fiere. Es wäri au nit hundegerächt gsi, iin e ganze Daag ellaige dehaime z loo. Drum hämmer e Löösig miesse finde. Es isch is nüt anders übrig bliibe, als e neui Familie z sueche. In ere Dierzyttig ha n i inseriert, ass mir uus de gnannte Gründ e neue Blatz für unsere Scotty finde mien. Wichtig isch gsi, ass sich e möglige neui Familie mit em Terrier-Karaggter uuskennt. Es het sich au tatsächlig glyy e Familie gmäldet und die isch is ko bsueche, um iin kennezleere.

Waiss dr Düüfel worum, aber dr Buby het d Situazioon verstande. Är het sich ooni Ufforderig ganz braav näbe die Dame gsetzt und in syne Auge het me e grossi Druurigkait könne gsee.

Mer sin is ainig worde, denn är wurdi am neue Oort e grosse Gaarte finde und erscht no e wybligs Hundegspäänli. E Wuche spööter sin si en ko hoole. Dr Abschiid isch härzzerrissend gsi – mee für mi als für e Hund. Im Auto uff dr hintere Bangg isch das Wyybli ghoggt und är denn nääbedraa. Vo däm Momänt aa het mi dr Buby mit kaim Bligg mee gwürdigt. I ha vergääbe an d Schyybe böbberlet; är het dr Kopf nümmi drait. My Härz het bluetet, aber es het kai andri Löösig gää. In de folgende Dääg ha n i immer wiider mit dr neue Familie delifoniert, um z frooge, wie s iim goot. Sowyt guet, hets ghaisse, aber är höggli jeede n Oobe an d Huusdüür und waarti. S het mer s Härz umdrüllt und i ha bätte, ass mer nümmi mitenand delifoniere.

Mer hän en schweer vermisst unsere Buby. Nit numme mir, au unsre Kater. I glaub, är het dr Verluscht vo sym Fründ nit vergraftet und isch gli druff aabe gstorbe.

Mer hän Familiemitgliider verloore und mer hän uusnaamsloos alli ghüült derwääge. Es duet schregglig wee. Aber in dr Erinnrig blyybe si uns erhalte. Si sin baidi e Dail vo unsre Lääbe. Mer wäärde si nie vergässe.

 

 

4.31.  Geschtert – Gschäftligi Raise.

Gschäftligi Raise

 

I hätt mer im Draum nit yyfalle lo,

Ass ich fürs Gschäft uff Raise ka go

Zerscht ha n i d Fabrigg in Lochgelly bsuecht.

I ha erfolglos die Sprooch z verstoo versuecht.

Für Mässe bi n i in Stockholm in dr Kelti gsi,

Und in Barcelona bi n i im Summer au derby.

Für Wyterbildig ha n i noo Brüssel miesse

Und au Amsterdam für e Kurs döörfe gniesse.

S Schloss vo Heidelbärg numme vo unde gsee,

Will s Seminaar länger duurt het, duet hüt no wee.

Vyyl Zyt isch laider nie übrig bliibe,

E baar Stund amme für mi zvertryybe.

4.32.  Geschtert – Wider verliebt.

Wider verliebt

 

 

No fascht zwanzig Joor ischs au mir bassiert;

S git blötzlig aine, wo mi intressiert.

Und tatsächlig – so wie s schyynt - ych iin au.

Bim erschte Dräffe isch my Maage flau.

S isch e höflige Maa mit Maniere.

Mit däm muess i mi gwiis nit blamiere.

Är fallt öbbe nit mit dr Düür ins Huus.

Bringt mer au nit überdriibe dr Schmuus.

Mer underhalte n is aagnääm und guet.

Är bringt mi zum Drämli und lüpft sy Huet:

‘Mer seen is morn zum Ässe im Schnaabel’.

Är maint s wirglig ärnscht, es isch kai Gschwaafel.

Was soll i saage, männgmool het me Glügg.

Sythäär isch unser Lääbe ai gmainsams Stügg.

 

4.33.  Geschtert – S gliebte Grossmami.

S geliebte Grossmami

 

In sällem Summer isch si gstorbe. Vyyl z frieh het si miesse go und d Kinder sin schregglig druurig gsi, denn si häns Grossmami über alles gliebt. Si isch jo hüffig bi n is gsi und het gholfe, wo si het könne, vor allem noodäm mer is  hän lo schaide. Nit numme wäärend de Schuelferie, nai au suscht underem Joor, aber vor allem an de Fyyrtig isch si bi in is z Bsuech gsi. Samt em Katzebuusi, em Trixli, denn das het si jo nit ellai dehai könne lo.

E Joor vorhäär am Santiglausdaag hämmer uuschschliesslig für si dr Santiglaus lo koo. D Kinder sin jo scho uus däm Alter dusse gsi, ych ha mym Mami duur dr Santiglaus vo Härze lo dangge für alles, wo si für uns gmacht het, für d Liebi und Weermi, wo si für alli gha het. Vor luuter Verläägehait isch si als wie diefer in Sässel yyne gsungge und e baar Dräänli sin iire über d Bagge gruugelet.

Und jetz? Wo d Adväntszyt aagfange het, duet iir Fääle bsunders schweer in unsre Härz inne drugge. Wiehnacht ooni Grossmami? Das isch kuum vorstellbar! Dr Hailig Oobe numme ze dritt? Wie verloore wurde mer um dr Baum umme sitze. Do wäri s Hüüle vorprogrammiert. D Kinder sin stiller gsi als suscht amme. Kaini Strittereie, nüt. Do simmer zämme gsässe und hän beroote, wie mer die Wiehnacht könnte gstalte. Do isch my Ydee gsi:. ‘Wie wärs, wemmer öbber fremds yylade? Öbber, wo kai Familie me het? Öbber, wo ganz ellai isch uff dr Wält!’. D Begaischterig isch gross gsi.

E baar Daag spöter bin i ins örtlige Altershaim gfaare und ha dää Wunsch vorbrocht und gfogt, ob s vilicht in iirem Haim öbber gäbt, wo do gärn mitmache wötti. Do isch schnäll öbber gfunde gsi. D Paula! E glaini gebrächligi, alti Dame. Mer hän si grad Paulinchen gnennt. – Es isch abgmacht, worde, ass mer si am 24. Dezämber so geege die Vieri Zmidaag wurde hoole. E weeneli frieh, aber schliesslig het me dr Rütmus vom Altershaim nit welle duurenand bringe. Und so isch es denn gsi. Uff dr Faart zu uns het si begaischteret zum Fänschter uus gluegt und s aint und ander Mool gruefe: ,Je, das ha n i scho lang nümmi gsee!’ Das isch jo scho e weeneli glunge gsi und het druff schliesse loo, ass si sälte, wenn überhaupt s Altershaim het könne verloo. No erstuunliger isch es worde, wo si aagfange het, vo iirem Soon z verzelle. Si het doch kai Familie mee, hets ghaisse??!! Offebar het dr Herr Soon anderi Plään, als syni alti Mamme an dr Wiehnacht zue sich znää oder se z bsueche. Numme scho dr Gedangge duet doch wee.

Umso mee hän mir uns um si kümmeret. Mer hän e glai Nachtässe gmacht. Aber doodervo het si numme wie n e Spatz gässe. – woorschynlig vor luter Uffreegig. –  Dernoo hän d Kinder d Kerzli am Dannebaum aazunde und s Paulinchen isch still und in sich versungge im Sässel vor em Beumli gsässe und het glänzigig Aeugli griegt. Und mir  hän e baar Wiehnachstliedli zum Beschte gää. Dernoo isch es ans Päggli uuspagge gange. E jedes het sy  s aige Gschänggli alle zaigt und – wie s esoo Sitte gsi isch – wider schön verpaggt, damit me s am nägschte Daag noonemool het könne uffmache und sich drüber freue.  Für s Paulinchen hets natürlig au e Gschänggli gää, schön verpaggt mit Lätschli draa und eme Kärtli mit guete Wünsch.  Mit zittrige Händ het s Paulinchen iir Päggli uffgneschtlet und e feine warme Schal uuspaggt. Si isch fascht e weeneli fassigsloos gsi vor luuter Freud . Au si het das Halstuech wiider ins farbige Wiehnachtsbabyyr gwigglet und dr ganz Oobe uff iirem Schooss bhalte bis si dr Wunsch güsseret het, si welli jetz widier hai. Mir hätte se liebend gäärn no e weeneli lenger b n is bhalte, aber s Paulinchen isch unruig worde. Also hämmer si wider zrugg ins Haim gfaare. Unterwägs isch äs aber widier munter worde und het druff bestande, uns s Haim z zaige. Si het is alles zaigt, vom Spyyssaal, dr Kuchi, em Ufenthaltsruum und sogar iir glai beschaide Zimmer. Im Haim het offebar scho Nachtrue golte, denn mer sin niemerem begeegnet. Si isch denn aber mied worde und het ins Bett welle. Mir hän is verabschiidet und sin gange.

S het guet do, hämmer alli gfunde. Derby hämmer fescht an s Grossmami dänggt und e baar diggi Schmützli in Himmel uffe gschiggt: ,Gäll Grossmami, das hätt dir au gfalle!’

 

 

4.34.  Geschtert – Die grossi Enttüschig.

Die grossi Enttüschig

Mit iirer grosse Liebi für alli Aarte vo Dierli isch aigetlig glaar gsi, ass d Dochter wött studiere und Tierärzti wärde. Aber dr Düüfel hets gsee: bi dr Uffnaamebrieffig fürs Gymi het d Noote bi der Mündlige nit glängt. Uus isch dr Draum gsi und si am Boode zerstöört. Kai Drooscht het si könne uffrichte. Au nit, ass si s uff em zwaite Bildigswääg noonemool könnt probiere. D Schuel isch wyter gange. Eine Tages isch si haikoo und het erkläärt, ass sie Schnydere well i wärde. I bi e weeneli verwunderet gsi, denn do sin jo Wälte derzwüsche glääge. Erscht vyyl spöter bi n i druff ko, ass das dr Wääg vo iirer Fründyn gsi isch und si sich do aifach aagschlosse het.

So het si die Leer aagfange und sogar im Rang abgschlosse.

4.35.  Geschtert – D Bruefswaal vom Soon.

D Bruefswaal vom Soon

Är het scho glyy gwüsst, wo sy bruefligi Laufbaan aane goot. Noo n ere Schnubberleer bim e Schryyner het är sy Härz ans Holz und sy Verarbaitig verloore. E Begaischterig, wo n er sich nümm het lo nää. So het är dernoo nach unserer Züglete uff Basel do syni Schryyner-Leer gmacht.

 

4.36.  Geschtert – Si sin flügge.

Si sin flügge

Blötzlig simmer ellai. D Dochter zrugg uff Züri und dr Soon goot noo dr RS uff Wältrais. Är raist muetterseelenallai duur Südamerika. E bsundrigi und wäärtvolli Lääbesschuel, wo sy wytere Wääg positiv beyflusse duet.

Mer hän nit gross Zyt Düümli zdrülle, will niemerds mee do isch. D Dochter griegt iire erschte Soon. Au dr Soon gründet glyy e aigeni Familie und scho mäldet sich au do Nochwugs aa. E härzig Maiteli und e weeneli spöter gits bi dr Dochter e zwaite Soon.

Jetz foot e neue Lääbesbschnitt aa: Grossmami si. Es isch aber nit esoo, ass mir jetz numme no Babysitte dien und für jeede Notfall könne yyspringe. Unser Lääbe isch no volle Termin und vor allem raise mer um die halbi Wält.

4.37.  Geschtert – Vo Züri zrugg uff Basel.

Vo Züri zrugg uff Basel

Bevor d Dochter d Leer aagfange het, simmer zrugg uff Basel züglet. Laider het s Grossmami das nümmi erläbt. Das wär e Freud gsi für si, uns in iirer Nööchi zha.

D Dochter het d Leer aagfange und dr Soon het no e letschts Schueljoor in Basel gmacht. Do het är grad no neui Fründe könne gwünne. Das isch so dr Dochter nümmi glunge. Si isch nach Abschluss vo dr Leer au glyy wiider uff Züri go woone. Aber baidi hän derfür no richtig Fasnacht könne erlääbe. E ‘Impfig’, wo fürs Lääbe hebt.

 

Damit das Erläbnis Fasnacht iine richtig ins Bluet gange n isch, isch d Dochter go leere pfyffe oder besser gsait: si isch go schnubbere. Es het ere nüt gsait und so het si das glyy wiider uffgää. Änlig ische s mit em Soon gange. Do ha n i welle Neegel mit Köpf mache und bi mit go drummle leere. Au das isch in d Hoose gange. I ha wägem Gschäft z oft gfäält und em Junge hets  gstungge ellai. Dr Instruggter isch au nit rächt uff is zue. Vyyl zspoot ha n i verstande, ass mir in e Clique hätte sotte go und nit privat Unterricht nää. Also hämmer is als Zueschauer an d Fasnacht gwogt. Dernoo het mi aber dr neui Maa uff d Ydee brocht, e Schääse z mache. Do isch au d Dochter derby gsi. Aber mer hän is nümmi könne aamälde am Cortège und hän miesse ‘wild’ faare. S het domools no zvyyl Schääse gha. Aber das het my Fasnachtsfaszinazioon yyglütte.

4.38.  Geschtert – Fasnacht.

Fasnacht

 

Fasnacht isch zu mym Jooresprojäggt worde. Noo dr Fasnacht isch vor dr Fasnacht! I ha scho für Joore zum Voruus Ydee entwigglet für Sujet und Goschdüm, und die ha n i au sälber gnait. Gueti 10 Joor Schääse-Fasnacht sind druus worde; aimool zämme mit myner Dochter, denn mit myner Fründyn, denn mit ere Bekannte und denn ainigi Mool ellai und spöter zämme mit em Grosskind. Fantastischi Joor, bsunders mit em Grosskind, wo myni Begaischterig dailt het. Stolz bi n i druff, ass i mee wie aimool im Fasnachtskaländer ko bi.

 

Als yygflaischti Baslere (trotz ytaliänischem Hintergrund) döörfe d Basler Tradizioone in mym Kaländer nit fääle.

5.  Hütte Hütte bi n i vor allem alt. Zwoor no fit, aber ebbe, do und döört gits e Zipperli oder sogar mee. Es ligt au scho e baar Joor zrugg, do ha n i e Härzschrittmacher ygsetzt bikoo. Mit däm lääb i guet. Numme aimool - e Batteryywägsel isch fällig worde - hets e Infägtion gää, was mehreri Ygriff zur Folg gha het.

5.1.  Hütte – S Alter.

S Alter

 

Wie könnts au anderscht si. Hütte stüürt s Alter alles, wo me macht oder nit macht und unternimmt. Altershalber het me au d Stadt verloo und läbt jetz uff em Land in herrliger Umgäbig. Freut sich an dr Natuur, gniesst s Voogelgezwitscher und losst d Seel aifach bambele. D Wunschlischte isch e weeneli kürzer worde und druff stöön mee Gsundhaitswünsch als anders.

5.2.  Hütte – Ebbe, s Alter.

Altwärde

Mer wärde älter, scho gly alt
Was duss passiert loot is zwoor kalt.
E jeede Daag das dumme Gschnuurr
Dasch doch Sälbschtinszenierig puur.
Wär kunnt in Bundesroot und wär goot?
Wäm goots sauguet, wär isch in Noot?
Me stellt fescht, bildet e Mainig.
Nit mit allem simmer ainig.
Für was das hoole, leere Gschwätz?
Gmacht wird doch nüt! Dasch ebbe lätz!
Demos sin sicher au kai Hilf,
Oder stoosch au mit dääne im Schilf?
Drum halt mi an d Affe-Reegle:
Nit loose, nit schnuure, nit luege,
Dernoo keit gar nüt uus de Fuege!

5.3.  Hütte – I wett, i wäär no Kind.

I wett, i wäär no Kind

 

Jetz isch er verby dr langwyylig Novämber.

Jetz kunnt dr vo vyyle erseenti Dezämber.

An jeedem Daag macht me jetz ains vo de Düürli uff,

Und verzwatzlet vor Spannig, was isch hüt ächt druff.

 

I wett, i wäär no Kind!

 

Hesch hüt e Hündli druff oder emänd e Katz?

Oder e Glüggskäferli oder e glaine Spatz?

Oder e Glöggli, wo d mainsch s deg grad bimmele

Oder vyyli Stäärnli, wo dien glänzig schimmere?

 

I wett, i wäär no Kind!

 

Dr sägsti isch wie allewyl e bsundre Daag.

Will dr Bsuech wo kunnt, i numme mit Mooris maag.

Dr Santiglaus ischs, är kunnt mit Sagg und Ruete.

Öpfeli und Nüss git är numme de Guete.

 

I wett, i wäär no Kind!

 

My Väärs freud en, drum maant är numme glaini Sache,

Wo n i bis im nägschte Joor sott besser mache.

Dr Mamme in dr Kuchi hälfe und nit gnaiffe

Und wenn si riefft ooni muule sofort raiffle.

 

I wett, i wäär no Kind!

 

Sisch nit z spoot, myner  Mamme danggschön zsaage.

Ängel diens iire in Himmel uffe traage

Si waiss, wie fescht si mir do unte fääle duet.

I ka s im Härz ynne spüüre und s duet mer guet.

 

I blyyb uff eewig iir Kind!

 

 

5.4.  Hütte – Facebook und so.

Facebook Plattform: Baseldytsch

 

Vor e baar Joor ha n i die Plattform entdeggt. Do ha n i öbbe ain vo myne Värs druff glaade. Hi und wiider het sich die Grubbe neume im e Baizli droffe. Do ha n i au welle mitmache und bi drzue gstosse. Es isch e luschtige Oobe gsi mit nätte Lüt. Nääbe mir isch e Frau gsässe und mer hän is uff Aahiib guet verstande. Es hets denn gää, ass mer glychzyttig uff e Haiwääg sind.’Uff welles Trämli goosch du?’ ha i gfroggt und si sait: ‘uff e 10er Richtig Arlese.’ ‘Aa, ich au’ ha n i gsait. So simmer zämme im Trämmli ghoggt und hän wyter blauderet. ‘Wo stygsch du uus?’ het si derno gfrogt. Wo n i gsait ha in Arlese sait si, si au. Also simmer zämme uusgstiige und wo mer is frogend aagluegt hän, sait sie: ’Ich woon im Lee.’ Und ich druff aabe: ‘Ich au!’ Do hämmer miesse härzlig lache. Numme zwai Blögg uusenand woone mer und sin sythär befründet. Die grossi Gmainsamkait isch unsri Liebi zum Basler Dialäggt.

 

5.5.  Hütte – D Pandemie.

Pandemie

 

Also eerlig, die het is grad no gfäält! Blötzlig isch es mit em Seel bambele loo verby. Gfange in de aigene vier Wänd! Isch zwoor nit so schlimm, wenn s nit befoole wäär. Döörfsch kai Bsuech go mache und kaine dehaime begriesse. Und d Familie kasch högschtens über ‘face time’ gsee. Das isch hart, au wenn s is suscht an nüt fäält, Härz und Seel lyyde fescht. Und uff aimool draage alli Mensche Masge. Me ka numme no d Auge gsee. Kasch ungstrooft jeedem e Grimasse schnyyde. Aber luschtig isch es öbbe gar nit.

 

 Unter 'Corona-Zyt' sin Gedangge und Gfüül beschriibe.

5.6.  Hütte – S Kultuurlääbe isch erlosche.

S Kultuurlääbe isch erlosche

Kai Voogel Gryff, kai Fasnacht. Wie solle mer das uushalte? Fründ und Bekannte winggsch vo wytem zue. Wenn s goot, schreysch über d Stross: ‘Wie goots?’ E schlimmi Zyt, wo mer schnäll vergässe wänn. Und es isch esoo. D Zyt vergoot und irgendwenn lääbe mer wider normal.

 

6.1.  D Jooreszyte und iiri Brüüch – D Oschterfyyrdig.

Am Griendonnschtig gits Spinaat und Spiegelaier!

Am Karfrytig Fisch und für dr Babbe e Zwaier.

Am Samschtig bisch denn ändlig wider duss!

Verby isch dää langwyylig ‘braav si’ Stuss.

Ooni dr Schoggi-Oschterhaas,

Sy Näschtli voll Aili im Grass,

Hätti die Dääg gärn uff e Mond uffe gschosse.

Gar nüt isch loos gsi, alles gschlosse.

Me het nit döörfe go schwanze,

Scho gar nit öbbe go danze.

Kino isch soowisoo verbodde gsi,

Ainzig  bim Zolli hesch döörfe verby.

Wüsse die Junge wie schön si s hüt hän,

Mache z döörfe, grad was si wänn?!

6.2.  D Jooreszyte und iiri Brüüch – Dr Oschterhaas.

Dr glai Haas drait e Zainli uff em Rugge.

Är het vyyl z due, muess sich allibott bugge,

Um irgendnaime syni Aili z verstegge.

Är duet schnäll sy Hälsli stregge:

Het ärs gschafft, het s au wirgglig glabbt?

Het en ächt öbber derby ertabbt?

S isch für d Kinder s gröscht Vergniege,

Ains vo syne Näschtli z griege.

Zerscht aber muess me si finde.

Vilicht döört hinter de Winde?

D Mamme hilft mit ‘kalt' und 'haiss'!

Wohär si das au numme waiss?

 

6.3.  D Jooreszyte und iiri Brüüch – Dr Frielig.

6.4.  D Jooreszyte und iiri Brüüch – Dr Frielig stoot vor dr Diir.

Dr Frielig stoot vor dr Diir

 

No hängge gääli Wulgge am Himmel oobe.

S het fyyne Saharasand zue uns verschoobe.

Ainewääg druggt d Sunne duure mit aller Graft.

Es goot bestimmt gar nimmi lang bis si es schafft.

Denn weerme iiri Straale nit numme d Ärde,

Unsri Seele wänn au wider uffgwegt wärde.

S bruucht weeni zem Ufgstellt si und gueter Luune.

De nimmsch wider mee woor, kunnsch nit uus em Stuune;

Bleddli dryybe und Gneschbli giggele fiire.

D Botschaft isch dytlig, mer dien dr Frielig spyyre.

 

6.5.  D Jooreszyte und iiri Brüüch – Frieligsgfyyl.

Seesch, wie scho lindgrieni Kepfli duure drugge?

Farbigi Bliemli giggele uus de Lugge!

D Sunnestraale gän beraits e weeneli warm.

Kasch mit em Schatz in d Sunne sitze Arm in Arm!

Dr Wind stryycht samft und waich iber Bagge und Gsicht.

Dr Winter verliert langsam und voorzue an Gwicht.

Dy Härz wird lychter und frei und dy Luune au.

Kenntsch e jede umarme, eb Maa oder Frau.

Loss dy Seel fladdere und tangg se uff die Grafft.

Damit gnue hesch, wenns wider Lyyde schafft.

Alles isch vergänglig, dr Daag, s Joor und s Lääbe.

So isch dr Graislauf, aber nyt isch vergääbe.

 

6.6.  D Jooreszyte und iiri Brüüch – D Maieriisli.

Maieriisli

 

Die Glöggli bimmele so schöön,

Me höört zwoor laider kaini Döön.

Wie Glogge im e Kiirchduurm oobe

Bambele si in wysse Roobe;

Si verkünde n is dr Maie!

Duet dr Wind e weeneli waie,

Kasch ganz e fyyne Glang hööre.

Muesch es numme fescht beschwööre.

D Vöögeli singe im Koor mit.

Höörsch s herrlig Kiwitt, Kiwitt?

6.7.  D Jooreszyte und iiri Brüüch – Dr April.

Dr April

 

Aprille gschpränggt, Aprille gschpränggt,

Dr Joggeli het in d Gülle glängt!

So foot är aa, dr Moonet April,

Wo allewyl numme macht, was är will.

Zerscht stoot am Himmel d Sunne und lacht.

Scho sin Hummeli und Biinli uffgwacht.

Es schwirrt in dr warme Luft und summt

Bis au das blötzlig wider verstummt.

Wie uus Küübel räägnets jetz dry;

D Bliete vo dr Stärnmagnolie göön yy!

Blinzlet au d Sunne glyy wider aabe,

Kasch en nümmi beheebe dää Schaade.

Denn trällere d Vöögeli wider iiri Liedli

Und in dr Sunne bruucht me scho e Hietli.

Kasch dängge Näägeli, so goots nit wyter!

S Wätter drait und wird jetz richtig schyter.

Dr Winter huucht noonemool übers Land:

Schneeflogge degge alles zue bis an Rand.

In dr Nacht duet dr Froscht d Pflänzli blooge.

Was wird ächt uus de Kirsi, duesch di frooge?

Uus Aprikoose, Zwätschge und so wyter?

D Prognoose sig schynts zimli schyter.

Es wäggslet vo yysig kalt bis haiss.

Was für e gspässige Wätter-Grais.

Dr Frielig bruucht zem Koo sy ganzi Graft

Bis es denn au dr Winter ändlig rafft.

6.8.  D Jooreszyte und iiri Brüüch – Dr Rääge.

Dr Rääge

 

Duss isch es grau und wulggeverhange.

Wo isch denn au d Sunne aane gange?

Si het em Rääge s Zepter überloo.

Si wird denn scho wider füre koo.

Syt Stunde räägnets jetz voruss.

D Pflänzli dringge gierig und voll Gnuss.

D Wüürzeli im Boode dien sich stregge,

Um dää Lääbenssaft yyne z schlägge.

Wenn sich denn dää Wulggevorhang verziet,

Erhaiterets nit numme unser Gmiet.

S Muul blyybt dr grad offe stoo:

Blötzlig isch alles farbig uusekoo.

Alli Gnöschpli sin jetz blatzt und offe.

S ganz Land isch mit Bliete überloffe.

Rot, gääl, grien, wyss, rosa und blau

Häns vertriibe, das aidöönige Grau.

Als ob e Mooler mit sym Bämsel gläggst

Und wie im Määrli Wiise und Boim verhäggst.

De bisch beyydruggt vo dääre Pracht.

D Natuur isch ändlig wider verwacht!

6.9.  D Jooreszyte und iiri Brüüch – Ränge-, Räägedröpfli.

Rääge-, Räägedröpfli

 

Dr Petrus het mit ene Verbarme,

Mit de durschtige Pflänzli, de arme.

E baar schüüchi Dröpfli kömme zerscht

Bis denn e heftige Landrääge herrscht.

Dr Boode suugts mit Hoochgnuss yyne.

Är hofft, dr Himmel möögi wyter gryyne

Bis sich alli Bleddli wider stregge

Und d Bliemli d Köpfli noo uffe regge.

Wenn d uuseluegsch isch s zwoor drieb voruss

Aber für d Natuur isch s e grosse Gnuss.

Me könnt trotzdäm uuse go spaziere

Halt under em  Räägeschirm flaniere.

De kasch mit em Schatz nooch zämme koo

Und Arm in Arm duur dr Rääge go.

Nimm by allem numme s Guete uuse,

Denn kasch jede n Oobe säälig pfuuse.

6.10.  D Jooreszyte und iiri Brüüch – D Schwalbe.

D Schwalbe

 

Lueg emool, wenn Schwalbe Fangis mache!

Denn lööns si s nämli so richtig grache.

Das isch Jääglis mache in Rain-Kultuur.

Do e Spitzkeeri, gseesch kuum iiri Spuur,

Denn säägle und wider zrugg im Ziggzagg.

Do derby gits nit aimool e Higghagg,

Kai Zämmestoos, nüt! Si könne s pherfäggt.

De seesch iiri Froid und spüürsch wie das fäggt!

So wändig und diifig fliege die Maischter.

Si kömme und göön fascht wie Gaischter.

Lueg au, wie si duur d Luft duure flizze.

Me könnt fascht maine, es wurdi blitze.

Für aimool machts Sinn, ass d Wulgge dief hange

Suscht könnte d Auge das Spiil nit yyfange;

Si wääre denn nämli vyyl z hoch oobe

Ainzig mit em Himmel verwoobe.

6.11.  D Jooreszyte und iiri Brüüch – Hitzegedangge.

D Sunne schyynt, s isch gruusig  haiss.

Langsam dröpflet mir dr Schwaiss

Vom Hals diräggt in Uusschnitt abe,

Möcht am liebschte gar nüt draage.

Die Dröpfli grällele über d Hut

Am liebschte wär i fuudi blutt.

Wie schön wär e weeneli Wasser;

S wird sunscht numme no vyyl krasser.

S blyybt laider e baredyysische Draum,

Nit numme für mi, au für jede Baum.

Dropfe, wo  uus em Himmel falle,

Das wurd mir jetz am beschte gfalle.

Denn due n  i im Rääge umme tolle,

Und wenn i nass wird,  spiilts au kai Rolle.

6.12.  D Jooreszyte und iiri Brüüch – Dr haissi Summer.

Dr haissi Summer

 

Jetz isch är do dr Summer und die grossi Hitz.

Mer dien scho schwitze wie prässdi Zitrooneschnitz.

Blangd hämmer doch uff so sunnigs Summerwädder,

Uff s Schwaadere in dr Badi und s Gepflädder.

Oder nimm halt e Gaarteschluuch und sprütz di ab,

Grieg jo kai Sunnestich, susch machsch emänd no schlabb.

Kai Lüftli goot, numme d Ventilatoore kasch hööre;

Bi sottiger Hitz duesch au du do druff schwööre.

Jetz haische mer vom Petrus  bigoscht scho Rääge.

Dää loot är mit Gnuss duur s Land duure fääge.

Yyswürfeli bruuchsch au kaini lo yygfriere,

Die duet är wie Bötsch grad sälber ummeriere.

Lueg numme, ass s Audi in dr Garaasch hesch

Und de dr Puul nit blötzlig im Käller gseesch.

Sandaale und blutti Fiess kasch schnäll vergässe.

Warmi Sogge sin jetz uff all Fäll aagmässe.

Het dr Petrus dr Blausch, mit is Katz und Muus z spiile?

So gseets uus, denn d Sunne duet wider füüre schiile.

 

 

6.13.  D Jooreszyte und iiri Brüüch – Gedangge zem Herbscht.

 

Pscht….halt yy, loos und sig still,
Pass uff, was dr Wind dir saage will!
D Sunne git is nümm rächt warm,
D Vögel ziehn furt, Schwarm um Schwarm.
Dr Summer isch schön gsi; är möcht jetz go.
Zyt isch ko, em Herbscht s Zäpter züberloo.
D Farbe verlösche, wärde graftlos und madd.
Dr Wind stürmt, rüttlet und lööst s letschte Bladd
Uff em Wääg dürme sich die vyyle Bledder.
S git schlächter Wädder und wird kelter.
D Natuur legt sich zum Schloofe aane.
Es gilt, dr nägschti Frielig zblaane.

6.14.  D Jooreszyte und iiri Brüüch – Dr Winterschturm.

Es stiirmt sit Stunde ununterbroche.

E mänggem Baum syni Aescht sin broche.

Es hyylt duur d Luft und gläbbered.

Do und deert heersch es tschäddere.

E weeneli Angscht fyylsch au derby.

I winsch, dää Sturm sig glyy verby.

Wie uus Kiibel duets au no schitte.

Dehaime blyybe isch s Beschte hitte.

D Gneggis deerfe drum dehaime blyybe:

Äer sell doch sy Unwääse ruig wyter  dryybe.

6.15.  D Jooreszyte und iiri Brüüch – Dr Schnee.

Vor mym Fänschter danze wyssi Flöggli.

Wie ne Lyynduech degge si d Ärde zue.

Alli Bäum draage luftigi Röggli.

Buebe und Maitli griege dervo nit gnue.

 

D Goofe danze uusglasse und juuchzge,

Baue e Schneemaa mit Rieblinaase!

Bevor d Weermi die Pracht ewägg duet butze,

Gumpe si duur d Hüffe wie glaini Haase.

 

Und wie sie danze, die waiche Flogge!

Si degge s Grau und dr Drägg aifach zue

Als wurdi d Wält im e Schuumbaad hogge;

Alles um sich vergässe in friidliger Rue.

 

Do bimmelet in miir fyyn e Glogge:

S isch Zyt für friidligi Stilli und Rue.

Kai Lärm, kaini Lämbbe, niemerds blooge!

Wie wärs? Bebbi was mainsch denn Du derzue?

6.16.  D Jooreszyte und iiri Brüüch – Dr Santiglaus.

Santiglaus

 

Dr Santiglaus kunnt hütte.

Är kunnt us ere alte Hütte.

Aer het sy Eseli belaade,

Will ärs ellai nümm ka draage.

Är goot zu Kinder vo Huus ze Huus.

Nimmt uus sym Sagg d Oepfeli druus.

Wenn ains e Värsli saage ka,

Döörfs denn dervo e baari ha.

Mängmool isch dr Schmutzli derby.

Mängem goot denn s Lache verby

Dää isch denn nämli  zimli  gfitzt,

-Vor allem syni Ruete pfitzt -.

S git Kinder, wo nit dien folge,

Denn gits in sym Buech e Dolgge.

Für die nimmt är d Ruete füüre

Oder stellt si für e Momänt vor d Düüre.

Denn döörfe si die Ruete ha;

S het nämli Nüss und Biire dra!

 

6.17.  D Jooreszyte und iiri Brüüch – Wiehnacht.

D  Wiehnacht, s Fescht vom Liecht!

 

Im Stall isch s zimmli kalt und fiecht,

Dr Josef hebt sy Laddäärne-Liecht

Über s glaine Biebli, wo schlooft im Strau.

Dr Oggs rutscht nooch aane, dr Esel au.

D Maria deggts no mit em Schleier zue,

So het das Kindli herrlig warm und Rue.

Am Himmel stoot  e funggelnde Stärn

Är  rieft allne zue vo nooch und färn:

Kömmet go stuune, kömmet go luege!

Glyy blinzle Auge duur  Ritze und Fuege;

Alli sin glügglig und dien Halleluja singe.

Uff aimool höört me andri Stimme glinge:

Dr Stärn het drey eedli Köönig do aane gfiert.

Si sin bis dief ins Härz yyne vom Aabligg griert.

Gschängg hän si brocht für das Kind und bättet:

Mit Friide und Freud wird d Wält jetz grettet!

Drum fyyre mer Wiehnacht Joor für Joor

Und hoffe uffs Neui, es wärdi woor.

                                                    

6.18.  D Jooreszyte und iiri Brüüch – S nei Joor.

E weeneli wie Haiwee!

 

Was isch es numme, wo prägt und fesslet?

Was wurzlet so dief und waggst aim ans Härz?

Wo d bsunders denn spüürsch, wenn s tätscht und kesslet

Und mängge Ärde-Flägge hüült vor Schmärz!

 

Füülsch di glügglig und säälig, bisch dehai.

Bsinnsch di uff dyni aigene Wurzle.

S isch wyt ewägg s Hüüle, s Gschrey und derlai.

Aber s paggt di, losst d Gedangge burzle.

 

S Joor isch verby mit vyyl Lärm und Schregge. -

Bringts nit au Weermi uff und Danggbarkait?

S duet zümftig duure schüttle und wegge.

Wie wärs mit e weeneli Beschaidehait?

 

Fürs Neui Joor für alli ai Vorsatz,

Sorg ha zur Wält foot scho aa im Glaine:

Bi diir!  Lueg diir guet wie zem aige Schatz.

Loss Friide und Schönhait in dir kaime.

 

D Lääbeszyt isch so koschtbar, drum dail se n y

Fürs Loose, Luege, Spüüre und Schmegge.

Mach d Auge n uff für dy Haimet am Rhy;

Heb Sorg zue däne verddraute n Egge.

 

Bsinn di uff das, wo wichtig isch und pflägs,

Damit s nit kaputt goot und verschwindet.

S bruucht nit e Huffe, aber jede Gläggs

Wird zur Schwetti, wo kittet und bindet.

 

Trifft my Wunsch euer Härz und offe Oor

Bringts für alli – mit e weeneli Gschigg –

E huffe Schöns und Gfreuts im neue Joor:

Gueti Gsundhait, Freud und, wäär weiss, au Gligg.

7.1.  D Basler Jooreszyte – Dr Vogel Gryff.

D Wiehnacht isch scho lengscht vergässe.

Dr Drey-Keenigs-Kueche isch au scho gässe.

Wär isch dr Keenig gsi, i waiss es nimm?

Au das isch vo geschtert und nit so schlimm.

Jetz goots mit Riiseschritt dr Fasnacht entgeege,

Drum muess mi gar nit lang bsinne und iberleege,

Was Wichtigs als nägschts vor dr Dyyre stoot:

Dää, wo dr Rhy ab danzt uff sym flache Boot.

S glepft und dätscht dusse uff em Bach.

Fir aimool wird är gliebt dää Grach.

Dr Wild Maa hebt sy Dännli fescht in dr Hand,

Denn kuum styggt är uus und goot an Land,

Wänn Buebe und Maitli syni Epfel stibizze.

Är duet si aber mit sym Dännli pfitze.

Är danzt denn zämme mit Gryff und Lai

Si hipfe, gumpe und lipfe d Bai.

Me heert au d Ueli-Gleggli lyte.

D Lyt mache Blatz und geen uff d Syte,

Doch zerscht streggt är sy Biggse aane.

Du waisch was dry gheert, kasch es aane.

Si danze bis in d Nacht, emool do, emool deert.

D Eere-Gsellschafte wärde do dermit geert.

 

7.2.  D Basler Jooreszyte – Basel und d Fasnacht.

Was stellt is d Heerli uff im Gnigg,

Wenns am Mäntig vieri schloot,

Du di sälig fyylsch und voller Gligg

Und ändlig d Fasnacht vor dr Diire stoot?

 

Werum grällelets aim vom Rugge bis in d Schue,

Wenn d Kopf-Laddäärnli d Freie abe kemme?

Du stuunsch und luegsch und griegsch nit gnue.

Laufsch mit im Taggt, wo alli kenne!

 

Was isch es denn, was is so fesslet

An dääne drey Dääg im Joor?

Wenns duur d Gasse pfyfft und kesslet

Und d Deen glääbe blyybe in dym Oor?

 

Do bisch uff d Wält ko, do bisch dehai,

Tiggsch wie Basel und kasch ‘dytsch’ reede!

Die Liebi isch ainzig, doch bisch nit ellai.

Basel dien no duusig andri au meege!

7.2.  D Basler Jooreszyte – Basel und d Fasnacht.

E Schääse

E Schääse

 

E Draum isch s Fasnacht mache allewyl,

Aber uff ere Schääse hogge isch my hailig Zyyl.

Vo deert oobe uff d Fasnacht z luege,

Bringt my Härz ganz uus de Fuege.

Do fyyl  mi wie d Frau Fasnacht hegscht perseenlig.

I droon deert oobe und bi drey Dääg verseenlig

Mit allem, wo mi s Joor uus duet druurig mache.

Im Gägedail jetz ka n i härzlig driber  lache.

I heer d Tambuure iiri Wirbel schloo.

Und druff d Antwort vo de Piccolo.

Vordra wird e grossi Laddärne drait.

Dr Stolz vo jeder Clique, wie me sait.

I gniesses und heb ab in e andri Wält.

Nyt mechti misse, nit fir alles Gäld:

Nit s Ruesse und Pfyffe in alle Deen,

Nit dr Fasnachts aige Schritt, wo alli geen,

Nit s Schränze vonere Gugge; loos wie s fäggt.

Farbe, Deen, alles wird yyne gschläggt.

S Huefgeglabber dringt wider duure vo de Ross;

My Gutsche, zwai Ressli, was fir e scheene Tross!

‘Hesch mer au e Bliemli?’ sait ains im Bajass-Glaid.

‘S isch fir my Mamme, si hätt e Frayd.’

‘Do nimm das Mimeesli und bring ere s hai

Und fir di ha n i e Dääfi oder au zwai’.

Do e Bliemli, deert dr Zeedel mit drääfe Sprich.

Die Sääligkait macht mi fir s ganz Joor rych,

Bis  i wider schmigge ka my Schääse

Und uffdauche deerf als neis Fasnachts-Wääse.

7.3.  D Basler Jooreszyte – Vor dr Fasnacht.

S gribbled scho im Buuch und zuggt

S Härz bebberlet wie verruggt.

Was isch au das, was kennt das si?

D Wiehnacht isch doch lengscht verby?

 

Ebbis vyyl Gressers biwegt mi Härz

Mängmool isch es fascht scho e Schmärz.

D Frau Fasnacht isch do und glopft an d Diire:

Waart, i hol Larve und Goschdym fiire!

 

I blang jo scho lang, ha gnait und glyymt,

Han e Zeedel dichtet,  wo sich ryymt.

Jetz will i ab uff d Gass, i bi birait

(E Räägeschutz wird baardu au mitdrait.)

 

E Fasnacht, wo alli Saite zem Schwinge bringt!

E Fasnacht, wo dyni Sorge in en Egge zwingt!

Gniess die drey scheenschte Dääg do am Rhy;

Bebbi, gäll do simmer  gärn drby?

 

7.4.  D Basler Jooreszyte – My Fasnacht 1998 Mer baue ab.

Mer baue  ab! *

 

*Abbaue haisst: e restruggdurierts

  Fusions-Konzentraat flexiibel

  fokussiere

 

Nit nur d Kemyy und Bangge

Kemme mit de Struggduure ins Wangge.

Wotsch uf em Erfolgsglais no mitfaare,

Haisst d Devise abbaue* und spaare.

Im Ellaigang bhauptsch di hit nimm,

Aber abbaue* isch jo nit so schlimm!

Drum folge au mir dääre Wälle;

Mer gheere schliesslig zue de Schnälle!

 

Drum baue au miir jetz ab!*

 

Alles was mer nimmi bruuche

Dien mer ufs Minimum zämmestuuche.

Do muesch nit lang studiere:

An de Gfyyl kaasch gwaltig reduziere.

Niene investiersch eso schlächt,

Wie dy Härz bim andere Gschlächt.

S koschtet numme Zyt und Gäld,

Doch wärt isch s kain uf dääre Wält.

 

Loos, kemmet,  mer baue ab!*

 

Fir was bruuche mer si denn, die Männer?

Zletscht blyybt doch maischtens nur e Schämmer.

Si hän kai Mumm me in de Gnoche.

Mit Gligg kenne si no Kaffi koche.

Satti Wäädli, Oberärm mit Myysli

Bringe kai Giygeli uus em Hyysli.

D Mischtkibel draage mer sit langem sälber uuse

Und bim Schmuuse dien si glyy säälig pfuuse.

 

Mer baue ab: und jetz erscht rächt!*

 

Blangsch und wirsch doch emool schwach,

griegsch poschtwändend aini uffs Dach.

Äntwääder bisch nur aini under vyyle

oder  si Ditti zem e weeneli spiile.

Drum sage mir: lieber futt mit Schaade,

Bivor miir Fraue geen go baade.

Ruume miir uff dääre Wält nit uff

Verstigge mer in däm eewige Männer-Buff.

 

Dr ainzig Wäg: mer baue ab!*

  

Dr Abbau* däät au em Bundesroot wirgglig guet

Dert näämte mindeschtens grad 6 dr Huet.

S gäb denn au kaini Zircher mee,

Und das däät sowiso niemetsem weh.

E ganze Staat kenntsch abbaue!

Oder gits im Vatikan ebbe Fraue?

S Arbetsamt miecht d’Schalter zue,

Denn fir d Fraue gäb’s denn Arbet gnue.

 

Gseesch s y? Miir baue ab!*

 

Dr Grossroot spaarti e mänge Batze,

Verzichtsch au deert uff Schneuz und Glatze.

Au d Eeregsellschafte wääre gschtriche,

D “Eer” isch jo längscht vonene gwiche.

D Bilanz isch guet und miir sin zwääg.

Mer wisse, miir sinn uff em rächte Wääg.

E himmlisch Baredyys uff Aerde

Kennt d Wält ooni Männer fir is wärde.

 

E modäärne Drigg, dr Abbau-Tigg!*

 

Doch fascht hätte mers ibersee:

S gäb jo denn au kai Comité!

D Frau Fasnacht aber blyybt wie allewyyl,

Und das isch letschtlig unser Zyyl.

Nur ebbis no in perseenliger Sach,

Das macht au e Zwätschge schwach:

Ain goot bi däm Abbau nit under!

Dr Dambuurmajor; vo de Rumpel kunnt er.

 

Hauptsach isch doch: uns goot’s guet!

 

 

7.4.  D Basler Jooreszyte – My Fasnacht 1998 Mer baue ab.

Dr Wunsch an Petrus

Was mainsch, macht är mit oder emänd nit?

Isch är gfruschdet oder uffgstellt und fit?

Schänggt är is e diefblaue Himmel

Ibers fasnächtligi Gewimmel?

Losst är Thämperatuur nomool singge?

(är stoot jo dehai in warme Fingge!)

Losst är d Baim lo Knospe dryybe?

Nai - är muess nit so iberdryybe.

Losst är d Frau Holle Kissi schittle?

Dr Wind an de Ladäärne rittle?

S wird mer sturm, daarf nit dra dängge.

Due d Händ vor dr Bruscht verschrängge:

Gäll liebe Petrus, Du machsch was du wotsch,

Aber verschoon is vor Rääge und Pflotsch!

S länggt, wenn s drogge isch und nit z kalt.

Denn machsch au du in Basel Halt.

 

7.5.  D Basler Jooreszyte – Noo 10 Joor Pause: My Fasnacht 1999 s Grälleli .

S Grälleli

 

Waisch ächt no, im letschte Joor an dr Fasnacht!

Do hani mit vyyl Witz au e Zeedel gmacht.

Jetz dueni mi syt Stunde schregglig schinde,

Um ai oder zwai gueti Zyyle zfinde.

 

Was soll denn hit no soone Zeedel saage?

Wäm gosch dermit so richtig no an Graage?

Isch denn en Affäre “Clinton” no witzig?

So ebbis macht doch nur e Fifi hitzig.

 

Änderisch ebbis? - probiersch es bolitisch?

Loost ebber no zue? - bisch offe und gritisch?

Muesch zerscht Baim yypagge, bivor si kasch gsee?

Gits nyt z dängge, duets nit e bitzli wee?

 

Ebbis scheeners hani mir yyfalle losse;

Kai “besser wisse”, kaini lääre Glosse.

Vom Yyneloose kunnt dr poetisch Värs.

Wotsch en heere und gniesse, also wie wär’s?

 

SchpYyrsch wie d Summerveegeli dien fladdere,

Wie vor Fraid und Gligg d Gney aafeen schloddere.

S gribbelet im Gnigg und grällelet im Buuch,

Grad wie em Frielig si erschte, warme Huuch.

 

Vo Kopf bis Fuess paggt alli d’Gliggsäligkait.

Wie ne Fieber macht sich d Bigaischterig brait.

Schnäll vergässe isch was aim sunscht ploggt und druggt

Und s Härzli hipft und bebberlet wie veruggt.

 

Waisch denn wirgligg nit fir wär und nit wieso,

Ass dy Seel gumpt und hipft wie n e glaine Floo?

Stritt’s nit ab, nimm’s aa und stand ändlig derzue,

Uus ischs und verby, au mit dynere Rueh!

 

Jetz aber geen mer dra, jetz pagge mer uus:

Vo geschter uff hit nimmsch no s letscht Aug voll Pfuus

Denn empfangsch dy gross Liebi mit Aah und Ooh:

Die drey scheenschte Dääg, d Fasnacht isch wider do!

7.6.  D Basler Jooreszyte – My Fasnacht 2010 Hämmer aigetlig alli e Vogel?.

ujet: Hämmer aigetlig alli e Vogel?

 

Spinne dien si uff dr ganze Wält

Und das nit numme wägem liebe Gäld.

E Mänge het im Hirni oobe

E Vogel wo duet umme toobe

(S gilt als schygg und mega in

Hesch wenigschtens so ain drin!)

Hän Sii do dervo emänd zwai?

Denn geen Si gscheider wider hai.

Vo dääne gits nämli scho e Huffe,

Wo dr Verstand grad duet verpuffe,

Kuum schalte si dää vermaintlig yy.

 

Wie gseets numme scho im Roothuus dry:

(Bigoscht die scheenscht Woliere vo dr Stadt)

Root, Grien, Gääl häns zämme glatt;

Hipfe vo ainer Partei zer andere,

Verduuble Zyt mit Schryybtischwandere!

 

Dierschitzer hän  bsunderi Veegel.

Do styygt bi miir im Nu dr Peegel.

Dy  Vogel sotsch pflääge wie dy Goof,

Muesch em Liedli singe bis in Schloof.

Schliesslig gälte d Rächt fir alli glyych:

Dr Babbegai wird durchs Erbe ryych!

Am Änd dailsch mit dym Hund sy Hysli,

Dr Kääs isch numme no fir d Mysli.

Do gits numme ains, i zell uff drey:

Dää Vogel isch zem Abschuss frey!

 

S’git uff dr Wält verruggti Sache:

Wääse zwische Monschter und Drache,

Wäder Gockel no Gaier, s wird dr glunge!

Kai Hirni derfir zwai spitzi Zunge,

Ka nit pfyffe – jetz isch es klaar

Uus dr Wieschti brielts: Muammmaaaaar.

Das hämmer jetz wägem Gaddhafi:

Gly suffemer im Schwoobeland dr Kaffi!

 

S schwarz Veegeli vo Amerikaa

Het in syner Schuel kai Geigi kaa.

Är seet d Schwiiz im Norde oobe

Und Schwede sunscht naime verschoobe.

Sii, das wär d Leesig, jo diräggt famoos,

Mir wäre d UBS uff ai Schlag loos.

Vilicht diens d Schwede jo verschtoo,

Ass me de Bängger muess d Boni loo.

Sunscht kennte si ooni dää Sääge

Iiri  Vogelschwärm jo gar nit pflääge!

 

Ums Gschlächt vo Hiener z’definiere,

muesch hit Sprooche go studiere.

Denn numme mit dr Ändig ‚in‘

Sygs au wyyblig – duss wie dynn!

 

Dr polnisch Vampyr het Biss.

(Oder emänd numme Schiss?)

Interpol suecht en jo scho lang

Jetz fraye sich d’Ziircher iber dää Fang.

Usser in sym Chalet  sitze,

Bringt en hit nyt mee zem Schwitze.

Iim duets Alter uff dr Buggel rugge,

Drum muess au är Viagra schlugge.

Laider fäälts an Noowugs nit;

Scho macht z‘Zyri dr glai Carli mit.

Wie bleed sin aigetlig die Gyggeli?

Zaigsch Stytz, scho hesch se am Wiggeli?

D‘ Moral vo däre Gschicht isch fir d Katz:

Do het nit emool e Spatzehirni Blatz.

 

S Theater um die hailige Dirm!

(Y kaas nimm heere, grieg grad Wirm)

Hämmer is emänd ibernoo und verhaue?

Wo solle d Storgge jetz iiri Näschter baue?

 

Jetz froog ych Sii mit mym letschte Satz:

Hän Si e Spatzehirni oder numme e Spatz?

Oder maine Sii emänd gar nyt zvermisse?

Denn het sicher grad ain yynegschisse.

 

7.6.  D Basler Jooreszyte – My Fasnacht 2010 Hämmer aigetlig alli e Vogel?.

My Vorfasnachtsbrief

Liebi Verwandti, Frynd und andri,

Scho lang ischs här, ass i mitgmacht haa,

Aber jetz foots fir mii erscht richtig aa.

Die Fasnacht wo kund, kasch Gift druff nää,

Wird fir mii die Scheenscht, wos je het gää!

Am Brööble bi n i scho syt em Summer.

‚Glabbt alles?‘ isch mi ainzige Kummer.

S Süschee ha n i glyy, d Ydee dien mi blaie;

Jetz goots ans Zaichne, Schnyyde, Glääbe, Naie.

S Goschdym isch gnait, dr Zeedel scho druggt.

Jetz machts Waarte mi halb verruggt.

Frau Fasnacht so kumm! I bi baraad.

S sott ändlig loos go, i schloo sunscht s Raad.

S Ergäbnis vo myne Fyrz isch e Schääse

Mit Goschdym und Larve, so uuserlääse,

Ass i sicher bi, mir dien Eych gfalle

Und Iir vor Stuune numme no kennt lalle.

Am Mäntig kemme mer vo dr Huetgass häär,

Punggt halb zwai (allewyl ooni Gwäär).

Deert biege mer in d Gärbergass y

Schlöön die ‚Ysseri‘  richtig Seibi y.

Am Banggverain gits en erschte Halt.

I hoff, mir hän deert nit zfescht kalt.

S goot wyters, ebbe am zää vor drey,

Voruusgsetzt d Brugg isch vo Stau frey.

Mer halte au an dr Muschti aa.

Mien sicher no ebbis z Dringge haa.

Denn goots wyter ins Getimmel

In haissgliebte Fasnachts-Himmel.

Wotsch is au am Mittwuch see,

Das fänd e mer e Bombenidee!

Am halbi zwai an der Yysegass!

Mer hoffe, d Sunne schyynt nit nass.

Dissmol nämme mer die ‚Inneri‘ iber dr Rhy,

Faare richtig Muschti und deert ooni Halt verby;

Mer halte erscht in der Neechi Waisehuus.

Kai Angscht, dr Pfuus goot is no lang nit uus.

Am drey oder so goots wider loos:

Bim Wettstaiblatz wyters uff dr Stroos,

Iber d Brugg an d Seibi fire.

S isch glyy Zyt zem Ändstraich fiire.

So jetz längts bigoscht mit Beschryybe!

Wott nit d Fasnacht scho hit vertryybe.

I frai mi, wenn i Eych darf entdegge,

Und e baar  Mimöösli aneschtregge.                

                                                                    

7.7.  D Basler Jooreszyte – My Fasnacht 2011 Alt, aber nit vo geschtert.

ujet 2011:

Alt, aber nit vo geschtert

 

Wie schnäll isch me hit nimm in und ooni Pfuus

Bisch antigguiert, verstaubt und kunsch nimm druus!

Hesch kai Aanig vo däm wo zellt uff dr Wäld,

Emänd bisch au nit vermeegend, hesch kai Gäld?

 

Gheersch wie Blunder zem Schrott und Alt-Yyse,

Bisch lengscht nimm gnaggig oder e Dyyse.

Vergässe kasch au dyni innere Wäärt;

Die sin scho lang nimme gfrogt uff em Määrt.

 

Aber so wämmer das nit stoo losse,

Sunscht wär das numme e lääri Glosse.

Miir mechte glaar und dytlig bewyyse:

Nit alles Alte gheert au zem Alt-Yyse!

 

Nimm zem Byspiil uns alti Dante:

S Gsicht voll Runzle und au Kante.

Miir gheere zer Fasnacht wie s Minschter zue Basel

Oder zem ‚Stapi‘ Morin si bleedsinnigs Gfaasel.

 

Nääbe uns baide gits soo vyyl Antiggs,

Sau guets und unentbeerligs Zyggs!

Was het sich drotz Neierige biwäärt?

Isch bis hitte ainewääg nit verjäärt?

 

Lueg no linggs und rächts, no vorne und hinde;

Kasch duusig gueti alti Sache finde!

Muesch aifach e weeneli noochedängge!

Dr Grind muesch derby nit emool verrängge.

 

Sit vyyle hundert Joor oder  no mee dervor

Bruucht me zem Byschpiil e Strääl fir syni Hoor,

E Spiegel zem Luege, ob d Friise au sitzt,

E Fingerhuet, ass d Guufe d Finger nit ritzt,

 

Kaasch die Uffzellig verlaidig lang uuswytte,

Fascht alles Bruuchbari kunnt uus alte Zytte.

Und wenn de aafosch, aaneluege,

Findschs in alle Egge und Fuege:

 

Vo dr Muusig, Helge, Biecher und Minze -

(muesch iberhaupt nit verlääge grinse!

Ooni wäre mer jeemerlig verloore,

Wurde no in de Naaseleecher boore),

 

Iber Näschter, Stieel, Disch und Deppig

(die sin zwoor hitte gräll und pebbig),

Ze unghyyr Vyylem, wo me hit muess pflääge,

Sunscht verliere mer no dää herrlig Sääge.

 

Mer schitze jo alles, wo s z schitze git:

Schtai und alti Gnoche, Kunscht (au die vo hit)

Goofe und Dierli, Umwält und Tradizioone,

Dänggmeeler, Luft und anderi Zoone.

 

Nur ebbis leemer bigoscht verloddere,

ass dr d Gney voor Gruuse schloddere:

Dr Dänggmoolschutz sott sich angaschiere

Nit numme Dänggmool z schitze, nai au d Maniere!

 

Kai Hefligkait gits mee im Land!

D Sprooch isch ruuch, es isch e Schand.

Wo isch Respäggt und Aastand bliibe?

Kasch dr no lang dyni Auge ryybe.

 

Rettet Basel – nit vom Druggte in dr Zyttig!

S Iibel ligt im Voorbild und nit anderwyttig.

Das aber isch verloore und verschwunde,

Maldrediert, deformiert und gschunde.

 

Doch wär weiss denn no, wie das goot?

Zem Aafoo ischs gwiis no lang nit zspoot!

S duet doch nit wee und koschtet kai Rabbe:

Fryndlig z si! Sunscht halt doch aifach d Glabbe!

 

7.7.  D Basler Jooreszyte – My Fasnacht 2011 Alt, aber nit vo geschtert.

My Vorfasnachtsbrief

Liebi Verwandti, Frynd und andri,

Spoot kunnt si das Joor, aber sie kunnt!
Vom Blange simmer scho ganz wund.
Am 14. Merz fangt d Fasnacht erscht aa;
E Daag wo me kuum me erwarte kaa.
Am Morge frie, wenn s Vieri schloot,
Und e jede bezitte am Strosserand stoot,
Denn isch si doo mit Ruesse und Pfyffe!
D Frau  Fasnacht het unsri Seele ergriffe.
Mer sin pingtlig baraad, mit allem fettig
Jetz isch dr Cortège die ainzig Rettig
Zem ändlig alle deerfe z zaige
Was is im Ghaime und ganz ellaige
Mit Noodle und Faade glunge n isch.
Farb und Form sin brächtig, jo  magisch!
Kai Gnepfli, kai Lätsch , kai Fäädere fäält.
Mer hänn is um jedes Fezzeli kwäält.
Kemmet am Määntig zer Huetgass go luege
Punggt halb Zwai diemer is duur d Mängi pfluege:
In dr  ‚Yssere‘  zer Seibi und am Comité verby.
Bisch erscht am Theaterbärg  derby?
In dr Aeschevoorstadt bim  Banggverain
Mache mer Stazioon und hebe n ain.
Mer geen wyter am Viertel vor Drey,
Voruusgsetzt dr Wääg isch fir is frey.
Iber d Brugg uff e Wettstai und hindere
(Mer sin jetz scho dief im ‚Mindere‘).
Dernoo an dr Muschti – s Verschnuufe fir d Ross
Under de Arkade vom Parkhuuskoloss.
Am Vieri, Viertel ab zem Aendspurt duur d Claare ,
Diemer iber d Brugg zem Drey Keenig faare.
Dernoo diemer d Schääse haizue schigge,
Und sälber as Mäsggeli s Dryybe begligge.
De kasch is natirlig au am  Mittwuch gsee.
Drotz Musggelkater und andere Wee;
Am halbi Zwai an der Yysegass schteen  mer yy.
S goot uff dr ‚Innere‘ iber dr Rhyy,
No nem Keer iber d Muschti zem  Waisehuus aane.
Fir deert diemer dr erscht Halt yyblaane.
Am Drey oder so goots wider loos:
Vom Wettstaiblatz wyters uff dr Stroos.
No dr Seibi schääre mer fir e halb Stund uus,
Nämme zer Steergig graad ebbis voruss.
Vo deert goots pfyffegraad  zem Drey Keenig aabe.
Dernoo dien au mir uns am Dryybe laabe.

 

                     

7.8.  D Basler Jooreszyte – My Fasnacht 2012 Fiert die rooti Bloog im Grosse Root Basel no in Not?.

7.8.  D Basler Jooreszyte – My Fasnacht 2012 Fiert die rooti Bloog im Grosse Root Basel no in Not?.

Dr Vorfsnachtsbrief

2012               

Liebi Verwandti, Fründ und andri,

Si isch scho uff em Wääg, unsri Frau Fasnacht!
Und dorum rupfts und zupfts jetz mit aller Macht.
In myner Bruscht foots wie verruggt aa böbberle.
Ghöör jo scho d Schääse übers Pflaschter höbberle!
Mer sin püngtlig baraad, wie alli Joor
Und stelle mit Freud unser Klaiod vor.
E Wärg für d Auge und aifach zum Gniesse.
Dr Zeedel döörf au e bitz Gift verschiesse.
Jetz haissts: guet uffpasse, s’isch  zimli wichtig!
Mer starte nämli in die andri Richtig:

Mäntig
Inneri               In dr Rüdegass  diemer d Schääse vorberaite

14.10                Und  löön is denn in dr Freye in Cortège laite,

                        Diräggt über dr  Määrtblatz duure zur Brugg.

                        -s Comité Schiffländi hebt is dört no zrugg -!

                        S vergit döört alle e Zuugs-Blagedde .

                        Döört wird au gföttelet - kasch druff wette!

15.30                Dr Claragraabe kunnt is jetz glääge

                        Um d Rössli und uns kenne z verpflääge.

16.00                Öbbe am Vieri goots wyters d Claare duuruus,

                        Und  no nem Keer über d Muschti zum Waisehuus,

                        Dernoo über d Wettstaibrugg in Sektor Dalbe.

17.00                In dr Wysse Gass diemer noonemool halte.

17.30                Am halber Säggsi goots wider loos.

                        Mer blyybe no e weeneli uff dr Strooss.

                        Dr Grais duet sich für hütte schliesse

                        Und au mir dien dr Räschte gniesse.

Mittwuch
Usseri                Au am Mittwuch simmer uff dr Gass.

                          Jetz die ‚Usseri‘ ab dr Grienpfoolgass,

13.30                  In d Gärbergass  richtig Barfi und Staine.

                          Mer sin wider  im Saft - muesch jo nit maine.

14.15                  In dr Aeschevorstadt bim  Banggverain

                          Mache mer Stazioon und hebe n ain.

14.45                  Mer göön wider wyter kurz  vor de Drey,

                          Voruusgsetzt me macht dr Wääg für is frey.

                           Passiere s Wettschtai-Comité und dr Blatz

                           Griesse do und döört none liebe Schatz.

15.30                   An dr Muschti gits e Verschnuufe für d Ross

                           Under de Arkade vom Parkhuuskoloss.

16.00                   Und scho simmer im ÄndsCHpuurt duur d Clare.

                           Denn dien au miir an Bluemerain faare,

ab 17-18.00         Wo d Schääse sich sammle, denn defiliere

ab 18.30              Und mit iirne tolle Goschdym brilliere.

                           I freu mi, wenn i Eych neume ka entdegge

                           Und  dr Zeedel und Bliemli darf anestregge.               

 

 

                     

7.9.  D Basler Jooreszyte – My Fasnacht 2013 Basler Aartevyylfalt.

Sujet 2013:  Basler Aartevyylfalt

 

Binggis:  In dr Schuel hämmer d’Aartevyylfalt duure gno,
               vo sämtlige Dierli, Pflanze und e so.

Babbe:     Ych bi überzügt, s (v)yy(l)fältigscht isch dr Mensch!
               S git jo nit aine, wo de au wirglig kennsch.

Binggis:   Jo gäll, s git Asiate, Afrikaner,
               Derno die vo do und Amerikaner!

Babbe:     S aint sin die Gääle, wo n is d’Wirtschaft stäähle.
               Und die andere dien s Banggheimnis kwääle.                  

Binggis:   Derno hämmer d Schwiizer under d Lupe gno:
                Mer hän kaibe vyyl gleert und e mängs verno. 

Babbe:     Das glaub i ooni Froog, das isch kai Wunder!
                S isch e Duurenand und e huffe Plunder. 

Binggis:   Aber Babbe, dasch ethnischi Vyylfalt!
                E kunterbunti Multikultur halt! 

Babbe:     Das fäählt no: ässe mit Stääbli oder griechisch,
                Vodka suffe statt Kirsch und danze wie Derwisch.            

Binggis:   Mer leere iiri Riite kenne und Brüüch!
                Do dermit  machsch hütte e kai Gaul me schüüch. 

Babbe:      Gly schwätze mer nümme dütsch, scho gar kai ‘Baseldytsch’:
                Derfür haissts jetz: ‘Hej Mann kuul, dy Alti isch e Bitsch’.                

Binggis:    Ainzelni dien e weeneli stööre,
                 Die wänn jo numme au zue uns ghööre!

Babbe:       Druff uffe die Griene und die Roote!
                 Und anderi mit dr glyyche Noote!

Binggis:    Rooti, Schwarzi, Gääli -  machsch mi langsam mied -
                 Sin  die beschte Kirsi uus em Baselbiet!

Babbe:      Nai, wäge däm mit dääne fusioniere?
                 Kasch grad so guet die vo Rieche probiere.

Binggis:     S’git so vyyli, wo mir uff se stolz si könne.

                 Dängg numme an Federer mit sym Könne.

Babbe:      Oder an d’Bänd vo dr Hailsarmee, wo wott mit Glämmer

                 Dr Dolgge uuswetze vom letschtjöörige Schämmer.

Binggis:     Wenn d’Fraue hüroote und iire Namme bhalte,

                 Könne sich d’Aarte jo no vyyl mee entfalte.

Babbe:       Super: s’bruucht kai Hüroot no Familieblanig..

                 Vo wämm d’Goofe sin, hett kain me e Aanig!

Binggis:     Handle sozial und dängg global,
                 So giltsch au du als international.

Babbe:       ProSpezieRara, erhöör mi, ych flee di aa,
                 Mer mien au no d Basler uff dyner Lischte ha!